Status             Fa   Ar   Tu   Ku   En   De   Sv   It   Fr   Sp  
  بـه‌شى یه‌که‌م     به‌شی دووه‌م     به‌شی سێیه‌م

شانه‌ حیزبییه‌کان و ئاکسیۆنه‌ کرێکارییه‌کان

ده‌رباره‌ی گرنگیی ئاژیتاتۆر و ئاژیتاسیۆنی ئاشکرا

بـه‌شى یه‌که‌م


١) پێشه‌کى

ئاکسیۆنى ناڕه‌زایه‌تیی کرێکارى وه‌ك هه‌ر دیارده‌یه‌کى دیکه‌، ڕابردوو، ئێستا و ئایینده‌ی خۆی هه‌یه‌. له ‌مه‌سه‌له‌گه‌ڵ، په‌یوه‌ندی و داواکاری تایبه‌تییه‌وه‌‌ سه‌رچاوه‌ ده‌گرێت، سه‌رهه‌ڵده‌دا و په‌ره‌ده‌سێنێ و له‌ سبه‌ینێى کۆتاییهاتنیشیدا په‌یوه‌ندى، هاوسه‌نگى هێز، وره‌ و تێگه‌یشتنى جیاواز به‌جێ ده‌هێڵێ. ئه‌وه‌ی له ‌ده‌ره‌وه‌ بۆی ده‌ڕوانێت، ئاکسیۆنى کرێکاری به ‌گشتى، به ‌سه‌رهه‌ڵدانیی به‌کرده‌وه‌ی ناڕه‌زایه‌تیی ئاشکرای به‌کۆمه‌ڵی ده‌زانێت. "کرێکارانى ئاسنتوانه‌وه‌ مانیان گرت"، "کرێکارانى که‌نداو دوایی له‌گه‌ڵ پۆلیس و پاسداران ده‌سته‌ویه‌خه‌ بوون"، "کرێکارانى پیشه‌سازیی نه‌وت ده‌ستیان داوه‌ته‌، که‌مکاری" و‌ له‌م چه‌شنه‌. به‌ڵام ئاکسیۆنێکی کرێکاری بۆ هه‌ڵسووڕاوانى کۆمۆنیست مانایه‌کى به‌رفراوانتری هه‌یه‌. کاتێک که‌ ئێمه‌ قسه‌ له‌ ده‌خاڵه‌ت له‌ ئاکسیۆنه‌ کرێکارییه‌کان و ڕابه‌رییان ده‌که‌ین، ده‌خاڵه‌ت و کاری ڕابه‌ریى له‌ پرۆسه‌یه‌کدا، به‌ مانای پێش ڕوودانى ئاکسیۆن، کاتى ڕوودانى و دوای ڕوودانى له‌به‌رچاو ده‌گرین.

هه‌ر ڕێنمایییه‌ك، یان کۆمه‌ڵه‌ ڕێنمایییه‌ك بۆ ڕۆشنکردنه‌وه‌ی شێوه‌ی ده‌خاڵه‌تى هه‌ڵسووڕاوانى کۆمۆنیست و ڕێکخراویی کۆمۆنیست له‌ خه‌بات و ناڕه‌زایه‌تییه‌کانی هه‌ر ئێستای کرێکاران، ده‌بێ ئه‌رکى کۆمۆنیسته‌کان له ‌هه‌ر سێ ده‌وره‌ی شکڵگیرى، ڕوودان و کۆتایى ئاکسیۆنه‌کان ڕۆشن بکاته‌وه‌. مانای ده‌خاڵه‌ت و به‌شداری له‌ ئاکسیۆنێکدا له‌ حاڵى ڕوودانیدا له‌ یه‌که‌مین هه‌نگاودا ڕۆشن دێته ‌به‌رچاو، به‌ڵام بیرۆکه‌ی ده‌خاڵه‌ت له‌ ئاکسیۆندا، پێش ڕوودانى، یان دوای کۆتاییهاتنى، له‌وانه‌یه‌ له ‌سه‌ره‌تاوه‌ که‌مێك سه‌یر بێته‌ به‌رچاو. له‌ واقیعدا ئه‌مه‌ ڕووی دووه‌مى مه‌سه‌له‌که‌یه‌ و ‌تا ئێستا له‌ باسه‌کانى ئێمه‌دا سه‌باره‌ت به‌ شێوه‌ی مامه‌ڵه‌ی شانه ‌حیزبییه‌کان له ‌به‌رامبه‌ر خه‌باتی ئێستادا، زۆرتر جێگه‌ی سه‌رنج بووه‌ و ئه‌وه‌ی که‌ ئه‌وه‌نده‌ باسی لێوه‌ نه‌کراوه‌، پێداویستییه‌کان و شێوه‌ی ده‌خاڵه‌تکردن‌ له‌ ئاکسیۆن له‌ کاتى ڕوودانیدا بووه، هه‌ر بۆیه‌ ڕوونکردنه‌وه‌ی زیاتری به‌که‌ڵك ده‌بێت.

هه‌ر ئاکسیۆنێك (به‌ مانای تایبه‌تى وشه‌که‌ واته‌، یه‌ك خه‌باتى ناڕه‌زایه‌تیی به‌کرده‌وه‌ و به‌رده‌وام)، مۆری زه‌مینه‌ و هه‌لومه‌رجی بابه‌تی و خۆیی پێش خۆی له‌گه‌ڵ خۆیدا هه‌ڵده‌گرێ. هه‌ر ئاکسیۆنێك له‌سه‌ر زه‌مینه‌ی هاوسه‌نگییه‌کى دیاریکراوی نێوان هێزه‌کان و له‌ چوارچێوه‌یه‌کی هۆشیاریی سیاسی و پله‌یه‌ك له‌ ڕێکخراوبوون و ئاماده‌یى بۆ ڕێکخراوبوونى هه‌ر ئێستای چینه‌که‌دا شکڵ ده‌گرێت. بێگومان ئه‌م هۆکارانه‌ له‌ درێژه‌ی خودی ئاکسیۆندا گۆڕانکارییان به‌سه‌ردا دێت، به‌ڵام له‌ دواشیکردنه‌وه‌دا ته‌نها به‌ ڕاده‌یه‌کی دیا‌ریکراو ده‌توانن له‌ ئاستی پێشوو واوه‌تر بچن. هیچ مانگرتنێك له‌ ئێرانى ئه‌مڕۆدا به‌ یه‌کجار له‌سه‌ر ٣٥ سه‌عاتکار، ده‌رچوونى هێزه ‌سه‌رکوتگه‌ره‌کانی کۆماری ئیسلامى له‌ کوردستان یان ئازادیی بێ قه‌ید و شه‌رتی بیروباوه‌ڕ و ڕاگه‌یاندن له‌ هه‌موو وڵاتدا ده‌ست پێ ناکات، هێرشی بۆرژوازی پاشه‌کشه‌ی به‌سه‌ر بزووتنه‌وه‌ی کرێکاری و هاوسه‌نگی هێزه‌کانی ئێستادا هێناوه‌‌ و داخوازیگه‌لی کرێکاری، ناڕه‌زایه‌تییه‌ هه‌میشه‌ییه‌کانی بۆ ئاستێکی نزمتر هێناوه‌ته‌ خواره‌وه‌.

هه‌ر ئاکسیۆنێك هه‌نگاوهه‌ڵهێناوه‌یه‌کی خه‌باتگێڕانه‌ی کرێکارانێکی دیاریکراوه‌، به‌ هۆشیارییه‌کی سیاسی و توانایییه‌‌کی ڕێکخراوه‌یی دیاریکراوه‌وه‌، له‌سه‌ر زه‌مینه‌ی هاوسه‌نگیی هێزه‌کانی ئێستا، وه ‌یان به‌ تێگه‌یشتنێکی تایبه‌ته‌وه‌ له‌ هاوسه‌نگی هێزه‌کانی ئێستا. چوارچێوه‌ و بار و دۆخێکی گشتی، که‌ ناڕه‌زایه‌تییه‌ خۆبه‌خۆ کرێکارییه‌کان له‌ چوارچێوه‌یدا شکڵ ده‌گرێت، له‌ لایه‌ن ئه‌م هۆکارانه‌وه‌ که‌م تا زۆر له‌ پێشه‌وه‌ دیاریکراوه‌. به‌شداری له‌ ئاکسیۆن پێش ڕوودانی ئاکسیۆن، به‌ مانای ده‌خاڵه‌ت و هه‌وڵدانه‌ بۆ گۆڕانی ئه‌م بار و دۆخه‌ و تێکشکانی ئه‌م چوارچێوه‌یه‌، مانای تێکۆشانه‌ بۆ به‌رزکردنه‌وه‌ی ئاستی هۆشیاری و ڕێکخراوه‌یی کرێکاران و پووچه‌ڵکردنه‌وه‌ی هۆکاره‌کانی دووبه‌ره‌کیخستنه‌وه‌ و فۆرمووله‌کردنی ئوسوڵیی درووشم و داواکارییه‌ کرێکارییه‌کان و پێکه‌وه‌به‌ستن و ڕێکخراوکردنی کرێکارانی پێشڕه‌و و خاوه‌ننفوز و به‌رزکردنه‌وه‌ی گیانی خه‌باتکارانه‌ی کرێکاران و شتی له‌و چه‌شنه‌. ڕاکێشانی به‌شێکی زۆرتری کرێکاران بۆ کۆمۆنیزم و ڕێکخراوبوونیان له‌ حیزبی کۆمۆنیستدا خۆی کاریگه‌رییه‌کی چاره‌نووسسازیشی له‌سه‌ر ئاستی خه‌باتی ناڕه‌زایه‌تیی داهاتوودا هه‌یه‌. هه‌ڵسووڕانی هه‌میشه‌یی شانه‌کان و هه‌ڵسووڕاوانی کۆمۆنیستی له‌نێو کرێکاراندا، هه‌روه‌ها هاتنه‌ناوه‌وه‌ی تایبه‌تیی ئه‌وان له‌ هه‌ر ده‌وره‌یه‌كدا، که‌ ناڕه‌زایه‌تیی هه‌میشه‌یی به‌ شێوه‌یه‌ك په‌ره‌ ده‌گرێ، که‌ ئاسۆی یه‌ك ئاکسیۆن له‌ به‌رامبه‌ر کرێکاراندا داده‌نێت، کاریگه‌ری جیددی خۆی به ‌شێوه‌یه‌کی ڕاسته‌وخۆ به‌سه‌ر توانایی و داوێنی ئاکسیۆنی داهاتوودا داده‌نێت. چاره‌نووسی ئاکسیۆنی کرێکارانی کارخانه‌یه‌ك که‌ به‌ ده‌وڵه‌ت و خاوه‌نکاره‌کان خۆشباوه‌ڕن و کۆمۆنیسته‌کان له‌ نێویاندا کاریان نه‌کردووه‌، فۆرمووله‌یه‌کی نائوسوڵی و ناڕۆشنیان له‌ داواکارییه‌کانی خۆیان هه‌یه‌ و شتی تر له‌ پێشه‌وه‌ دانراوه‌. به‌شێکی گرنگ له‌ هه‌ڵسووڕانی ڕۆتینی کۆمۆنیسته‌کان و هاتنه‌ناوه‌وه‌ی تایبه‌تیی ئه‌وان پێش ڕوودانی ئاکسیۆن، لابردنی ئه‌م خاڵه‌ لاوازانه‌یه‌. ئه‌مه‌ هه‌ر چۆنێک بێت، مانای ده‌خاڵه‌ت و کاریگه‌ریدانانه‌ له‌سه‌ر چاره‌نووسی هه‌ر ئاکسیۆنێکی داهاتووی کرێکاران.

ئه‌رکی کۆمۆنیسته‌کان دوای کۆتاییهاتنی ئاکسیۆنیش، که‌م تا زۆر ڕۆشنه‌. جیا له‌وه‌ی ئاکسیۆن به‌ ئاکام گه‌یشتووه‌ یان نا، گشت پرۆسه‌ی خه‌بات، خاڵه‌ لاوا‌ز و به‌هێزه‌کانی ده‌بێ لێكبدرێته‌وه‌ و ئه‌م لێکدانه‌وه‌یه تا ئه‌و‌ ڕاده‌یه‌ی که‌ له‌ توانادایه‌، له‌ به‌رفراوانترین ئاستدا ببێته‌ شعووری گشتیی کرێکاران، یان لانی که‌م ببێته‌ ئاگایی به‌شی پێشڕه‌وتری ئه‌وان. ئه‌گه‌ر ده‌ستکه‌وتێك هه‌یه، ده‌بێ جێگیر بکرێت و پارێزگاری لێ بکرێت. ئه‌گه‌ر تێكشکانێك له‌ ئارادا بووه‌، ده‌بێ هۆیه‌کانی‌ شی بکرێته‌وه‌ و ببێته‌ بنه‌مای ئه‌زموونێک بۆ کرێکاران. ده‌بێ به‌رهه‌ڵستی له‌ به‌رامبه‌ر کاریگه‌ریی عه‌مه‌لیی تێكشکان (ده‌رکردنی هاوڕێیانی کرێکار، ده‌ستدرێژی خاوه‌نکار بۆ سه‌ر مافه‌کانی تری کرێکاران ...) ڕێك بخرێت. له ‌هه‌موو هه‌لومه‌رجێكدا، ده‌بێ به‌رامبه‌ر به ‌هاتنه‌خواره‌وه‌ی گیانی خه‌باتکارانه‌ و دڵساردی و نائومێدی له‌ خه‌باتدا ڕابوه‌ستین. هه‌ر ئاکسیۆنێك زه‌مینه‌ بۆ کاری چڕ و پڕی کۆمونیستی له‌نێو جه‌ماوه‌ری کرێکاراندا فه‌راهه‌م ده‌کات، که‌ ده‌بێ به‌ باشی، که‌ڵکی لێ وه‌ربگیرێت.

هه‌ر چۆنێك بێت ڕوونکردنه‌وه‌ی ئه‌رکه‌کانی شانه‌ کۆمۆنیستییه‌کان له‌پێش و له‌دوای ئاکسیۆندا دژوار نییه‌. زۆر له‌ خاڵه‌ گرنگه‌کان هه‌ر ئێستا به‌ ڕێگه‌ی جیاجیا ڕوون کراونه‌ته‌وه‌. ئه‌گه‌ر ناڕۆشنییه‌ك و گیروگرفتێك له‌ باره‌ی شێوه‌هه‌ڵوێست له‌ به‌رامبه‌ر ئاکسیۆنه‌کاندا له‌ ئارادا بێت، له‌ بنچینه‌دا ده‌گه‌ڕێته‌وه‌ بۆ مه‌سه‌له‌ی ده‌خاڵه‌ت له‌ ئاکسیۆن و ڕابه‌ریی ئاکسیۆن له‌ کاتی ڕوودانیدا، یانی له ‌کاتی ئاکسیۆندا (به ‌مانای تایبه‌تی وشه‌که‌). لێره‌دایه‌ که‌ زۆرترین قووڵبوونه‌وه‌ پێویسته‌. لێره‌دایه،‌ ده‌بێ به‌ دوای بیر و بۆچوون و ڕێنمایییه‌ ڕێنیشانده‌ره‌کانه‌وه‌ بین.

٢) تایبه‌تمه‌ندیی ڕۆژه‌کانی ئاکسیۆن و گرنگیی لایه‌نی خه‌باتی ئاشکرا

مه‌به‌ست له‌ ده‌خاڵه‌تی شانه‌کان و هه‌ڵسووڕاوانی کۆمۆنیست له‌ ئاکسیۆنه‌ کرێکارییه‌کاندا چییه‌؟ هه‌رگیز مانای ئه‌وه‌ نییه‌، که‌ کۆمۆنیسته‌کان ته‌نها وه‌کوو کرێکارانی دیکه‌ له‌ کۆڕ و کۆمه‌ڵی گشتیدا، له‌ ڕیزی خۆپیشاندان و شوێنی مانگرتندا هه‌بن و مشته‌کۆڵه‌ی خۆیان له‌نێو سه‌ده‌ها مشته‌کۆڵه‌دا و ڕای خۆیان وه‌کوو سه‌ده‌ها ڕای تر له‌ ڕه‌تکردنه‌وه‌ و قبووڵکردنی ئه‌م یان ئه‌و پێشنیار و بانگه‌وازدا ده‌ربخه‌ن. کۆمۆنیسته‌کان له‌ ئاکسیۆندا ته‌نها "وه‌کوو هه‌ر کرێکارێکی تر" به‌شداری ناکه‌ن، به‌شداریی کۆمۆنیسته‌کان به‌پێی پێناسه‌، به‌شدارییه‌ له‌ ڕێنومایی ئاکسیۆندا، له‌ ڕابه‌ریکردنیدایه‌ ڕووه‌و ڕێی ئوسووڵی، به‌پێی سیاسه‌ته‌ کۆمۆنیستییه‌کانی حیزب.

ئه‌ده‌بیاتی پۆپۆلیستی وێنه‌یه‌کی ساده‌گه‌رییانه‌ له ‌ڕابه‌ریی ئاکسیۆنه‌ کرێکارییه‌کان له‌ لایه‌ن ڕێکخراوی نهێنییه‌وه‌ ده‌خاته‌ ڕوو. شانه‌یه‌کی نهێنی ڕێکخراو ڕابه‌ریی به ده‌سته‌وه‌یه‌. ئه‌م شانه‌یه‌ له‌ زووه‌وه‌ حه‌قانییه‌تی خۆی به‌ جه‌ماوه‌ری کرێکاران سه‌لماندووه‌ و کرێکاران به‌ شێوه‌ی گشتی به‌ بیستنی ناوی ڕێکخراو و بیرهێنانه‌وه‌ی ڕابردووی پڕ شانازیی ئه‌و، دێنه‌ ژێر درووشمه‌کان و ڕێنمایییه‌کانی شانه‌ی نهێنییه‌وه‌. شانه‌ی نهێنی درووشمه‌کان دیاری ده‌کات و به‌ کرێکارانی ده‌گه‌یه‌نێت و ئه‌گه‌ر پێویست بکات له‌ سه‌ره‌تاوه‌ کاردابه‌شکردنیش له‌نێو کرێکاراندا دیاری ده‌کات. شانه‌ی نهێنی (به‌ بڵاوکراوه ‌و شتی له‌و بابه‌ته‌وه‌) ڕای خۆی ده‌رباره‌ی هه‌ر قۆناغێکی پێشکه‌وتنی ئاکسیۆن ڕاده‌گه‌یه‌نێ و کرێکاران به‌ ئه‌رکی فه‌وریی دواتریان ئاشنا ده‌کات. ئاکسیۆن له‌ژێر درووشمه‌کانی شانه‌ی نهێنیدا، به‌و داواکارییانه‌وه‌ که‌ له ‌لایه‌ن ئه‌و شانه‌یه‌‌وه‌ خراونه‌ته‌ ڕوو، وه‌ به‌ کۆنترۆڵی غه‌یبییانه‌ی ئه‌و ڕێنمایی ده‌کرێت.

گیروگرفتی کار لێره‌دایه‌، که‌ ئه‌گه‌رچی خۆشه‌ویستیی جه‌ماوه‌ریی حیزبێك له‌وانه‌یه‌ بتوانێت بزووتنه‌وه‌ی‌ گشتیی هه‌موو کرێکاران ئاراسته‌ بکات، به‌ڵام ئه‌م سیناریۆیانه‌، یان سیناریۆی وه‌کوو ئه‌وه که‌ ئاکسیۆن تا ڕاده‌ی کار و کاردانه‌وه‌یه‌کی ڕاسته‌وخۆی "ڕێکخراوی نهێنی کرێکاران" ده‌هێنێته‌ خواره‌وه‌، ته‌نها له‌سه‌ر کاغه‌ز ده‌توانرێت به‌ڕێوه‌ ببرێت. له‌ دنیای واقیعیدا، ئاکسیۆن به‌ ناچاریی، به‌ بوونی که‌سانی پێشڕه‌و و عه‌له‌نیکاره‌وه‌ واته‌، ڕابه‌ران و ئاژیتاتۆره‌ ئاشکراکانه‌وه‌‌ په‌یوه‌سته‌. له‌ دنیای واقیعیدا شانه‌یه‌کی ئاوها له‌ ڕێکخراوێکی ئاو‌هادا، هه‌میشه‌ له‌گه‌ڵ ئه‌م واقیعه‌ته‌ به‌ره‌و ڕووه، که‌ چه‌ند کرێکارێکی خاوه‌ننفوز و ناسراو، "که‌ سه‌ر به ‌هیچ ڕێکخراوێك نین"، له‌نێو داموده‌زگاکاندا، له‌ناو ده‌سته‌ی نوێنه‌رایه‌تیدا، به‌ کورتی له‌ نزیك و دووره‌وه‌ به‌ڵام به‌ هه‌ر حاڵ به‌ شێوه‌ی ئاشکرا، سه‌ره‌ده‌زووی ڕووداوه‌که‌ به‌ده‌سته‌وه‌ ده‌گرن و ڕووه‌و ئه‌و لایه‌ی که‌ گه‌ره‌کیانه‌ و ده‌توانن ئاراسته‌ی بکه‌ن. کارێك که‌ بۆ شانه‌کان ده‌مێنێته‌وه‌، ڕاگه‌یاندنی لایه‌نگریی‌ ڕێکخراو به‌ شێوه‌ی نووسراو له‌ ئاکسیۆنه‌که‌، ڕێزلێنانی ئاکسیۆن و ملدان به ‌هه‌موو لاوازییه‌کان و دواکه‌وتوویییه‌کانی و ئاماده‌کردنی ڕاپۆرته‌هه‌واڵه‌ بۆ ڕێکخستن‌. ئه‌م کۆنترۆڵه‌ له‌ دووره‌وه‌ و به‌ ڕابه‌رایه‌تی نا‌ئاشکرایه‌وه‌، ده‌بێ به‌ جیهانی خه‌یاڵیی پۆپۆلیسته‌کان بسپێردرێت، چۆنکه‌ ئه‌وه‌ی ڕۆژه‌کانی ئاکسیۆن له‌ سه‌رده‌می پێش و پاشی جیا ده‌کاته‌وه‌ ئه‌وه‌یه‌ که‌:

یه‌که‌م: جه‌ماوه‌رێکی که‌متر هۆشیار و که‌متر ڕێکخراوی کرێکاران ده‌کێشرێنه‌ نێو گۆڕه‌پانی کارکردنه‌وه‌. جه‌ماوه‌رێکی به‌رفراوان، که‌ خوازیاری یه‌ك ڕابه‌ری حازر و به‌رده‌وام و چوست و چالاکه‌. جه‌ماوه‌رێك که‌ له‌ سه‌ره‌تاوه‌، به‌پێی زانستێکی سیاسیی ئایدیۆلۆژیك، وه‌ یان له‌ لایه‌نگریی ڕێکخراوه‌یییه‌وه‌، سوێندیان نه‌خواردووه، که‌‌ په‌یڕه‌وی له‌ کۆمۆنیسته‌کان و تێڕوانین و سیاسه‌ته‌کانیان بکه‌ن.

دووه‌م: ڕابه‌رایه‌تی ئاکسیۆن به‌ ناچاری له‌ یه‌ك لایه‌نی ئاشکرای چاره‌نووسساز به‌هره‌مه‌ند ده‌بێت، ڕێنمایی نهێنیکارانه‌ی ته‌مایولات، داواکارییه‌ گشتییه‌کان، وه ‌یان هه‌تا جیهه‌تگیریی گشتی کرێکاران له‌وانه‌یه‌ که‌م تا زۆر له‌ ئیمکاندا بێت، به‌ڵام ڕابه‌رایه‌تی کاری ڕاسته‌وخۆ و حاڵه‌تی جم و جووڵی ئه‌وان بێگومان ته‌نها ده‌توانێت ڕابه‌رایه‌تی له‌ بنه‌ڕه‌ته‌وه‌ ئاشکرا و حازری مه‌یدان بێ.

سێیه‌م: ئاکسیۆن یه‌ك زنجیره‌ چرکه‌ساتی چاره‌نووسساز له‌ ڕووبه‌ڕووبوونه‌وه‌ی زیندووی کرێکاران له‌گه‌ڵ ده‌وڵه‌ت و خاوه‌نکار و به‌کرێگیراوه‌کانیانه‌، له ‌قسه‌ و باسه‌ نێوخۆیی و حه‌ساسه‌کانی نێو خودی کرێکاران، له‌ فێڵ و ته‌ڵه‌که‌ی خاوه‌نکار و به‌کرێگیراوه‌کانی و ئارایشدانه‌وه‌ی سه‌رله‌نوێی کرێکاران، له‌ هێرش و پاشه‌کشه‌ و شتی تری له‌و بابه‌ته‌. وه‌ڵامدانه‌وه‌ی گونجاو و خێرا به‌ ته‌واوی ئه‌م چرکه‌سات و خاڵه‌ ئاڵوگۆڕه‌ چاره‌نووسسازانه‌ و پارێزگاریی جڵه‌وی خه‌بات به‌ درێژایی ئه‌م پرۆسه‌ ڕووبه‌ڕووبوونه‌وه‌ ئاشکرایه‌، ئه‌مانه‌ هه‌مووی ڕابه‌ری زیندووی عه‌له‌نیکار و ئاماده‌ی مه‌یدان به‌ ناچاری دێننه ‌کایه‌وه‌.

چواره‌م: هه‌ڵسووڕانی کۆمۆنیسته‌کان به‌ ناچاری نهێنییه‌، به‌ڵام سه‌ندیکا زه‌رده‌کا‌ن، شوورا ئیسلامییه‌کان، ئه‌نجوومه‌نه‌کان، وه‌ یان توده‌یییه‌کان و ئه‌کسه‌رییه‌ته‌کان، که‌ جێگاوڕێگای خۆیان له‌ کارگه‌کاندا پاڕاستووه، هه‌موو ئیمکانی ده‌خاڵه‌تی ئاشکرایان هه‌یه‌. له‌ ئارادانه‌بوونی ڕابه‌ریی ئاشکرای شۆڕشگێڕ و هه‌ڵسووڕاو به‌ ڕێبازی کۆمۆنیستی، ناڕه‌زا‌یه‌تییه‌ کرێکارییه‌کان به‌ شێوه‌یه‌کی به‌رده‌وام له‌ لایه‌ن ئه‌م ڕه‌وتانه‌وه‌ به‌ره‌و سازش و شکست ده‌برێن. له‌ ڕۆژه‌کانی ئاکسیۆندا، ڕووبه‌ڕووبوونه‌وه‌ی کۆمۆنیسته‌کان له‌گه‌ڵ خۆ ئاماده‌کردنی دژی کرێکاری ئه‌م ڕه‌وتانه، ده‌بێ بکێشرێته‌ لایه‌نی ئاشکرا‌وه‌.

هه‌موو ئه‌مانه‌ به‌م مانایه‌یه‌، که‌ ڕێکخراوی کۆمۆنیستی له‌ شوێنی کار و ژیانی کرێکاراندا، وه‌ك ڕێکخراوێکی نهێنی، ته‌نها کاتێ به‌ مانای واقیعی وشه‌که‌ و به‌ شێوه‌ی ئوسووڵی توانای ده‌خاڵه‌تی کاریگه‌ر و کاری ڕابه‌رایه‌تی له‌ ئاکسیۆنه‌کاندا هه‌یه‌، که‌ بتوانێت ئه‌م لایه‌نه‌ی عه‌له‌نیکاری، ئاماده‌ی سه‌رشانۆ و ڕابه‌ری حازری مه‌یدان، دابین بکات. ئه‌مه‌ ئه‌و مه‌سه‌له‌ بنچینه‌یییه‌یه‌‌، که‌ ڕوونکردنه‌وه‌ی جیددیی شێوه‌ به‌رخوردی شانه‌ حیزبییه‌کان له‌ مه‌سه‌له‌ی ڕابه‌ری خه‌باتی هه‌میشه‌ییدا پێوه‌ی به‌نده‌، به ‌تایبه‌تی ئێمه‌ له‌ هه‌لومه‌رجێکدا چالاکی ده‌نوێنێن، که‌ بزووتنه‌وه‌ی کرێکاری له‌ ئێراندا ڕێکخراوه‌ی جه‌ماوه‌ریی جێگیری نییه‌. بوونی ڕێکخراوی جه‌ماوه‌ریی کرێکاران (وه‌کوو شوورا و سه‌ندیکا) بێگومان مه‌یدان و هه‌لومه‌رجی له‌باری ئاسایی بۆ ده‌خاڵه‌تی کۆمۆنیسته‌کان له‌ ئاکسیۆنه‌کاندا فه‌راهه‌م ده‌کات. له‌م حاڵه‌ته‌دا ده‌خاڵه‌ت له‌ ئاکسیۆندا تا ڕاده‌یه‌کی زۆر په‌یوه‌ندی به‌ پله‌ی ده‌خاڵه‌ت و نفوزی سیاسی و عه‌مه‌لیی حیزبه‌وه‌ له‌نێو ڕێکخراوه‌ی جه‌ماوه‌ری ناحیزبی کرێکاراندا هه‌یه‌. به‌ڵام له‌ کاتی نه‌بوونی ڕێکخراوه‌ی له‌و چه‌شنه‌، واته‌ له‌ هه‌لومه‌رجێکدا، که‌ هه‌ر ئاکسیۆنێ ده‌بێ که‌م تا زۆر سه‌رله‌نوێ ڕابه‌ری عه‌مه‌لیی خۆی په‌یدا بکات، خاڵه‌کانی سه‌ره‌وه‌ گرنگی زیاتر په‌یدا ده‌که‌ن.

چه‌ند جار هاوڕێیانی ئێمه‌ له‌ شانه‌ حیزبییه‌کاندا پرسیویانه‌: پێداویستییه‌کان و هه‌لومه‌رج و دیسپلینی ده‌خاڵه‌تی شانه‌کان له‌ ئاکسیۆنه‌ کرێکارییه‌کاندا چین‌؟ له‌ژێر چ هه‌لومه‌رجێکدا ده‌توانین بۆ ڕابه‌ری ئه‌م ئاکسیۆنانه‌ تێبکۆشین؟ له‌ژێر چ هه‌لومه‌رجێکدا به‌شداری ئێمه‌ ڕووکه‌ش و ئاکسیۆنیستی نابێت؟ ئێستا تا ڕاده‌یه‌کی زۆر یه‌کێ له‌ گرنگترین پێداویستییه‌کانی ئه‌م کاره‌مان ڕوون کرده‌وه‌. یه‌که‌مین پرسیارێ که‌ شانه‌ ده‌بێت له‌م بواره‌دا له‌ خۆی بکات ئه‌مه‌یه‌، ئایا شانه‌، وه ‌یان ڕێکخراوی ناوچه‌یی ئێمه‌، به‌ شێوه‌یه‌کی واقیعی توانای پڕکردنه‌وه‌ی جێگای چۆڵی ڕابه‌ری کاری ئاشکرا و ئاماده‌ی مه‌یدانی له‌ ئاکسیۆندا هه‌یه‌، بێ ئه‌وه‌ی گشت مه‌وجودیه‌ت و به‌رده‌وامکاریی تۆڕی نهێنی بخاته‌ مه‌ترسییه‌وه‌؟ ئه‌گه‌ر وانییه‌، که ‌خۆی له‌ زۆربه‌ی حاڵه‌ته‌کاندا وایه‌، ئه‌و کاته‌ ئه‌م ئاماده‌یییه‌ چۆن ده‌توانرێت به ‌ده‌ست بێت.

٣) ڕۆڵی حه‌یاتیی ئاژیتاتۆر

ئه‌وه‌ی، که ‌به‌ر له‌ هه‌ر شتێك له‌ خاڵه‌کانی پێشه‌وه‌دا ده‌رده‌که‌وێت، ڕۆڵی به‌رچاوی ڕابه‌رانی عه‌مه‌لی و ئاشکرا و به‌ شێوه‌یه‌کی گشتی ئاژیتاتۆره‌کانه‌ له‌ بزووتنه‌وه‌ی کرێکاریدا. هه‌ر ئاکسیۆنێك به‌ شێوه‌یه‌کی لێك نه‌پچڕاو به‌ کارکردی ئه‌م که‌سانه‌وه‌ به‌ستراوه‌ته‌وه‌. ئه‌م جۆره‌ هه‌ڵسووڕاوانه‌ واته‌، کرێکارانێکی پێشڕه‌وتر که‌ ڕۆڵێك له‌ هه‌ر به‌شداریکه‌رێکی ئاسایی له‌ ئاکسیۆندا له‌ ئه‌ستۆ ده‌گرن، ده‌چنه‌ ڕیزی پێشه‌وه‌ی کرێکاران، قسه‌یان بۆ ده‌که‌ن و تێده‌کۆشن ببنه‌ نوێنه‌ر و قسه‌که‌ر و ڕابه‌رانی ناڕه‌زایه‌تی و مانگرتن، هه‌میشه ‌و له‌ هه‌ر بزووتنه‌وه‌یه‌کی ناڕه‌زایه‌تیدا وجودیان هه‌یه‌. ئه‌مانه‌ به‌رهه‌می (سروشتی) ناڕه‌زایه‌تین.

هه‌ر ناڕه‌زایه‌تی و خه‌باتێکی کرێکاری، ته‌نانه‌ت ئه‌گه‌ر حیزبه‌ سیاسییه‌کان له‌وێدا که‌مترین نفوزیشیان هه‌بێ، به‌ شێوه‌یه‌کی سروشتی ڕابه‌رانی خۆیان ده‌خوڵقێنن. که‌سانێک که‌ شه‌هامه‌تی چوونه‌ پێشه‌وه ‌و خه‌بات، له‌ خۆدا ده‌بینن، که‌سانێك که‌ به‌ پله‌ی جیاواز ئه‌م ئه‌رکه‌یان له‌سه‌ر شانی خۆیان داناوه‌، که‌ ببنه‌ ده‌مڕاستی (قسه‌که‌ری) ئاشکرای کرێکاران، خواست و ئاره‌زووی کرێکاران له‌ قسه‌کانیاندا ڕابگه‌یه‌نن، ‌به‌م پێیه‌ ده‌توانن له ‌ناو کرێکاراندا خۆشه‌ویست و قسه‌ڕۆیشتوو بن. که‌سانیك که‌ له‌ ئاستی ئاگایی و په‌یمانداریی گشتیی کرێکاران زیاتر تێده‌په‌ڕن و خۆیان وه‌ك ڕابه‌ر و په‌یمانده‌ری ڕێنمایی کرێکاران ده‌بینن. ئه‌مانه‌ کرێکاری هۆشیارتر، پڕ شۆڕ و شه‌وق و به‌ ئه‌زموونترن، که‌ توانای هه‌ژاندن و وه‌ڵامدانه‌وه ‌و ڕێبازدیاریکردن له‌ خۆیاندا ده‌رده‌خه‌ن. ده‌خاڵه‌ت له‌ گفتوگۆکاندا ده‌که‌ن، له‌ کاته‌ ناسکه‌کاندا کرێکاران له‌ دوودڵی وسه‌ره‌گێژه‌ ده‌رده‌هێنن و ڕێگای ڕوو له‌ پێشیان بۆ دیاری ده‌که‌ن. سروشتییه‌، که‌ ئه‌م ڕابه‌ره‌ خۆبه‌خۆیانه‌ هێندێك جار هه‌ڵه‌ بکه‌ن، له‌وانه‌یه‌ له‌ بنچینه‌دا به‌ درکێکی ڕاست له‌ به‌رژه‌وه‌ندییه‌کانی چینی کرێکار و شێوه‌کانی خه‌بات چه‌کدار نه‌بن، جارێك توندڕه‌وی و جارێك سازش بکه‌ن، به‌ڵام سیفه‌تێک له‌ هه‌موویاندا هاوبه‌شه، ئه‌ویش توانای وه‌ستانه‌ له‌ ڕیزی پێشه‌وه‌ی کرێکاران و کاریگه‌رییانه‌ له‌سه‌ر کرێکاران له‌ ڕێگه‌ی ڕۆشنکردنه‌وه‌ و به‌ڵگه‌هێنانه‌وه‌ و هه‌ژاندن و شه‌هامه‌تی خۆده‌رخستنی فه‌ردی. هیچ ئاکسیۆنێ به‌بێ ئه‌وه‌ی کرێکارانێك خۆیان به‌رنه‌ ئه‌و مه‌وقیعه‌ ڕابه‌رییه‌وه‌، به‌ شوێنی خۆی ناگات و له‌ هه‌مان کاتدا هیچ ئاکسیۆنێک نییه‌ که‌ به‌ شێوه‌یه‌کی سروشتی کرێکارانێك نه‌نێریته‌ ڕیزی پێشه‌وه‌ و جوڵه‌ی خۆی به‌ هێزی دیاریکه‌ری ئه‌وان نه‌به‌ستێته‌وه‌. له‌و جێگایه‌ی که‌ بزووتنه‌وه‌ی کرێکاری توانیویه‌تی جۆرێك له‌ ڕێکخستنی پایه‌دار به‌سه‌ر بۆرژوازیدا بسه‌پێنێ (وه‌کوو: یه‌کێتی‌، شوورا، ده‌سته‌ی نوێنه‌رایه‌تی و ...)، ئه‌م تاکانه‌ به‌ شێوه‌یه‌کی سه‌ره‌کی له‌ شوێنه‌ هه‌ستیاره‌کانی ئه‌م ئۆرگانانه‌دا ده‌گیرسێنه‌وه‌ و ڕۆڵی خۆیان به‌ فه‌رمی و له ‌ڕێگه‌ی ئۆرگانه‌ جێکه‌وتووه‌کانی ڕابه‌رایه‌تییه‌وه‌ ده‌گێڕن (بێگومان له‌م هه‌لومه‌رجه‌دا ئه‌م ئه‌فرادانه‌ تا ڕاده‌یه‌کی زۆر له‌ لایه‌ن ئه‌م ڕێکخراوانه‌وه‌ هه‌ر‌س ده‌کرێن و ده‌بنه‌ بڕبڕه‌پشت و قسه‌که‌رانی سیاسه‌تی زاڵ به‌سه‌ریدا و به‌م پێیه‌ به‌ لادانی ئه‌و ڕێکخراوه‌ له‌ به‌رژه‌وه‌ندیی کرێکاران هه‌میشه‌ به‌شێکی زۆر له‌ هه‌ڵسووڕاوترین کرێکارانیش له‌ سنووری خه‌باتی ئوسوڵیی کرێکاری ده‌چنه‌ ده‌ره‌وه‌، وه‌کوو سه‌ندیکا ڕێفۆرمیسته‌کان و له‌و چه‌شنه‌). به‌ڵام له‌ هه‌لومه‌رجی ئێستای ئێراندا، که‌ خه‌به‌رێك له‌ شوورا و سه‌ندیکا نییه‌، ئاژیتاتۆر نه‌ك به‌ ئۆتۆریته‌ی شوێنی فه‌رمی له‌م یان له‌و کۆمیته ‌و یه‌کێتیی کرێکاریدا، به‌ڵکوو به‌ زۆری به‌ پشتبه‌ستنی نفوز و خۆشه‌ویستی خۆی له‌نێو کرێکاراندا، جێی خۆی له‌ ئاکسیۆنه‌کاندا ده‌کاته‌وه‌. تایبه‌تمه‌ندی ئه‌م هه‌لومه‌رجه‌ ئه‌مه‌یه‌، که‌ ڕیزی ڕابه‌رایه‌تی کرێکاران به‌ توندی له‌ گۆڕاندایه‌. سه‌رکوتی هه‌ر ئاکسیۆنێکی کرێکاری له‌ لایه‌ن بۆرژوازییه‌وه‌ جار له‌ دوای جار ده‌بێته‌ هۆی ده‌ستگیرکردن و ده‌رکردنی ئاژیتاتۆره‌کان و ڕابه‌ره‌ ناسراو و کۆنتره‌کان و به‌م پێیه‌ کرێکاران له‌نێو خۆیاندا به‌ ناچار هه‌ر جاره‌ به‌ دوای په‌یداکردنی ڕابه‌رانی نوێوه‌ن. له‌ لایه‌که‌وه‌ به‌رده‌وامیی خه‌بات له‌به‌ریه‌ك ده‌ترازێ، ده‌ستمایه‌ی ئه‌زموون‌ له‌نێو ڕابه‌راندا که‌م ده‌بێته‌وه‌، هه‌میشه‌ بزووتنه‌وه‌که‌ له‌گه‌ڵ لاوازیی عه‌مه‌لیی ڕابه‌رایه‌تیی ئاشکرا ڕووبه‌ڕووه‌ و له‌ لایه‌کی دیکه‌وه‌‌ بۆشایییه‌ك دروست ده‌بێ، که‌ هه‌ر جاره‌ کرێکارانێکی نوێ بۆ مه‌یدانی ڕابه‌ری و ئه‌ژیتاسیۆن کێش ده‌کات. لاوازیی هه‌میشه‌ییی ڕابه‌رایه‌تی هاوکات له‌گه‌ڵ هه‌بوونی ژماره‌یه‌کی زۆر له‌ که‌سانی پڕ شۆڕ و شه‌وق ئاماده‌ بۆ چوونه‌ پێشه‌وه، یه‌ك تایبه‌تمه‌ندیی گرنگی بزووتنه‌وه‌ی کرێکارییه‌ له‌ ئێراندا.

کاتێ که‌ له‌ ڕابه‌رانی ئاشکرا و عه‌مه‌لیی بزووتنه‌وه‌ی کرێکاری ده‌دوێین ئه‌م ته‌یفه‌مان له به‌رچاوه‌. ته‌یفێك که‌ هه‌ر کرێکارانێکی پێشڕه‌و ده‌گرێته‌وه‌، که‌ له‌ کۆنه‌وه‌ کاری ڕابه‌رایه‌تی ئه‌نجام ده‌ده‌ن و خاوه‌ن ئه‌زموونی کاری ڕێکخراو و ڕابوردوویه‌کی دوور و درێژن له‌ مه‌سه‌له‌ی ئاژیتاسیۆ‌ن، وه‌ هه‌م کرێکارانێکی پڕ شۆڕ و شه‌وقی تازه‌ش ده‌گرێته‌وه‌، که‌ هه‌نگاو به‌هه‌نگاو توانایی خۆیان له‌ ئاکسیۆنه‌کاندا ده‌سه‌لمێنن و خۆشیان به‌کرده‌وه‌ ده‌خه‌نه‌ ڕۆڵی ڕابه‌رییه‌وه‌. جه‌ور و سته‌می ده‌یان ساڵه‌ و سه‌رکوتکردنی دڕندانه‌ی بزووتنه‌وه‌ی کرێکاری له‌ لایه‌ن بۆرژوازییه‌وه‌ له‌ ئێران له‌وانه‌ به‌م ئه‌نجامه‌ش گه‌یشتووه‌، که‌ حیزبه‌کان و گروپه‌ سیاسییه‌کان ژماره‌یه‌کی که‌میان له‌م ڕابه‌رانه‌ بۆ ڕیزه‌کانی خۆیان ڕاکێشاوه‌. زۆربه‌ی ئه‌م تاکانه‌ خاوه‌نی په‌یمان و لایه‌نگری و ڕێکخراوه‌یی نین، به‌ یه‌ك وشه‌، ئه‌م کرێکارانه‌ ناحیزبی و ناڕێکخراون، بێگومان ڕۆژێك دێت له‌ ئه‌نجامی هه‌وڵ و ته‌قه‌لای ئێمه‌ و گه‌شه‌ی حیزبی کۆمۆنیست له‌نێو کرێکاراندا به‌شێکی به‌کار و به‌رچاوی ڕابه‌ران و ئاژیتاتۆره‌ خاوه‌ننفوزه‌کانی بزووتنه‌وه‌ی کرێکاری بێنه‌ نێو حیزبه‌وه‌، ڕۆژێك که‌ ئاژیتاتۆره‌ کۆمۆنیسته‌کان لێدانی دڵی ناڕه‌زایه‌تییه‌کانی کرێکاری له‌ هه‌موو ئاستێکدا به ‌ده‌سته‌وه‌ بگرن. به‌ڵام ئه‌مڕۆ ئاوها نییه‌. ئه‌مه‌ ئه‌و واقیعیه‌ته‌یه‌ که‌ هه‌ر شانه‌یه‌کی حیزبی، که‌ مه‌سه‌له‌ی ڕابه‌ری و ده‌خاڵه‌ت له‌ ئاکسیۆنه ناڕه‌زایه‌تییه‌کاندا ده‌خاته‌ به‌رده‌م خۆی، ده‌بێ به‌ باشی بیناسێ. ڕێنمایی خه‌باتی ناڕه‌زایه‌تی، به‌بێ ئاژیتاتۆر، به‌بێ ڕابه‌رانی عه‌مه‌لی و عه‌له‌نیکاری کرێکاری مومکین نییه‌. ڕابه‌رایه‌تی له‌ سه‌روو ئه‌وانه‌وه‌ ئیمکانی نییه‌. سه‌رکه‌وتنی ئێمه‌ له‌ دیاریکردنی هه‌نگاوی ئوسوڵی به‌ره‌و پێش له‌ بزووتنه‌وه‌ی کرێکاری و له‌ لێووردبوونه‌وه‌ی‌ زیاتری شێوه‌کانی عه‌مه‌لیی شانه‌ حیزبییه‌کان، به‌ ته‌واوی به ‌د‌رکی ئه‌م واقیعیه‌ته‌ به‌ستراوه‌ته‌وه‌.

٤) حیزبی کۆمۆنیست و ڕابه‌رانی عه‌مه‌لیی بزووتنه‌وه‌ی کریکاری

ئاشکرایه‌ که‌ ئامانجی حیزبی ئێمه‌ ئه‌وه‌یه‌، ڕابه‌رانی عه‌مه‌لی و ئاژیتاتۆره‌ خاوه‌ننفوزه‌کانی ناو بزووتنه‌وه‌ی کرێکاری له‌ ڕیزه‌کانی خودی حیزبدا بن و هه‌ڵسووڕانی ئه‌وا‌ن له‌ چوارچێوه‌ی گشتیی هه‌ڵسووڕانی حیزب و له‌ژێر دیسپلینی ڕێکخراوه‌یی و ڕێبازی سیاسیی حیزبدا بێت. به‌ڵام چ بۆ هه‌نگاونان ڕووه‌و ئه‌م ئامانجه‌ و چ بۆ هه‌رچی زیاتر کاریگه‌ریی کۆمۆنیستی له‌سه‌ر ناڕه‌زایه‌تییه‌کان و خه‌باتی ئێستای کرێکاری، ئێمه‌ ده‌بێت ئه‌مڕۆ بۆ به‌ده‌ستهێنانی ئاژیتاتۆری به‌توانا، له‌ده‌وری هه‌ڵسووڕانی ناحیزبی کرێکارانی پێشڕه‌و ته‌وه‌ره‌ ببه‌ستین. ئێمه‌ ده‌بێ له‌سه‌ر ئیمکانات و په‌یوه‌‌ندی و که‌ره‌سته‌یه‌ک که‌ له‌ ئارادایه‌ کار بکه‌ین.

هه‌ر وه‌کوو گووترا، ڕابه‌ری عه‌مه‌لی و ئاژیتاتۆر دروستکراوی حیزبی ئێمه ‌و هیچ ڕه‌وتێکی سیاسی دیکه‌ نییه‌. ئه‌م دیارده‌یه‌ به‌شێکی لێكدانه‌پچڕاوی ناڕه‌زایه‌تیی کرێکارییه. به‌م پێیه‌ مه‌سه‌له‌ ئه‌وه‌ نییه، که‌‌ ئێمه‌ ژماره‌یه‌ك له‌ ئاژیتاتۆر بنێرینه‌ مه‌یدانی عه‌له‌نیی کاره‌وه‌ (هه‌رچه‌نده سه‌رده‌مێك دێت، که‌ ئاژیتاتۆره‌ پیشه‌یی و گه‌ڕۆکه‌کانی حیزب، سه‌ره‌ڕای ئاژیتاتۆری ناوچه‌یی، ئه‌م ئه‌رکه‌ ئه‌نجام بده‌ن)، به‌ڵکوو کارکردنه ‌له‌سه‌ر ڕابه‌رانێکی عه‌مه‌لی که‌ هه‌ن، له‌ پێناو کارتێکردن و ڕاکێشانیان بۆ حیزب و ڕێنماییکردنی ئه‌وان له‌ حاڵه‌تی ڕوودانی ئاکسیۆن له‌ لایه‌که‌وه‌ و په‌یوه‌ستکردنی هه‌ڵسووڕانی حیزبییه‌ له‌گه‌ڵ پرۆسه ‌و میکانیزمی گه‌شه‌ی ئاژیتاتۆره‌ نوێکان له‌نێو کرێکاراندا له‌ لایه‌کی تره‌وه‌. ئێمه‌ ده‌بێ ئه‌و ڕابه‌ر و ئاژیتاتۆرانه‌ی مه‌وجودن و ئێستا له‌ ئارادان، ڕابکێشین و له‌ شکڵگیریی ئاژیتاتۆره‌ نوێکانیشدا، به‌ بیروباوه‌ڕ و ئوسوڵی ڕۆشنی کۆمۆنیستییه‌وه‌ به‌شداری بکه‌ین. ئه‌مه‌ به‌شێکه‌ له‌ کاری ڕۆتینی ئێمه‌. به‌ڵام له‌ هه‌ر ئاکسیۆنێکی دیاریکراودا ئێمه‌ ده‌بێت بتوانین په‌یوه‌ندییه‌کی سیاسی_ ڕێکخراوه‌یی دیاریکراو و پته‌و له‌گه‌ڵ ڕابه‌رانی عه‌مه‌لیی ئاکسیۆندا پێك بهێنین. له‌ هه‌لومه‌رجی ئێستادا، که‌سانێك که‌ ده‌بێ شوێنی سه‌رنجی ئێمه‌ بن، ده‌توانرێت به‌ دوو ده‌سته‌ دابه‌ش بکرێن: یه‌که‌م، کرێکارانی پێشڕه‌و و ڕابه‌رانی عه‌مه‌لیی خاوه‌ن پێشینه‌ی کار. دووه‌م، ئاماده‌یی نوێ و ئه‌و ڕابه‌رانه‌ی که‌ له‌ حاڵه‌تی شکڵگرتندان. ئاشکرایه‌، که‌ دابه‌شکردنی ڕابه‌رانی عه‌مه‌لی، به‌ئه‌زموون‌ و تازه‌کار، یه‌ك دابه‌شکردنی شماتیك و وشکه. له ‌ڕاستیدا ئێمه‌ له‌گه‌ڵ ته‌یفێك له‌ کرێکاران به‌ره‌و ڕووین، که‌ به‌ پله‌ی جیاواز بۆ ئاژیتاسیۆن، خاوه‌نی هۆشیاری سیاسی و توانای عه‌مه‌لین. دیاریکردنی وردی شێوه‌ڕه‌فتار له‌گه‌ڵ هه‌ر حاڵه‌تێکی تایبه‌تدا، بێگومان ته‌نها له‌ لایه‌ن خودی هه‌ڵسووڕاوان و شانه‌کانی ئێمه‌ له‌نێو کرێکارانه‌وه‌ به‌ ده‌ست دێت. به‌ڵام هه‌مان دا‌به‌شکردنی شماتیك بۆ فۆرمووله‌کردنی هاوڕێیانی ئێمه‌ به‌ که‌ڵکه‌.

ئه‌لیف) ئاژیتاتۆره‌کان و ڕابه‌رانی عه‌مه‌لیی خاوه‌ن ئه‌زموون‌ و ڕابردوو.
ئه‌م ده‌سته‌یه‌ له‌ کرێکاران ئه‌زموونێکی سه‌خت و پڕ له‌ ڕه‌نج و ده‌ردیان له‌م چه‌ند ساڵه‌ی دواییدا به‌سه‌ر بردووه‌. گوشاری کۆماری ئیسلامی بۆ سه‌ر بزووتنه‌وه‌ی کرێکاری به‌ گشتی له‌سه‌ر ئه‌م هاوڕێیانه‌ بووه‌. ژماره‌یه‌کی زۆریان له‌ سێداره ‌دراون، گیراون و له‌سه‌ر کار ده‌رکراون. به‌شێکیان توانای ئیشکردنیان له‌ کارگه‌ گه‌وره‌کاندا له‌ده‌ست داوه ‌و به‌ ناچار ڕوویان کردووه‌ته‌ کارگه‌ بچووکه‌کان. جێگایه‌ك که‌ یه‌که‌م، شوێنێکی به‌رته‌سکه‌ بۆ هه‌ڵسووڕانی ئه‌وان، دووه‌م، پێشینه‌ی خه‌باتکارانه‌ی ئه‌وان له‌وێدا که‌متر ناسراوه‌ و به‌ ناچاری له‌ نفوز و خۆشه‌ویستی پێشوویان له‌نێوان کرێکاراندا به‌هره‌مه‌ند نین. زۆربه‌یان خۆیان به‌ سۆسیالیست و کۆمۆنیست ده‌زانن. به‌ڵام کۆمۆنیزم به‌ ڕیوایه‌تی پۆپۆلیسته‌کان و ڕیڤیژینیسته‌کان فێربوون. له‌به‌ر ئه‌وه‌ قه‌یرانی ڕیڤیژینیزم و پۆپۆلیزم ئه‌وانیشی دووچاری قه‌یران‌ و سه‌ره‌گێژه‌ی ئایدیۆلۆژی و بێباوه‌ڕیی سیاسی کردووه‌. له‌ڕووی عه‌مه‌لییه‌وه‌ تا ڕاده‌یه‌کی زۆر گۆشه‌گیر و په‌رش و بڵاو بوون، په‌یوه‌ندییه‌ په‌ره‌گرتووه‌کانی پێشویان له‌گه‌ڵ یه‌کدا نه‌ماوه‌. نیگه‌رانی له‌ مه‌ترسی ئه‌منییه‌تی و ئه‌زموونی تاڵی شێوه‌کاری پۆپۆلیستی، ئه‌وانی به‌رامبه‌ر به‌ ڕێکخرابوون له‌ سازمانی کۆمۆنیستیدا دووچاری دوودڵی کردووه‌. مه‌سه‌له‌ی ده‌رامه‌ت و گوزه‌رانیش به‌ توندی شانی ئه‌وان قورس ده‌کات و ئه‌مه‌ گۆشه‌گیریی سیاسیی ئه‌وان توند ده‌کاته‌وه‌. به‌ گشتی ئالۆزیی فیکری، خۆ له‌ ڕێکخراو دزینه‌وه‌، دڵساردی و خۆپارێزی، نه‌بوونی مه‌یدانی گونجاو بۆ هه‌ڵسووڕان، گیروگرفتی‌ گشتی ئه‌م کرێکارانه‌یه‌. له‌ هه‌لومه‌رجێکدا که‌ سه‌رکوت و بنبه‌ستی پۆپۆلیزم و "خه‌لكگه‌رایی" ته‌نانه‌ت ڕێکخراوه‌کانی وه‌کوو "ڕاهی کارگه‌ر"، یان‌ ئه‌ڵقه‌کانی پاشماوه‌ی خه‌تی ٣ (که‌ کاری سه‌رجاده ‌و سه‌رووچینایه‌تی سیفه‌تی بنچینه‌یییان بوو) کردووه‌ به‌ سه‌ندیکالیستێکی سه‌رسه‌خت و جێگای سه‌رسوڕمان نییه‌، ئه‌م ده‌سته‌یه‌ له‌ کرێکاران، که‌ خۆی له‌ سه‌ره‌تاوه‌ مه‌یلی سه‌ندیکالیستی به‌هێزی هه‌بووه‌، له‌م لادانه‌‌دا نوقم بووبێت. ئێمه‌ پێویسته‌ له‌گه‌ڵ ئه‌م به‌شه‌ له‌ کرێکاران به‌ شێوه‌یه‌کی ڕێكوپێك کار بکه‌ین و ته‌واوی مه‌سه‌له‌کانی سه‌ره‌وه‌ ده‌بێ له‌ مامه‌ڵه‌ له‌گه‌ڵ ئه‌واندا له ‌به‌رچاو بگرین.

١) ده‌بێ له‌ژێر هه‌ر هه‌لومه‌رجێكدا بێت، په‌یوه‌ندی و بیروڕا گۆڕینه‌وه‌ له‌گه‌ڵ ئه‌م هاوڕێیانه‌دا بپارێزین. ته‌نها له‌به‌رچاوگرتنی باری ئه‌منی ده‌توانێت به‌ڵگه‌ بێت بۆ به‌رته‌سكکردنه‌وه‌ی په‌یوه‌ندی به‌م جۆره‌ کرێکارانه‌وه‌.

٢) ئێمه‌ ده‌بێ له‌ مامه‌ڵه‌ له‌ته‌ک ئه‌م کرێکارانه‌دا‌، ئه‌زموونی پۆپۆلیزم، کارکردی ڕیڤیژینیزم و هه‌روه‌ها بنه‌مای سه‌ندیکالیزم و هه‌ڵسووڕانی تاکه‌که‌سی به‌ قووڵی بده‌ینه‌ به‌ر ڕه‌خنه‌. ئێمه‌ ده‌بێت ئه‌م کرێکارانه‌ له‌ ئاڵۆزی فیکری، بێئومێدی و پشتبه‌ستن به‌ خه‌باتی سه‌ندیکالیستی به‌رته‌سك ده‌ربهێنین. ده‌بێ ئاگاداری ئه‌وه‌ بین، که‌ له‌م کاره‌دا لانی زۆر له‌ پته‌وی و له‌یه‌کترگه‌یشتنی هه‌ردوو لا زه‌رورییه‌. بێ ئه‌وه‌ی نووکه‌ ده‌رزییه‌ك له‌ ڕه‌خنه‌ی خۆمان له‌ هه‌ر شتێکی ناکۆمۆنیستی که‌مڕه‌نگ بکه‌ینه‌وه‌، ده‌بێ باری قورسی هه‌موو ئه‌و ته‌جروبه‌ سه‌لبییانه‌ی که‌ ئه‌م کرێکارانه‌ به‌ سه‌ریان بردووه‌ و چه‌واشه‌فێربوونی پۆپۆلیستی و ڕیڤیژینیستی له‌ به‌رچاو بگرین. ئێمه‌ نابێت له‌ مه‌وقیعیه‌تی خاوه‌نحه‌ق، داواکار و له‌سه‌ر بنچینه‌ی ئیدانه‌ی ئه‌خلاقی وه‌ك زه‌رووره‌تی خه‌بات و ده‌ستنه‌کێشانه‌وه‌ له‌ خه‌بات و شتی تر، له‌گه‌ڵ ئه‌وان ڕووبه‌ڕوو بین. ئه‌گه‌ر ڕه‌خنه‌یه‌کیان له‌ هه‌ڵوێست و کارکردی حیزبی ئێمه‌ هه‌یه‌، ئه‌م ڕه‌خنانه‌ پێویسته‌ به‌ وردی و به‌ درێژی وه‌ڵامی بدرێته‌وه‌. ده‌بێ تێبکوشین له‌گه‌ڵ به‌رزکردنه‌وه‌ی گیانی خه‌باتگێڕی ئه‌وان، ده‌ستیان به‌‌ ڕه‌خنه‌یه‌کی قووڵ له‌ پراتیکی به‌رته‌سکی ڕابردوو، وه‌ تێگه‌ییشتنێکی ڕۆشن له‌ حیزبی کۆمۆنیست و ئامانج و شێوه‌کانی بگات.

٣) ده‌بێ کارێك بکرێ که‌ ئه‌م په‌یوه‌ندییانه ‌و باس و خواسانه‌ له‌ دڵی په‌یوه‌ندییه‌کی سروشتی و لانی که‌م مه‌ترسی ئه‌منیدا (بۆ هه‌ردوو لا) به‌ڕێوه‌ ببرێت. نیگه‌رانی ئه‌منییه‌تی ئه‌م کرێکارانه‌ پشتبه‌ستوو به‌ تاقیکردنه‌وه‌ی ئه‌وان له‌ شێوه‌کاری هه‌لپه‌رستخوازانه‌ی پۆپۆلیستییه‌. له‌ چوارچێوه‌ی ئه‌م په‌یوه‌ندییه‌ به‌هێزانه‌دا، پێویسته‌ ئێمه‌ ئه‌م هاوڕێیانه‌ به‌ بڵاوکراوه‌کان و ڕادیۆی حیزب و بۆچوونه‌ سیاسییه‌کان و تاکتیك و درووشمه‌کانی خۆمان ئاشنا بکه‌ین.

٤) ده‌بێ ئه‌م کرێکارانه‌ هه‌تا ده‌توانرێت به‌ یه‌کتره‌وه‌ په‌یوه‌ند بدرێن. نابێ بوار بدرێت سیاسه‌تی سه‌رکوتی کۆماری ئیسلامی، په‌یوه‌ندی سروشتی نێوان کرێکارانی پێشڕه‌و لاواز بکات.

کار له‌گه‌ڵ ئه‌م ده‌سته‌یه‌ له‌ کرێکاران، پێویستی به‌ به‌رده‌وامی و سه‌بر و توانایی ته‌رویج و ڕۆشنکردنه‌وه‌ی بۆچوونه‌کانی حیزب له هه‌مبه‌ر مه‌یله‌ لاده‌ره‌‌کان و ناسینی گیروگرفته‌ عه‌مه‌لییه‌کانی ئه‌م ده‌سته‌یه‌ له‌ کرێکاران هه‌یه‌. باشترین و به‌ ئه‌زموونترین هاوڕێیانی ته‌رویجکه‌ر ده‌بێ به‌م کاره‌ هه‌ڵسن.

ب) ئاماده‌یی نوێ و ڕابه‌رانی ڕوو له‌ گه‌شه‌.
له‌به‌ر نه‌بوونی به‌شێکی گرنگ له‌ ڕابه‌رانی ناسراو و به‌ئه‌زموون‌، توێژێکی به‌رفراوان له‌ ڕابه‌رانی نوێ دێنه‌ مه‌یدانه‌وه‌. ئه‌مانه‌ به‌ گشتی کرێکارانێکن به‌ هۆشیاریی سیاسی و تاقیکردنه‌وه‌ی عه‌مه‌لی که‌متر، به‌ڵام پڕ شۆڕ و شه‌وق و ناڕازین، گه‌نجترن و خاوه‌نی وره‌یه‌کی به‌رزترن. هاوڕێیانی ئێمه‌ له‌ کارخانه‌کان و گه‌ڕه‌که‌کاندا پێ به‌پێ له‌گه‌ڵ ئه‌م ڕابه‌ره‌ تازه‌ په‌یدابووانه‌دا ئاشنا ده‌بن. له ‌کۆبوونه‌وه‌ گشتییه‌کاندا، له‌ کۆڕ و کۆمه‌ڵی‌ ناڕه‌زایه‌تیی ده‌ربڕیندا، که‌سانێک هه‌ن، که‌ به‌ هه‌ر شێوه‌یه‌ك بێت قسه‌ی خۆیان به ‌گوێی هه‌مووان ده‌گه‌یه‌نن، له‌ به‌رامبه‌ر داروده‌سته‌کانی ده‌وڵه‌ت و خاوه‌نکاره‌کاندا ده‌نگی ناڕه‌زایه‌تی خۆیان به‌رز ده‌که‌نه‌وه‌. جاری وا هه‌یه‌ به‌ قسه‌کردن یا به‌ ده‌ربڕینی ڕسته‌یه‌ك، بار و دۆخی دانیشتنه‌ کرێکارییه‌کان ده‌خه‌نه‌ ژێر کاریگه‌ری خۆیانه‌وه‌. له‌ زۆر کاتدا به‌ با‌شی ده‌بینرێت، که‌ ده‌خاڵه‌تی ئه‌وان زیاتر لایه‌نی ئیحساسی هه‌یه‌. دیاره‌ که‌ به‌ شۆڕ و شه‌وقن و که‌سێك جڵه‌وی ناڕه‌زایه‌تییان ناگرێت. له ‌به‌رامبه‌ر داسه‌پاندن و گوشاردا هه‌ستیارن و له‌ ناڕه‌زایه‌تی تاکه‌که‌سیدا ئازا و به‌جه‌رگن. قسه‌کانیان زۆر ڕێكوپێك و به‌ جێوڕێ و ئوسوڵی نییه‌، زیاتر ڕاگه‌یاندنی پڕ له‌ ئیحساسی کوله‌مه‌رگی و سته‌مکێشییه‌ تا بانگه‌وازکردن بۆ هه‌نگاوی عه‌مه‌لی و سیاسی حیسابکراو. به‌ڵام شۆڕ و شه‌وقی خه‌باتگێڕانه‌ تیایاندا شه‌پۆل ده‌دات. ئه‌مانه‌ ورده‌ورده‌ پاڵپشت و خۆشه‌ویستی کرێکاران به‌ده‌ست ده‌هێنن، به‌ڵام کاڵوکرچی و نه‌بوونی زه‌مینه‌ی پێشووتری ڕابه‌رایه‌تی، ده‌بێته‌ هۆی ئه‌وه‌ی، که‌ نه‌توانن به‌ باشی و به‌ خێرایی ببنه‌ یه‌ك ڕابه‌ری عه‌مه‌لیی ناسراو. هاوڕێیانی ئێمه‌ ده‌بێ ئه‌م توێژه‌ له‌ کرێکاران به‌ وردی و حه‌ساسییه‌ت له‌ به‌رچاو بگرن. ئه‌مانه‌ که‌سانێکن، که‌ له‌ لایه‌نی که‌می ئه‌و توانایه‌ به‌هره‌مه‌ندن، که‌ ببنه‌ ئاژیتاتۆری باش و‌ ئه‌گه‌ر هۆشیار ببنه‌وه‌، به‌ ئایدیۆلۆژیای کۆمۆنیستی چه‌کدار بن و ببنه‌ خاوه‌ن ئه‌زموون، ده‌بنه‌ نه‌وه‌ی نوێ له‌ ڕابه‌رانی کۆمۆنیستی عه‌له‌نیکار له‌ بزووتنه‌وه‌ی کرێکاریدا. کارکردن له‌ نێوان ئه‌م کرێکارانه‌دا بۆ په‌روه‌رده‌کردنی ئاژیتاتۆره‌ کۆمۆنیستییه‌کان له‌ ڕوانگه‌ی ئێمه‌دا شتێکی حه‌یاتییه‌. سه‌رخه‌تی ئه‌رکه‌کانی ئێمه‌ له‌م بواره‌دا ئه‌مانه‌یه‌.

١) نه‌ك ته‌نها ده‌بێ له‌گه‌ڵ ئه‌واندا په‌یوه‌ندی دامه‌زرێنین، به‌ڵکوو ده‌بێت په‌یوه‌ندیی ئاماده‌بوونی شه‌خسی و به‌رده‌وامی نێوان ئه‌وان له‌گه‌ڵ هاوڕێیانی حیزبیی به‌ئه‌زموون له‌ کاری ته‌رویجدا دامه‌زرێنین. ده‌بێ هاوڕێی حیزبی له‌ په‌یوه‌ندییه‌کی سروشتیدا، ببێت به ‌دۆست و هاوڕێیه‌کی هه‌میشه‌یی ئه‌م کرێکارانه‌. ئه‌مانه‌ ئه‌و ئاژیتاتۆرانه‌ن که‌ له‌ حاڵه‌تی "فێرکاری"دا، ده‌بێت له‌ مه‌یدانی کاردا فێر بکرێن.

٢) ده‌بێ ئه‌وانه‌ فێری کۆمۆنیزم بکرێن. ئه‌م کرێکارانه‌ ده‌بێ له‌ ڕێگه‌ی ئێمه‌وه‌ ئاشنای پایه‌کانی کۆمۆنیزم و بۆچوونه‌ ڕیشه‌یییه‌کانی مارکسیزم ببن. پاش ماوه‌یه‌ك به‌سه‌ر ئه‌م کاره‌ ئه‌م هاوڕێیانه‌ ده‌بێ حیزبی کۆمۆنیست، ئامانجه‌کان، تاکتیکه‌کان و شێوه‌کانی بناسن و په‌رۆشی کارکردن له‌گه‌ڵ حیزبدا بن.

٣) ئه‌م کرێکارانه‌ ده‌بێ ڕۆڵ و مه‌وقیعه‌تی یه‌ك ئاژیتاتۆر و گرنگی ئه‌و بۆ شۆڕش و خه‌باتی کرێکاری د‌رك بکه‌ن و هۆشیارانه‌ مامه‌ڵه‌ له‌گه‌ڵ ڕۆڵی خۆیاندا بکه‌ن. هه‌رچی زیاتر ده‌بێ ده‌خاڵه‌تی ئه‌وان له‌ ناڕه‌زایه‌تییه‌کانی کرێکاریدا له‌ شێوه‌ی یه‌ك ده‌خاڵه‌تی پڕ ئیحساس بێته ‌ده‌ره‌وه‌ و‌ ببێته‌ ده‌خاڵه‌تێکی عاقڵانه‌ و ئامانجدار، که‌ به‌ سیاسه‌ت و ڕێبازێکی چینایه‌تی دیاریکراو (سۆسیالیزم) و حیزبێکی سیاسی و مو‌شه‌خه‌س (حیزبی کۆمۆنیست) په‌یوه‌ست ده‌بێته‌وه‌.

٤) پێویسته‌ هونه‌ری ئاژیتاسیۆنی کۆمۆنیستی فێر بکرێن. ئاژیتاتۆر که‌ی دێته‌ مه‌یدانی کاره‌وه‌، که‌ی ده‌بێت به‌ شێوه‌یه‌کی حه‌تمی ده‌خاڵه‌ت بکات و له‌ کوێدا ده‌بێت ئیحتیات وه‌ربگرێت، چۆن ده‌بێت فه‌زا و چوارچێوه‌ی چالاکی و مه‌وقیعه‌تی خۆی بناسێت، سنوور و کۆسپی نهێنی قسه‌کردن، یان ئاشکراوتنی مه‌سه‌له‌کان چۆن ڕۆشن ده‌کرێته‌وه‌، چۆن ده‌بێ بۆچوونی ڕاست و درووست ته‌نانه‌ت درووشمه‌ تایبه‌تییه‌کانی حیزبیش ته‌بلیغ بکات بێ ئه‌وه‌ی ببێته‌ قوربانی دنه‌دانی به‌کرێگیراوانی بۆرژوازی، چۆن ده‌بێ خۆی بپارێزێ، په‌یوه‌ندی به‌ جه‌ماوه‌ری کرێکارانه‌وه‌ ده‌بێ چی بێت، له‌ به‌رامبه‌ر پۆلیسی سیاسی چۆن ناسنامه‌ی خۆی ده‌ناسێنێ و کاره‌کانی خۆی چۆن ئاراسته‌ ده‌کات، تا چ ڕاده‌یه‌ك و ‌له‌ژێر چ هه‌لومه‌رجێکدا بۆی هه‌یه‌ به‌ ئاشکرا په‌نجه‌ بۆ کۆمۆنیزم و سیاسه‌ته‌ کۆمۆنیستییه‌کان ڕابکێشێت، چۆن ده‌بێ توانای به‌کرده‌وه‌ و حه‌شاردراوی بزاڤێک، که ‌ده‌یه‌وێت ڕێنمایی بکات بناسێت، پیلانه‌کانی به‌کرێگیراوانی بۆرژوازی له‌ چ قوماشێکه‌، به‌کرێگیراوانی ده‌وڵه‌ت و خاوه‌نکاره‌کان چۆن له‌ ئاکسیۆنه‌کاندا دووبه‌ره‌کی ده‌خه‌نه‌وه‌ و چۆن ده‌بێت ئه‌م هه‌نگاوانه‌ پووچه‌ڵ بکرێنه‌وه‌ ... یاسا و ڕێسای بوونه نوێنه‌ری کرێکاران چییه‌، چ شێوه‌یه‌ك له‌ وتووێژ له‌گه‌ڵ ده‌وڵه‌ت و خاوه‌نکاردا ده‌بێت به‌کار بێت. چۆن ده‌توانرێت زۆرترین هێزی جه‌ماوه‌ریی کرێکاران ساز و ته‌یار بکرێت و له‌مه‌یداندا چاودێری بکرێت و ده‌یان پرسیاری گرنگی "شێوه‌کاری" له‌م چه‌شنه‌. ئه‌مانه‌ ده‌بێ به‌ ته‌واوی و به‌ وردی فێری ئه‌و ئاژیتاتۆرانه‌ بکرێن، که‌ له‌ حاڵه‌تی فێرکاری دان و کارکردی ئه‌وان له‌ هه‌ر کارێکدا ڕاست بکرێته‌وه‌.

به‌کورتی له‌ مامه‌ڵه‌ له‌گه‌ڵ کرێکارانی پڕ شۆڕ و شه‌وق و خاوه‌ن ناڕه‌زایه‌تی، ده‌بێ به‌ حه‌ساسییه‌تێکی ته‌واوه‌وه‌ لێهاتوویی ئه‌م هاوڕێیانه‌ بۆ بوون به ئاژیتاتۆرێکی ئاشکرا و ڕابه‌ری عه‌مه‌لی هه‌ڵبسه‌نگێنرێن. خاڵه‌ لاوازه‌کانی ئه‌وان شی بکرێنه‌وه و له‌ حاڵه‌تێکدا که‌ ئاماده‌یی و لێهاتوویی شه‌خسی و باری ئه‌منییه‌تی ئه‌و جێی متمانه‌ بێت، ده‌بێ په‌یوه‌ندییه‌کی هه‌میشه‌یی و پته‌و له په‌یوه‌ندییه‌کی سروشتیدا له ‌نێوان ئه‌و و یه‌کێك له‌ موره‌ویجینی حیزبدا پێك بێت. ئوسوڵی کۆمۆنیزم و شۆڕشی کرێکاری فێر بکرێت و کاری ته‌بلیغی ئه‌و له‌ مه‌یدانی عه‌مه‌لیدا ڕێنومایی بکرێت و ڕه‌خنه‌ی لێ بگیرێت. له‌م نێوه‌دا به‌دیهێنانی په‌یوه‌ندییه‌کی هاوڕێیانه‌، ئوسووڵی و ڕێکخراو له‌ نێوان هاوڕێی حیزبی و ئاژیتاتۆری تازه‌کار زۆرترین ڕۆڵی هه‌یه‌. ئه‌م په‌یوه‌ندییه له‌ هه‌مان کاتدا که‌ ئیمکانی فێرکردنی ئاژیتاتۆر ده‌خوڵقێنێ، سنوورێك له‌ نێوان ئه‌و و خه‌تی نهێنیی ڕێکخستندا پێك دێنێ و مه‌ترسیی گواستنه‌وه‌ی زه‌ربه‌لێدان که‌م ده‌کاته‌وه‌، به‌ تایبه‌تی ئه‌گه‌ر ئاژیتاتۆر خۆی په‌ی به‌ گرنگی و نرخی کاری "فیرکه‌ر" به‌رێت و هۆشیارانه‌ ئه‌و له‌ شوێن پێهه‌ڵگرتنی پۆلیس بپارێزێت (ده‌رباره‌ی ئه‌م مه‌سه‌له‌یه، له‌ خواره‌وه‌ ڕوونکردنه‌وه‌ی زیاتر ئه‌ده‌ین).

کارکردن له‌نێو کرێکارانی پێشڕه‌و بۆ ڕاکێشانی ئه‌وان بۆ ناو حیزبی کۆمۆنیست هه‌ڵسووڕانێکی ڕۆتینی و هه‌میشه‌یی ئێمه‌یه‌. به‌ڵام هه‌وڵ و ته‌قه‌لا بۆ پڕکردنه‌ی شوێنی چۆڵی ئاژیتاتۆره‌ عه‌له‌نیکاره‌کان له‌ کاری کۆمۆنیستیدا، به‌شێکی تایبه‌تی ئه‌م هه‌ڵسووڕاوییه‌ هه‌میشه‌یییه‌ی ئێمه‌یه‌. په‌روه‌رده‌کردن و ڕاکێشانی ئاژیتاتۆر به‌ مانای زیادکردنی مه‌یدانێکی نوێیه‌ بۆ چالاکییه‌کانی ڕێکخستنی نهێنی. هاوڕێیانیك که‌ وه‌کوو ئاژیتاتۆری ئاشکرا دێنه‌ حیزبه‌وه‌، هه‌ر ته‌نها نابنه‌ فه‌ردێکی تازه‌ له‌ تۆڕی حیزبدا، به‌ڵکه‌ مه‌یدانێکی تازه‌ له‌ هه‌ڵسووڕان ده‌خه‌نه‌ به‌رده‌ست. به‌م پێیه‌ ده‌بێ تایبه‌تییه‌کانی ئه‌م مه‌دانه‌ ئاشکرایه‌ی هه‌ڵسووڕان به‌ باشی بناسرێ و جێی واقیعیی ئاژیتاتۆر به‌و ببه‌خشرێت. تا ئه‌و کاته‌ی که‌ ئێمه‌ له‌ڕووی عه‌مه‌لییه‌وه‌ توانای پێهه‌ڵهێنانه‌وه‌مان نه‌بێت بۆ ئه‌م مه‌یدانه‌ی هه‌ڵسووڕان، واته‌ تا ئه‌و ده‌مه‌ی که‌ ڕێکخراوی ناوچه‌ییی ئێمه‌ (له‌ کارخانه ‌و له‌ گه‌ڕه‌ك) خاوه‌نی کۆمه‌ڵێك ئاژیتاتۆری ئاشکرا نه‌بێ، که‌ به‌ شێوه‌ی ئوسوڵی له‌گه‌ڵ ڕێکخراوی نهێنی حیزب په‌یوه‌ستن و له‌ڕێی ئه‌وه‌وه‌ ڕێنومایی ده‌کرێن، ئه‌وا ده‌خاڵه‌تی واقیعیی کۆمۆنیستی له‌ ئاکسیۆنه‌ کرێکارییه‌کاندا ئه‌گه‌ر له توانادا نه‌بێت، له‌ با‌شترین حاڵه‌تدا به‌ڕێکه‌وت، که‌م کاریگه‌ر و ڕووکه‌ش ده‌بێ و له‌ هه‌موو دۆخێکدا مه‌ترسیی ته‌واو بۆ هه‌موو ڕێکخستنه‌کانی حیزب ده‌هێنێته ‌کایه‌وه‌. ئاکسیۆنیزم به‌ ده‌ربڕینێکی هه‌ره‌ گشتی، مانای ده‌ستدانه‌ کارکردنه‌ له‌ کاتێکدا و له‌ژێر هه‌لومه‌رجێکدا که‌ پێداویستییه‌کان و زه‌مینه‌ی مادی و واقیعیی ئه‌م کاره‌ فه‌راهه‌م نییه‌. ئاژیتاتۆری ئاشکرای حیزبی، یه‌کێکه‌ له‌م پێداویستییه‌ حه‌یاتییانه‌. په‌یوه‌ندی پته‌وی ڕێکخراوی نهێنی (له‌ ڕووی سیاسی_ ڕێکخراوه‌یی‌ و ئه‌منییه‌تییه‌وه‌) له‌گه‌ڵ ئاژیتاتۆری ئاشکرا، یه‌کێکی تره‌ له‌م هه‌لومه‌رجه‌ حه‌یاتییه‌. هه‌نووکه‌ هه‌ر هاوڕێیه‌کی ئێمه‌ ده‌توانێت به‌ شانه ‌و به‌ ڕێکخراوی ناوچه‌یی خۆیدا بڕوانێ و سه‌رله‌نوێ له‌ خۆی بپرسێت، تا چ ڕاده‌یه‌ك له‌م ڕووه‌وه‌ ئێمه‌ له‌م سه‌ره‌تاییترین پێداویستییانه‌ی ده‌خاڵه‌تی ئوسوڵی و به‌رده‌وامکاریه‌، له‌ ئاکسیۆنه‌ کرێکارییه‌کاندا به‌هره‌مه‌ندین.

ئه‌م به‌شه‌ی وتاره‌که‌ لێره‌دا کۆتایی پێ دێنین. له‌م به‌شه‌دا جه‌خت له‌سه‌ر ئه‌وه‌ کرا، که‌ مه‌سه‌له‌ی ده‌خاڵه‌ت له‌ ئاکسیۆنه‌کاندا بۆ ئێمه‌ مه‌سه‌له‌یه‌کی تیۆری و تاکتیکی نییه، به‌ڵکه‌ له‌ بنه‌ڕه‌تدا مه‌سه‌له‌یه‌کی شێوه‌کارییه‌. ئه‌گه‌ر به‌ربه‌ستێك له‌ ئارادا بێت، پێویسته‌‌ به‌ لێووردبوونه‌وه‌ی شێوه‌کاری کۆمۆنیستی لا ببرێت. ئاکسیۆنی کرێکاری پێویستی به‌ ڕابه‌رایه‌تی ئاشکرایه‌‌ (سه‌ره‌ڕای نهێنی)، له‌به‌ر ئه‌وه‌ ئێمه‌ ده‌بێ شێوه‌کانی ده‌خاڵه‌تی ئاشکرا فێر بین و به‌ کاری بهێنین. به‌ڵام ده‌خاڵه‌تی ئاشکرا پێویستی به‌ که‌سانی عه‌له‌نیکار و ئاژیتاتۆره‌ کۆمۆنیستییه‌کان‌ له‌ بزووتنه‌وه‌ی کرێکاریدایه‌. ئه‌مڕۆ ئه‌م ئاژیتاتۆرانه‌ له‌ ڕیزه‌کانی ئێمه‌دا زۆر که‌من. ڕێگای په‌روه‌رده ‌و ڕاکێشانی ئه‌م جۆره‌ هه‌ڵسووڕاوانه‌ ته‌وه‌ره‌به‌ستنه‌ به‌ ده‌وری ڕابه‌رانی عه‌مه‌لیی بزووتنه‌وه‌ی کرێکاری و کرێکارانی پێشڕه‌و و که‌سانی پڕ شۆڕ و شه‌وق و خاوه‌ن ناڕه‌زایه‌تی، ئاماده‌ و له‌سه‌رپێ له‌ بزووتنه‌وه‌ی کرێکاریدا، به‌و مه‌به‌سته‌ی ببنه‌ ئاژیتاتۆری حیزبی، هه‌ر وه‌ها ئه‌م کاره‌ پێویستی به‌ تێگه‌یشتنی جۆری ئه‌و په‌یوه‌ندییه‌ ڕێکخراوه‌یییه‌یه‌، که‌ ڕێکخراوی نهێنی حیزبی له‌گه‌ڵ که‌سانی عه‌له‌نیکاری خۆیدا پێکی ده‌هێنێ.

له‌ به‌شی دواییدا دێینه‌ سه‌ر ئه‌م لایه‌نه‌ی دواتر، واته‌ لایه‌نی ڕێکخراوه‌یی مه‌سه‌له‌که‌ و به‌ شێوه‌یه‌کی موشه‌خه‌س چه‌ند خاڵێك ده‌رباره‌ی په‌یوه‌ندی عه‌مه‌لیی ئاژیتاتۆر به‌ شانه‌ و ڕێکخراوی نهێنی حیزبه‌وه‌ ده‌خه‌ینه‌ ڕوو، وه‌ له‌ کۆتایی باسه‌که‌دا به‌ مه‌به‌ستی ڕۆشنکردنه‌وه‌ی سه‌رخه‌تی هه‌نگاوه‌ عه‌مه‌لییه‌کانی شانه‌ حیزبییه‌کان له‌م لایه‌نه‌وه‌ بابه‌ته‌که‌ گه‌ڵاڵه‌ ده‌که‌ین. ‌‌‌

  بـه‌شى یه‌که‌م     به‌شی دووه‌م     به‌شی سێیه‌م

شانه‌ حیزبییه‌کان و ئاکسیۆنه‌ کرێکارییه‌کان

ده‌رباره‌ی گرنگیی ئاژیتاتۆر و ئاژیتاسیۆنی ئاشکرا

به‌شی دووه‌م


١) گرنگیی "شێوه‌کار"ی باس و لێکۆڵینه‌وه‌ی ئاژیتاتۆر

باسی گرنگیی ئاژیتاتۆری کۆمۆنیستی ده‌بێت به‌ر له‌ هه‌ر شتێك له ئاستێکی پایه‌یی و به‌ناو "شێوه‌کاریی"دا له‌ به‌رچاو بگیرێت. له‌م ئاسته‌دا هێشتا قسه‌ له‌سه‌ر ئه‌وه‌ نییه‌، که‌ بۆ نموونه‌ ژماره‌ی ڕابه‌رانی عه‌مه‌لی و کرێکارانی خاوه‌ن نفووز له‌ ڕیزه‌کانماندا که‌من ‌و ده‌بێت زیاد بکه‌ن. باس له‌سه‌ر ئه‌مه‌یه‌، که‌ له‌ بنه‌ڕه‌تدا حیزبی ئێمه‌، هه‌ڵسووڕاوانی حیزب له‌ شاره‌کان و شانه‌کانی ئێمه‌ ده‌بێت خاوه‌نی کۆمه‌ڵه‌ نه‌ریت و خوو و ڕه‌وشت و شێوه‌ هه‌ڵسوڕاوییه‌کی ئه‌وتۆ بن، که‌ ڕاکێشانی ئه‌م جۆره‌ کرێکارانه‌ مومکین ده‌کات. به‌ هه‌مان مانا پێشتر قسه‌مان له‌ پێویستیی "هه‌رسکردنی" دیارده‌یه‌ك کرد به ‌نێوی ئاژیتاتۆری کرێکاری له‌ سیسته‌می عه‌مه‌لیی هه‌ڵسووڕانی حیزبیدا. شێوه‌کاره‌کانی ئێمه‌ ده‌بێت به ‌جۆرێك بن، که‌ ئاژیتاتۆر و ڕابه‌ری عه‌مه‌لیی کرێکاری بتوانن له‌م سیسته‌مه‌دا جێگایان هه‌بێت. ده‌بێ کارکردن له‌گه‌ڵ حیزبدا، نه‌ك ته‌نها له‌گه‌ڵ تایبه‌تمه‌ندێتی و پێداویستییه‌کانی هه‌ڵسووڕانی ئاژیتاتۆردا ناکۆك نه‌بن، به‌ڵکوو به‌ پێچه‌وانه‌وه‌ ده‌بێ چوارچێوه‌یه‌کی ته‌واو بۆ پشکووتنی ئه‌م تایبه‌تمه‌ندییانه ‌و به‌هێزکردنیان بڕه‌خسێنێ. شێوه‌کاری پۆپۆلیستی، که‌ ڕێك دێته‌وه‌ له‌گه‌ڵ جۆری ژیان و شێوازی ناڕه‌زایه‌تی ئه‌و ورده‌بۆرژوازییانه‌، که‌ تاكتاك خه‌ریکی به‌رهه‌مهێنانن بێگومان جێگایه‌ك بۆ ئاژیتاتۆری پرۆلیتاری و ڕابه‌ری جه‌ماوه‌ریی کرێکاری ناهێڵێته‌وه‌.

کاتێك خه‌باتی سیاسی له‌ نێوان داسه‌پاندنی گوشاری ئاشتییانه‌ به‌سه‌ر بۆرژوازی و یاخیبوونی کوێری تیرۆریستانه‌ ئه‌ملا و ئه‌ولا بکات، کاتێك ده‌رخستنی وجودی سیاسی ببێته‌ خۆده‌رخستنی سه‌رجاده‌یی، کاتێك کاری نهێنی تا ئاستی چالاکیی پیلانگێڕانه‌ی چه‌ند ده‌سته ‌و تاقمی دابڕاو له‌ کۆمه‌ڵ بشێوێنرێ و ده‌خاڵه‌ت له‌ مه‌یدانی ئاشکرای خه‌بات به‌ شێوه‌یه‌کی ڕه‌ها ڕه‌ت بکرێته‌وه، بێگومان کرێکارێکی خاوه‌ن نفووز و ڕابه‌رێکی کرێکاری، که‌ ده‌توانێ ڕۆڵی خۆی ته‌نها له‌ پێشه‌وه‌ی ڕیزی کرێکاراندا بگێڕێت، جێگایه‌کی له‌ ڕێکخراودا ده‌ستناکه‌وێ. بێ هۆ نه‌بوو، که‌ مه‌زنترین ڕێکخراوه‌ پۆپۆلیستییه‌کان له‌ چڵه‌پۆپه‌ی ڕه‌ونه‌قیاندا، نه‌ك ته‌نها خاوه‌نی هێز و نفوزی جیددی خه‌باتگێڕانه‌ له‌ پیشه‌سازییه‌ گه‌وره‌کانی وه‌کوو پیشه‌سازی نه‌وتدا نه‌بوون، به‌ڵکه‌ ته‌نانه‌ت له‌ ڕێکخستن و ڕابه‌رایه‌تیکردنی مانگرتنێک له کارگه‌یه‌کی (٥٠) که‌سیشدا بێتوانا بوون و تا ئه‌و جێگایه‌ی که‌ په‌یوه‌ندی به‌ ناڕه‌زایه‌تی و خه‌بات (به‌ مانای وشه)ی‌ کرێکارییه‌وه‌ هه‌یه‌، لانی زۆر ده‌بوونه‌ شوێنکه‌وته ‌و په‌یامنێر.

شێوه‌کاری حیزبی سیاسیی چینی کرێکار، ده‌بێت له‌گه‌ڵ ژیانی ئابووری و شێوه‌ دیاریکراوه‌کانی‌ خه‌بات و ناڕه‌زایه‌تی کرێکاریدا بگونجێت. کرێکار له‌ ڕێکخراوبووندا، هێز و توانا وه‌رده‌گرێ. ناڕه‌زایه‌تی تاکه‌که‌سی کرێکاران بێبه‌رهه‌مه‌ و ته‌نها خه‌باتی ڕێکخراوبوونیان به‌رهه‌مداره‌. کرێکاران له‌ مه‌یدانی به‌رهه‌مهێناندا خاوه‌نی ئامرازێکی گوشارهێنه‌ری به‌هێزن. هه‌ر لێره‌وه‌یه‌، که‌ کارخانه‌ و جێگای به‌رهه‌مهێنانی یه‌کێك له‌ بنچینه‌ییترین مه‌یدانه‌کانی خه‌باتی کرێکاری پێك ده‌هێنن و مانگرتن ده‌بێته‌ شێوه‌ی بنه‌ڕه‌تیی ناڕه‌زایه‌تیی کرێکاران له‌ هه‌موو کون و قوژبنێکی جیهاندا. کرێکار به‌ پێچه‌وانه‌ی ورده‌بۆرژوازییه‌وه‌ چینێکی کۆمه‌ڵایه‌تییه ‌و به‌ به‌رهه‌مهێنانی گه‌وره‌وه‌ په‌یوه‌سته‌. ناڕه‌زایه‌تی و خه‌باتی ئه‌م چینه‌ به‌ ناچاری شێوازی جه‌ماوه‌ریی ئاشکرا و ڕووبه‌ڕوو به‌ خۆیه‌وه‌ ده‌گرێت.

ناتوانرێت کرێکاران له ‌ده‌سته‌ی خه‌باتگێڕانه‌دا ڕێك بخرێن و چاوه‌ڕوانی ئه‌وه‌ بین که‌ هه‌ر وه‌ك کرێکاران خه‌بات بکه‌ن. وه‌ سه‌ره‌نجام کرێکاران چینێکی سه‌راسه‌ری و له‌ هه‌مان کاتدا به‌ شێوه‌ی کۆمه‌ڵ کۆمه‌ڵی فابریکه‌یی و ناوچه‌یی مه‌وجودن، که‌ له‌ هه‌ر یه‌که‌یاندا جه‌ماوه‌ری فراوانی کرێکاران پێویستی به‌ ڕابه‌ری حازربه‌ده‌ست و ناوچه‌یی خۆی هه‌یه‌. خه‌باتی سه‌راسه‌ریی کرێکاری په‌یوه‌ندییه‌کی لێكنه‌پچراوی له‌گه‌ڵ ڕێکخستن و جم و جووڵه‌ی به‌شه‌ جۆراوجۆره‌کانی ئه‌م چینه‌دا هه‌یه‌. ناتوانرێت کرێکاران وه‌ك بۆرژواکان و ورده‌بۆرژواکان، به‌ ڕاگه‌یاندنی مه‌رجه‌عێکی ته‌قلیدی و ده‌وڵه‌تێکی دووره‌ وڵات و له‌م جۆره‌ شتانه‌ هه‌ر له‌ دووره‌وه‌ بخرێنه‌ سه‌ربار. ڕێکخستن و ڕابه‌رایه‌تیی ناوچه‌یی بۆ هه‌ر کارکردێکی چینایه‌تی کرێکاران، هه‌ر له‌ مانگرتن و ڕاپه‌ڕینه‌وه‌ بیگره‌ تا کۆنترۆڵی کرێکاری و پیاده‌کردنی به‌رنامه‌ڕێژی ئابووری له‌ سبه‌ینێی به‌ده‌سته‌وه‌گرتنی ده‌سه‌ڵات، یه‌ك مه‌سه‌له‌ی چاره‌نووسسازه‌ و چاوی لێ ناپۆشرێت.

شێوه‌کاری کۆمۆنیستی شێوه‌کارێکی گونجاو‌ له‌گه‌ڵ ئه‌م تایبه‌تمه‌ندێتییه‌ بابه‌تییانه‌ی ژیان و خه‌باتی چینی کرێکاره‌. ته‌واوی ناوه‌ڕۆکی ڕه‌خنه‌ی ئێمه‌ له‌ شێوه‌کاری پۆپۆلیستی ده‌توانرێت له‌وه‌دا کورت بکرێته‌وه‌، که‌ ئێمه‌ له‌وه‌ تێگه‌یشتین، که‌ ده‌بێت هۆشیارانه‌ و له‌ ڕێگه‌ی ڕه‌خنه‌گرتن له‌ نه‌ریته‌‌ بۆرژوازییه‌کانی زاڵ به‌سه‌ر بزووتنه‌وه‌ی چه‌پدا، ڕێگه‌ی خۆمان ڕووه‌و سازگارکردنی شێوه‌کانی هه‌ڵسووڕانی حیزبی له‌ گه‌ڵ واقیعیاتی ژیانی به‌رهه‌مهێنه‌رانه‌ و خه‌باتکارانه‌ی چینی کرێکاردا بگرینه‌ به‌ر. پۆپۆلیسته‌کان بۆیان هه‌یه‌،‌ به‌ هه‌ر شێوه‌یه‌ك که‌ ده‌یانه‌وێت، ئه‌و توێژه‌ کۆمه‌ڵایه‌تییه‌ی که‌ پایه‌گا و پشتیوانی ئه‌وانه‌ به‌گه‌ڕ بخه‌ن و ڕێنمایی بکه‌ن.

ئێمه‌ له‌سه‌رمانه‌ که‌ چینی خۆمان چینی کرێکار له‌و شکڵانه‌دا و به‌ پشتبه‌ستن به‌و میکانیزمانه‌ ڕێکخراو بکه‌ین، که‌ به‌ با‌شترین شێوه‌ ئیمکانییه‌تی به‌ ماددیبوونی هێزی واقیعیی چینی کرێکار ده‌ده‌ن. خه‌باتی چینی کرێکار، هه‌ر له‌ مانگرتنه‌وه‌ تا ڕاپه‌ڕین و به‌ڕێوه‌بردنی کۆمه‌ڵگه‌، پێویستی به‌ ڕابه‌رانی عه‌مه‌لیی ناوچه‌یی و ئاژیتاتۆره‌کانه‌. هه‌ر بۆیه‌ حیزبی کۆمۆنیست ده‌بێت خۆی ڕێکخراوێك له‌ ئاژیتاتۆره‌ کرێکارییه‌کان بێت. تێگه‌یشتنی په‌یوه‌ندیی حیزب و چین به‌ شێوه‌ی په‌یوه‌ندیی دوو جه‌مسه‌ری "ڕێکخراوی نهێنی_ جه‌ماوه‌ریی کرێکاران" تێڕوانینێکی میکانیکییه‌. ئه‌مه‌ ڕاگه‌یاندنێکی تره‌ له‌ فۆرمووله‌کردنی چریکانه‌ی "ماتۆڕی بچوك_ ماتۆڕی گه‌وره‌".

له‌ جیهانی واقیعیدا ئاژیتاتۆره‌کان و ڕابه‌رانی ناوچه‌یی و شه‌عبی خاوه‌ن نفوز ئه‌و ئه‌ڵقه‌یه‌ن که‌ حیزبی نهێنی پێشڕه‌وانی ئه‌و چینه‌ به‌ جه‌ماوه‌ری فراوانی کرێکارانێکه‌وه‌‌ ده‌به‌ستێته‌وه‌، که‌ به‌ شێوه‌یه‌کی سه‌ره‌کی به‌ ئاشکرا ده‌رس وه‌رده‌گرن و به‌ ئاشکرا ناڕه‌زایه‌تی ده‌رده‌بڕن و به‌ ئاشکرا ڕێکخراو ده‌بن. مه‌سه‌له‌یه‌ك که‌ ئێمه‌ له‌گه‌ڵیدا به‌ره‌و ڕووین ئه‌وه‌یه‌، که‌: له‌ حیزبی ئێمه‌دا و له‌ شێوه‌کاری ئێمه‌دا چ جێگایه‌ك بۆ ئه‌م توخمه‌‌ حه‌یاتییه‌ی خه‌باتی کرێکاری ته‌رخان کراوه‌؟ ئایا شێوه‌کانی هه‌ڵسووڕانی ڕێکخراوه‌ییمان به‌ شێوه‌یه‌کی سروشتی هه‌لومه‌رجێکی له‌بار بۆ ده‌ورگێڕانی ئه‌م توێژه‌ دیاریکراوه‌ له‌ چینی کرێکار ده‌هێنێته‌ گۆڕ؟ ئایا حیزبی ئێمه‌ ده‌توانێت دوولایه‌نی و لێكجیایی نه‌ریتی نێوان حیزبی سیاسی له‌ لایه‌که‌وه‌ و ڕابه‌رانی عه‌مه‌لی و عه‌له‌نیکار له‌ لایه‌کی تره‌وه‌ له‌نێو به‌رێت و خودی حیزبی سیاسی بکاته‌ حیزبێکی پێکهاتوو له‌ ڕابه‌رانی کۆمۆنیستی خاوه‌ن نفوزی ناوچه‌یی؟

به‌م پێیه‌ باسه‌که‌ی ئێستا هه‌نگاوێکی تره‌ ڕووه ‌و وردکردنه‌وه‌ی شێوه‌ عه‌مه‌لییه‌کانی هه‌ڵسووڕانی ناوچه‌یی و شانه‌ حیزبییه‌کان. سه‌ربه‌خۆ له‌وه‌ی که‌ چ شتێك پێویسته‌ له‌ پێشه‌وه‌ له‌ ده‌ستووردا بێت و سه‌ربه‌خۆ له‌ هه‌ر که‌موکوڕییه‌کی ئێستا، ڕووهێنانی ئێمه‌ بۆ ڕابه‌رانی عه‌مه‌لیی بزووتنه‌وه‌ی کرێکاری و لێهاتوویی ئێمه‌ له‌ په‌روه‌رده‌کردنی ڕابه‌رانی کۆمۆنیست بۆ بزووتنه‌وه‌ ناڕه‌زایه‌تییه‌ کرێکارییه‌کان و به‌شه‌ جیاوازه‌کانی چینی کرێکار و هه‌وڵ و ته‌قه‌لای ئێمه‌ بۆ گۆڕینی حیزبی کۆمۆنیست به‌ حیزبی ڕێکخه‌ری ئه‌م ڕابه‌رانه‌، مه‌سه‌له‌یه‌ك و ئه‌رکێکی هه‌میشه‌یی ئێمه‌یه‌، به‌جیا له‌وه‌ی که‌ ئاکسیۆنێك له‌ ئارادا بێت یا نا. به‌شێکی گرنگی ته‌بلیغ و ته‌رویج و ڕێکخستنی ڕۆتینی حیزبیی، ته‌نها به‌ کۆمه‌کی چالاکینواندنی ئاژیتاتۆره‌کان له‌ ئیمکاندایه‌. ئێمه‌ ده‌بێت ڕووه‌و ئه‌وه‌ بڕۆین که‌ حیزبی ئێمه‌ به‌ شێوه‌یه‌کی هه‌میشه‌یی به‌شێکی به‌رچاوی ڕابه‌رانی عه‌مه‌لی بزووتنه‌وه‌ی کرێکاری له‌ ڕیزه‌کانی خۆیدا له‌خۆ گرتبێت. لێهاتوویی بۆ ڕێکخستنی ئه‌م به‌شه‌ له‌ چینی کرێکار، یه‌کێکه‌ له‌ به‌ڵگه‌ گرنگه‌کانی دیاریکردنی ئه‌وه‌ی، که‌ ئایا به‌ڕاستی حیزبێك بووه‌ته‌ یه‌ك ڕه‌وتی ده‌روونی چینی کرێکار یان نا.

٢) شانه‌ی پایه‌ییی حیزبی و "هه‌ڵسووڕانی پایه‌یی"ی حیزب

شانه‌ بچووکترین به‌شی پایه‌ییی حیزبه‌، که‌ له‌ کارخانه‌یه‌ك یان گه‌ڕه‌کێكدا پێك هاتووه‌. له‌م ڕوانگه‌یه‌وه‌، شانه‌ ئه‌رکی ڕۆتین و پێناسه‌کراوی له‌سه‌ر شانه‌. به‌ڵام "هه‌ڵسووڕانی پایه‌یی" حیزب له‌ کارخانه‌ و له‌ گه‌ڕه‌ك له‌ سنووری هه‌ڵسووڕانی ڕۆتینی شانه‌یه‌ک واوه‌تره‌. "هه‌ڵسووڕانی پایه‌یی" حیزب یانی ته‌بلیغ، ته‌رویج و ڕێکخستن و ڕابه‌رایه‌تیکردنی خه‌بات له‌ یه‌ك کارخانه‌ یان به‌ش (که‌ کۆمه‌ڵێك کارخانه‌ و گه‌ڕه‌کی کرێکاری ده‌گرێته‌وه‌)، شتێکی زیاتره‌ له‌ ته‌بلیغ و ته‌رویج و ڕێکخستنێك، که‌ له‌ لایه‌ن یه‌ك یان چه‌ند شانه‌ی بنه‌ڕه‌تییه‌وه‌ ئه‌نجام ده‌درێت. ئه‌و به‌شه‌ ڕێکخراوه‌یییه‌ی، که‌ به‌پێی پێناسه‌ ئه‌رکی به‌ره‌وپێشبردنی ئه‌و ئاسته‌ له‌ هه‌ڵسووڕانی هه‌یه،‌ ئیتر شانه‌ نییه‌، به‌ڵکوو کۆمیته‌یه‌کی ڕێکخراوه‌یییه‌ (کۆمیته‌ی کارخانه‌، به‌ش ناحیه‌ و ... شتی تر). ئه‌رکه‌ ته‌بلیغی و ته‌رویجی و ڕێکخراوه‌ییه‌کانی شانه‌یه‌ک سنوورێکی دیاریکراوی هه‌یه‌. ده‌توانرێت ڕێکخستنی ئه‌ڵقه‌ ته‌رویجییه‌کان و تۆڕه‌‌کانی دابه‌شکردنی بڵاوکراوه‌ و کۆکردنه‌وه‌ی یارمه‌تیی ماڵی و له‌م جۆره‌ شتانه‌ له‌ شانه‌یه‌ک ‌داوا بکرێت، به‌ڵام ڕێکخستنی مانگرتن و خۆپیشاندانه‌کان ناتوانرێت هه‌ر وا به‌ ساده‌یی له‌ یه‌ك شانه‌ چاوه‌ڕوان بکرێت. ئه‌مانه‌ ناتوانرێت به‌شێك بن له‌و ئه‌رکانه‌ی که‌ شانه‌ ده‌بێ جێبه‌جێیان بکات. ئه‌مانه‌ ئیتر ئه‌رکی کۆمیته‌ ڕێکخراوه‌یییه‌کانن، به ‌واتایه‌کی تر ده‌بێت جیاوازی بکه‌ین له‌ نێوان ئه‌رکه‌کانی شانه‌ وه‌ك به‌شی هه‌ره‌ بچووکی پایه‌یی له‌گه‌ڵ "هه‌ڵسووڕانی پایه‌یی" حیزبیدا یانی له‌گه‌ڵ ئه‌و چه‌ندایه‌تی و چۆنایه‌تییه‌ له‌ هه‌ڵسووڕان، که‌ له‌ حازربوونی هه‌مه‌لایه‌نه‌ی حیزب له‌ یه‌ك کارخانه‌ یان ناوچه‌دا چاوه‌ڕێ ده‌کرێت. سه‌باره‌ت به‌ یه‌که‌میان ئێمه‌ له‌سه‌ر کارکرده‌کانی یه‌ك به‌ش و یه‌ك شانه‌ی پایه‌یی ڕێکخراوه‌یی ده‌که‌ین و سه‌باره‌ت به‌ دووه‌م، با‌س له‌سه‌ر هه‌موو ئه‌و چالاکییانه‌یه‌، که‌ حیزب ده‌بێت له‌ دواشیکردنه‌وه‌دا له‌ هه‌ر به‌شێکی کارخانه‌یی و ناوچه‌ییدا بتوانێت به‌ره‌و پێشی به‌رێت.

به‌ڵام ئایا ئه‌م خاڵانه‌ چ په‌یوه‌ندییه‌کیان به‌ مه‌سه‌له‌ی ئاژیتاتۆر و ئاژیتاسیۆنه‌وه‌ هه‌یه‌؟ په‌یوه‌ندیی مه‌سه‌له‌که‌ لێره‌دایه‌، که‌ تا ئه‌و جێگه‌یه‌ی،‌ شانه‌کانمان به‌ مانای تایبه‌تیی وشه‌ له‌به‌رچاوه‌، ناتوانرێت ڕێکخستن و ڕێنماییکردنی ئاژیتاتۆره‌کان وه‌ك ئه‌رکێکی لێبڕاوانه‌ی ئه‌وان چاولێ بکرێت (واته‌ ئه‌رکێك، که‌ به‌بێ ئه‌نجامدانی، شانه‌کان کامڵ نه‌‌بن). هه‌ر شانه‌یه‌کی ڕێکخراوه‌یی لێپرسراو نییه‌، که‌ به‌ حه‌تمی یه‌ك یان چه‌ند ڕابه‌ری عه‌له‌نیی کرێکاری ڕێك بخات و پێداویستییه‌کانیان ئاماده بکات. ڕێکخستنی ئاژیتاتۆره‌ کۆمۆنیستییه‌ شه‌عبی و عه‌له‌نییه‌کان به‌ مانای واوه‌تر چوونه‌ له‌ سنووری ئه‌رکه‌ پێناسه‌کراوه‌کانی یه‌ك شانه‌.

به‌م پێیه‌ یه‌که‌م، هه‌میشه‌ کۆمه‌ڵه‌ شانه‌یه‌ك ده‌توانن له‌ئارادا بن، که‌ بێ ئاژیتاتۆری شه‌عبی بن، دووه‌م، ئه‌و شانانه‌ش که‌ خاوه‌نی ئه‌و ئیمکانییه‌ت و توانایه‌ن، که‌ ڕابه‌رانی عه‌مه‌لیی بزووتنه‌وه‌ی کرێکاری له‌ په‌یوه‌ند به‌ خۆیانه‌وه‌ و له‌ژێر ئاڵای حیزبی کۆمۆنیستدا ڕێکخراو بکه‌ن، که‌م تا زۆر ده‌یانه‌وێت خۆیان له‌ چوارچێوه‌ی یه‌ك شانه‌ واوه‌تر به‌رن. لێره‌دا ئیتر هه‌نگاوێکی به‌کرده‌وه‌ بۆ شکڵگرتنی ئۆرگانه‌ به‌رزتره‌ حیزبییه‌کان (وه‌ك کۆمیته‌کانی کارخانه‌) هه‌ڵده‌هێنرێته‌وه‌.

ئێمه‌ وه‌ك یه‌ك پایه‌ و یه‌ك ئه‌وله‌وییه‌ت، لێبڕاوانه‌ خوازیاری دروستکردن و زیادکردنی شانه‌ بنه‌ڕه‌تییه‌کان و ئه‌نجامدانی ڕێكوپێکی ئه‌رکه‌ پێناسه‌کراوه‌کانی شانه‌کانین له‌ لایه‌ن شانه‌کانه‌وه‌. ئه‌مه ئه‌و زیندوویه‌تییه‌‌ هه‌میشه‌یی و ئه‌و توخمه‌ هه‌میشه‌یییه‌ی گه‌شه‌سه‌ندنه‌، که‌ هه‌ر چالاکییه‌کی ئاڵۆزتر و کامڵتری حیزبی، له‌ هه‌ر قۆناغێکی ژیانی حیزبدا، ده‌بێت پشتی پێ ببه‌ستێت و بیکاته‌ بنه‌ما. ئه‌م کاره‌ وه‌ستانی بۆ نییه‌ و هه‌رگیز له‌ ئه‌وله‌وییه‌ت ناکه‌وێ. له‌سه‌ر بنه‌مای ئه‌م گه‌شه‌سه‌ندنه‌ هه‌میشه‌یییه‌ی ژێره‌وه‌، حیزبی ئێمه‌ ده‌توانێ پێ بنێته‌ مه‌یدانی "تازه‌"وه‌ و ئه‌رکی ئاڵۆزتر و ئاوێته‌تر بخاته‌ ده‌ستووری کاری خۆیه‌وه‌ و سه‌ره‌نجام ئۆرگانه‌ ڕێکخراوه‌یییه‌ ئاوێته‌ و به‌رزتره‌کان له‌ په‌یکه‌ری ڕێکخراوه‌یی حیزبدا بهێنێته‌ کایه‌وه‌. ڕاکێشان و ڕێکخستنی ئاژیتاتۆره‌کان و به‌ره‌وپێشبردنی مه‌سه‌له‌ی ئاژیتاسیۆنی جه‌ماوه‌ری و ڕابه‌ریکردنی عه‌مه‌لیی ئاکسیۆنه‌کان یه‌کێکه‌ له‌م مه‌یدانانه‌.

له‌م ده‌وره‌یه‌ له‌ کاری حیزبی کۆمۆنیستدا، پێخستنه‌ ئه‌م میدانانه‌ ‌و شکڵپێدانی ئۆرگانه‌کان و ئه‌ندامه‌ باڵاتره‌ حیزبییه‌کان یانی، هه‌موو ڕێکخراوی حیزبیی کارگه‌ به‌ ئه‌رکه‌ جۆراوجۆره‌کانییه‌وه‌، پێش ئه‌وه‌ی ئه‌نجامی یه‌ك هه‌ڵوێستی "له‌سه‌ره‌وه‌" و به‌ پێی په‌یڕه‌وی ناوخۆیی بێت، ئه‌نجامی یه‌ك کامڵبوون و گه‌شه‌کردنه‌ له‌ژێره‌وه‌. ئامانجی ئه‌م باسه‌ی ئێستا ئه‌وه‌یه‌ که‌ ئه‌م ئاسۆی گه‌شه‌کردنه‌، له‌ یه‌کێك له‌ لایه‌نه‌ گرنگه‌کانیدا بخرێته‌ ڕوو.

به‌ڵام ئه‌وه‌ی که‌ سه‌رنجی شانه‌کان به‌ گشتی، ڕووه‌و مه‌سه‌له‌ی ئاژیتاتۆر و ئاژیتاسیۆنی جه‌ماوه‌ری ڕاده‌کێشین و له‌م باسه‌دا هه‌موو شانه‌کان بانگه‌واز ده‌که‌ین، له‌و ڕووه‌وه‌یه‌، که‌ یه‌که‌م، هه‌موو شانه‌کان و هه‌ڵسووڕانی حیزب ڕووه و کاری سیاسی (و له‌ قوناغه‌کانی دواتردا ڕێکخراوه‌یی) له‌گه‌ڵ ڕابه‌رانی عه‌مه‌لیی بزووتنه‌وه‌ی کرێکاری ئاراسته‌ بکه‌ین. گرنگی ئه‌م توێژه‌ له‌ چینه‌که‌ ده‌بێت بۆ گشتمان ئاشکرا بێت. دووه‌م، هه‌نگاوه‌کانی دواتری ئه‌و شانانه‌ش، که‌ هه‌ر ئێستا خاوه‌نی ئیمکاناتی سه‌ره‌تایی و توانایی پێویستن بۆ پێخستنه‌ ئه‌م مه‌یدانه‌ی هه‌ڵسووڕانه‌وه‌ دیاری بکه‌ین. بۆ زۆربه‌ی شانه‌کان باسه‌که‌ی ئێمه‌ له‌ سنووری یه‌ك ده‌رسی شێوه‌کار و وه‌ك پێداگرتنێك له‌سه‌ر یه‌ك لایه‌نگریی گشتی، به‌ڵام گرنگ، ده‌مێنێته‌وه‌. بۆ به‌شێکی تر ناوه‌ڕۆکی ئه‌م با‌سه‌ ده‌توانێت ڕێنمایییه‌ك بێت بۆ کاری دیاریکراو هه‌ر له‌ ئێستادا.

٣) پێداویستییه‌ گشتی و سیاسییه‌کانی ڕاکێشانی ئاژیتاتۆره‌ کرێکارییه‌کان

له‌وانه‌ی که‌ تا ئێستا باسمان کرد ڕۆشنه‌، که‌ مه‌سه‌له‌ی ڕاکێشانی ئاژیتاتۆره‌ کرێکارییه‌کان، یانی ڕابه‌رانی خاوه‌ن نفوز وه‌ یان له‌ حاڵی شکڵگرتنی کرێکاران له‌سه‌ر ئاستی کارگه‌ و گه‌ڕه‌ك، ناتوانرێت بهێنرێته‌ خواره‌وه‌ بۆ ئاستی یه‌ك میکانیزمی ساده‌ی ئه‌ندامگیری. باس له‌سه‌ر یه‌ك ڕووتێکردنی جدییه‌ له‌ لایه‌ن ئێمه‌وه‌ بۆ ئه‌م مه‌یدانه‌ی هه‌ڵسووڕان و به‌ هه‌مان شێوه‌ هێنانه‌دی جوڵانه‌وه‌یه‌که‌ له‌نێو ڕابه‌رانی کرێکاری و کرێکارانی پێشڕه‌و و خاوه‌ن نفوز ڕووه‌و کارکردن له‌گه‌ڵ حیزبدا. له‌ ناوه‌ڕۆکی مه‌سه‌له‌که‌دا ئه‌مه‌ یه‌ك ڕووتێکردن و بزاوتی سیاسییه‌ له‌ هه‌ردوو لاوه‌.

له‌ لایه‌ن ئێمه‌وه‌، ئه‌مه‌ یه‌ك ڕووتێکردنه‌ به‌ره‌و ڕابه‌رانی عه‌مه‌لی و خاوه‌ن نفوزی جه‌ماوه‌ری، بۆ کارتێکردنی کۆمۆنیستانه‌ له‌سه‌ریان و له‌ لایه‌ن ڕابه‌رانی کرێکاریشه‌وه‌ یه‌ك ڕووهێنانه‌ به‌ره‌و کاری کۆمۆنیستی و ڕێکخراوبوون له‌ ڕێکخراوی نهێنیدا. فاکته‌ری بزوێنه‌ری ئه‌م ڕوتێکردنه‌ له‌ هه‌ر دوو لاوه‌ به‌ هه‌ر حاڵ، حیزبی ئێمه‌یه‌. ئه‌مه‌ ئێمه‌ین که‌ ڕوو له‌ ڕابه‌رانی عه‌مه‌لی ده‌که‌ین بۆ ئه‌وه‌ی کارێك بکه‌ین، که‌ ئه‌وان ڕوو له‌ کۆمۆنیزم و حیزبی کۆمۆنیست بکه‌ن. وه‌ ئه‌مه‌ ئێمه‌ین، که‌ ده‌بێت پێداویستییه‌کانی کار فه‌راهه‌م بکه‌ین. چۆن؟

ئه‌لیف. پاراستنی په‌یوه‌ندیی هه‌میشه‌یی و ئاوێزانبوون له‌گه‌ڵ ئه‌ڵقه‌کانی کرێکارانی پێشڕه‌و
ئه‌م ئه‌ڵقانه‌ هه‌میشه‌ هه‌ن. هیچ پله‌یه‌ك له‌ سه‌رکوت و داپڵۆسین ناتوانێت هه‌ڵیان وه‌شێنێته‌وه‌ و له‌نێویان به‌رێت. کرێکارانی به‌ئه‌زموون‌ و دنیادیده‌ به‌درێژایی چه‌ندین ساڵ ڕێگه‌ و ڕه‌سمی پاڕاستن و په‌ره‌پێدانی ئه‌م ئه‌ڵقانه‌ له‌نێو کرێکاراندا فێربوون. ئه‌م ئه‌ڵقانه‌ له‌سه‌ر بنه‌مای سروشتیترین په‌یوه‌ندی و له‌نێو دڵی هه‌زاران په‌یوه‌ندیی ڕۆژانه‌ی کرێکاران له‌ شوێنی کار و ژیاندا، مانه‌وه‌ی خۆیان ده‌پارێزن. بۆرژوازی تا ئێستا له‌ژێر هیچ هه‌لومه‌رجێکدا نه‌یتوانیوه‌ کرێکاران ئه‌وه‌نده‌ تاكتاك و ئه‌تۆمیزه‌ بکات، که‌ ئه‌م په‌یوه‌ندییانه‌ به‌ جیددی بکه‌ونه‌ مه‌ترسییه‌وه‌. له‌م په‌یوه‌ندییه‌ ئه‌ڵقه‌یییانه‌دا کرێکارانی هه‌ڵسووڕاوتر و هۆشیارتر بیروڕا و بۆچوون ده‌گۆڕنه‌وه‌ و بڕیار ده‌ده‌ن و ته‌نانه‌ت جۆرێك فێربوونی سه‌ره‌تایی (به‌گشتی ڕووه‌و بردنه‌ سه‌ره‌وه‌ی تێگه‌یشتنی به‌رژه‌وه‌ندییه‌ پیشه‌ییه‌کان) له‌نێو جه‌ماوه‌ری کرێکاران و به‌تایبه‌تی کرێکارانی لاوتردا ده‌به‌نه‌ پێشه‌وه‌. "ئۆتۆریته‌کان" له‌م په‌یوه‌ندییانه‌دا، که‌م تا زۆر شکڵ ده‌گرن. بێ ئه‌وه‌ی که‌ ڕێکخستن و ڕێکخراوێك له‌کاردا بێت، کۆمه‌ڵه‌ پیشه‌یه‌ک له‌نێو دڵی په‌یوه‌ندییه‌ سروشتییه‌کاندا کرێکارانی هه‌ڵسووڕاو به‌ شێوه‌یه‌ك له‌ شێوه‌کان پێکه‌وه‌ ده‌به‌ستێ. ئه‌م ئه‌ڵقانه‌ مه‌ڵبه‌نده‌ چاره‌نووسسازه‌کانی نێو چینی کرێکارن.

هه‌ڵسووڕاوانی حیزب خۆیان وه‌ك به‌شێك له‌ کرێکارانی پێشڕه‌وی ده‌وروبه‌ری خۆیان، ده‌بێت به‌م ئه‌ڵقانه‌وه‌ جۆش بخۆن. له‌ هه‌ر جێگه‌یه‌ك ئه‌م ئه‌ڵقانه‌ شێوه‌ی جیددیتریان به‌خۆوه‌ گرتبێت، به‌ هه‌مان پله‌ دروستکردنی په‌یوه‌ندیی جیددیتر له‌گه‌ڵیاندا له‌ چوارچێوه‌ی په‌یوه‌ندییه‌ سروشتییه‌کاندا ده‌که‌وێته‌ سه‌رشانی ئێمه‌. هه‌ر وه‌کوو له‌وه‌و پێشیش وتمان، ته‌نها له‌به‌رچاوگرتنی باری ئه‌منییه‌تی ده‌توانێت دامێنی په‌یوه‌ندی و ئاوێزانی سروشتی ئێمه‌ له‌گه‌ڵ ئه‌م ئه‌ڵقانه‌دا سنووردار بکات. جیاوازیی تێڕوانینی ئێمه‌ له‌گه‌ڵ ئه‌م یان ئه‌و ده‌سته‌ و ئه‌ڵقه‌یه‌‌ له‌ کرێکارانی هه‌ڵسووڕاو به ‌هیچ جۆرێك ناتوانێت به‌ڵگه‌یه‌ك بێت بۆ بڕینی په‌یوه‌ندی و دوورکه‌وتنه‌وه‌ لێیان.

ب. ئاگادارکردنی کرێکارانی پێشڕه‌و له‌ هه‌ڵوێست و بۆچوونه‌کانی حیزب
له‌نێو دڵی ئه‌م په‌یوه‌ندییه‌ هه‌میشه‌یییه‌دا، ئێمه‌ ده‌بێت هه‌میشه‌ خه‌ریکی "په‌مپ"کردنی بۆچوون و سیاسه‌ته‌کانی حیزب بین بۆ نێو ڕیزه‌کانی کرێکارانی پێشڕه‌و. هه‌ر کرێکارێکی خه‌باتکار و هه‌ڵسووڕاو ده‌بێت ئاگاداری بۆچوونه‌کان، سیاسه‌ته‌کان و درووشمه‌کانی ئێمه‌ بێت (ته‌نانه‌ت ئه‌گه‌ر ڕه‌خنه‌شی لێی هه‌بێت). ته‌رویج و ته‌بلیغی ئاماده‌ و سیسته‌ماتیکی بۆچوونه‌کانی حیزب له‌م ئه‌ڵقانه‌دا (بێگومان به‌ له‌به‌رچاوگرتنی ئاستی ئه‌منییه‌تی هه‌ر په‌یوه‌ندییه‌ك)، گه‌یاندنی نامیلکه‌ گرنگه‌کان و بڵاوکراوه‌ حیزبییه‌کان به‌ شێوه‌یه‌کی هه‌میشه‌یی به‌ ئه‌ڵقه‌کانی کرێکارانی پێشڕه‌و، ناساندن و جێگیرکردنی ده‌نگی ح. ك. ئێ له‌نێو کرێکاراندا و ڕوونکردنه‌وه‌ی هه‌میشه‌یی تاکتیکه‌کان و درووشمه‌ حیزبییه‌کان له‌ په‌یوه‌ندییه‌ کرێکارییه‌کاندا مه‌رجی پێویستی ئه‌م کاره‌ن، ده‌بێت کارێك بکرێت، که‌ هه‌ر کرێکارێکی هه‌ڵسووڕاو، حیزبی کۆمۆنیست له‌ لایه‌نه‌ سه‌ره‌کییه‌کان و ئه‌وه‌نده‌ی ده‌کرێ له‌ ورده‌کاری دیدگا و هه‌ڵوێسته‌کانیدا بناسێت و له‌به‌رامبه‌ر هه‌ر مه‌سه‌له‌یه‌کی تازه‌دا خوازیاری ئاگاداربوون له‌ تێڕوانین و لایه‌نگیرییه‌کانی حیزب بێت.

ج. توانای ته‌رویجکردنی مارکسیزم و ڕه‌خنه‌ له‌ بۆچوونه‌ ناپرۆلیتارییه‌کان
ڕووتێکردنی ئێمه‌ به‌ره‌و ڕابه‌رانی عه‌مه‌لیی کرێکاران ده‌بێت ببێته‌ هۆی په‌یوه‌ستبوونی لێبڕاوانه‌ی ئه‌وان به‌ مارکسیزم و ڕێکخراوی کۆمۆنیستییان. ڕه‌خنه‌ له‌ بیر و بۆچوونه‌ ناپرۆلیتارییه‌کان و هه‌وڵدان بۆ بره‌ودانی مارکسیزم له‌نێو کرێکاراندا، ئه‌رکێکی حه‌یاتی ئێمه‌یه‌. ئاستی ته‌رویجی ئێمه‌ ده‌بێت بۆ کارتێکردنی جیددی له‌م کرێکارانه‌ تا ڕاده‌ی پێویست باڵا بێت، به‌ڵام ئه‌مه‌ به‌هیچ جۆرێك مانای ته‌رویجی خاڵه‌ ئینتیزاعییه‌کان و وتنه‌وه‌ی ساده‌ی فۆرمووله‌ مارکسیستییه‌ کلاسیکییه‌کان نییه‌. موره‌ویجی ئێمه‌ ده‌بێت پایه‌ بنه‌ڕه‌تییه‌کانی مارکسیزم به‌ شێوه‌ی جۆراوجۆر له‌به‌رامبه‌ر ده‌رکه‌وته‌ جیاوازه‌کانی خورافاتی بۆرژوازیدا لێك بداته‌وه‌. مارکسیزمی زیندوو و ڕۆشن و په‌یوه‌ست به‌ مه‌سه‌له‌کانی کۆمه‌ڵگه ‌و جیهانی ئه‌مڕۆوه‌، ئه‌مه‌ شتێکه‌ که‌ ها‌وڕێیانی موره‌ویجی ئێمه‌ ده‌بێت هه‌وڵ ده‌ن له‌گه‌ڵ خۆیاندا بیبه‌نه‌ نێو کرێکارانه‌وه‌.

هه‌روه‌ها تایبه‌تمه‌ندییه‌کانی خودی موره‌ویجیش گرنگن. پۆپۆلیزم هه‌ر وه‌کوو باوه‌، مه‌سه‌له‌ی ته‌رویج به‌ ڕووناكبیران و خوێندکاران ده‌سپێرێت. ڕووناکبیرانێك هه‌تا ئه‌گه‌ر مارکسیزمیان باشتریش خوێندبێته‌وه،‌ به‌ڵام سه‌باره‌ت به‌ ژیان و خه‌باتی عه‌مه‌لیی چینی کرێکار بۆچوون و تاقیکردنه‌وه‌یه‌کی زۆر که‌میان هه‌بوو. ئه‌م موره‌ویجانه‌ زۆر به‌که‌می توانیویانه‌ وه‌کوو پێویست بن و له‌ ڕووی تیۆریشه‌وه‌ خاوه‌ن نفوز بن. ته‌رویجی ئه‌وان زۆر به ‌که‌می په‌یوه‌ند بوو به‌ مه‌سه‌له‌ زیندووه‌کانی کرێکارانێك، که‌ له‌ ئه‌ڵقه‌کانی ئه‌واندا به‌شدارییان ده‌کرد. ئێمه‌ ده‌بێت موره‌ویجێك په‌روه‌رده‌ بکه‌ین، که‌ ئه‌م گیروگرفتانه‌یا‌ن نه‌بێت. ڕۆشنبیران ده‌توانن له‌ مه‌سه‌له‌ی ته‌رویجدا کاریگه‌ر بن، به‌ مه‌رجێك سه‌باره‌ت به‌ ژیان و خه‌باتی عه‌مه‌لیی کرێکاران هه‌ستیار بن، تێبینیی زۆر و تاقیکردنه‌وه‌ی به‌رجه‌سته‌یان له‌م ژیان و خه‌باته‌ و گۆشه‌ جیاوازه‌کانی هه‌بێت و سه‌ره‌ڕای ئه‌مانه‌ش له‌گه‌ڵ مه‌سه‌له ‌و سه‌رقاڵییه‌کانی کرێکارانی پێشڕه‌و به‌چاکی ئاشنا بن، به‌ڵام ده‌بێت بتوانین هه‌رچی زیاتر موره‌ویجینی خۆمان له‌نێو خودی کرێکارانی هۆشیار و به‌ئه‌زمووندا په‌روه‌رده‌ بکه‌ین. نه‌ك ته‌نها ئاگاداربوونی تیۆری، به‌ڵکوو هه‌روه‌ها پوختی عه‌مه‌لیی موره‌ویج بۆ سه‌رکه‌وتووبوونی پێویسته‌.

د. ئاماده‌بوون له ‌مه‌سه‌له‌ عه‌مه‌لییه‌کانی بزووتنه‌وه‌ی کرێکاری و داواکارییه‌کانی کرێکاران
هه‌ر ڕه‌وتێك که‌ هه‌ستیارێتی پێویست له‌به‌رامبه‌ر مه‌سه‌له‌ عه‌مه‌لییه‌کانی بزووتنه‌وه‌ی کرێکاری، داواکارییه‌کانی کرێکاران و ڕێگره‌کانی به‌رده‌م ناڕه‌زایه‌تییه‌ کرێکارییه‌کان نیشان نه‌دات، ناتوانێت په‌ره‌داربوونی نفوزی خۆی له‌نێو کرێکاراندا ببینێت. به‌شێك له‌م حه‌ساسییه‌ته‌ له ‌ڕێگه‌ی کرێکاریبوونه‌وه‌ی پێکهاتووی حیزب و هه‌روه‌ها کاریهه‌میشه‌یی شانه‌کان له‌نێو کرێکاراندا به‌ده‌ست دێت. به‌ڵام ئه‌مه‌ به‌ ته‌نها به‌س نییه‌. پێویسته‌ ئه‌م مه‌سه‌لانه‌ به‌ شێوه‌یه‌کی جیددی بدرێنه‌ به‌ر باس و لێکۆڵینه‌وه‌. ده‌بێت سه‌باره‌ت به ‌گشت مه‌سه‌له‌کانی بزووتنه‌وه‌ی کرێکاری هه‌ڵوێستی ورد و پشتبه‌ستوومان به‌ ئاگاداربوون و مه‌عریفه‌ی پێویسته‌وه‌ هه‌بێت. ده‌بێت وره‌ی کرێکاران و ئاره‌زوو و داواکارییه‌کانیان بناسین و له‌ نزیکه‌وه‌ له‌گه‌ڵ ئه‌و گیروگرفتانه‌ ئاشنا بین، که‌ ڕابه‌رێکی عه‌مه‌لی بۆ به‌گه‌ڕخستن و ڕێکخستنی کرێکاران دووچاری ده‌بێت. هه‌ر هاوڕێیه‌کی شانه‌یی ئێمه‌ له‌ کارگه‌ و گه‌ڕه‌ك، ده‌بێت توانای لێکۆڵینه‌وه ‌و شیکردنه‌وه‌ی مه‌سه‌له‌ کرێکارییه‌کان و ڕه‌خنه‌گرتن له‌ دیدگا و هه‌ڵوێسته‌ ئینحرافییه‌کانی هه‌بێت. هه‌ر هاوڕێیه‌کی ئێمه‌ ده‌بێت به‌ره‌به‌ره‌ ببێته‌ مه‌رجه‌عێکی خاوه‌ن نه‌زه‌ر بۆ لێکۆڵینه‌وه‌ی مه‌سه‌له‌کانی بزووتنه‌وه‌ی ناڕه‌زایه‌تی کرێکاران، هه‌ر له‌ مه‌سه‌له‌کانی وه‌ك قانوونی کار، مه‌سه‌له‌ی ته‌به‌قه‌به‌ندی، سوودوه‌رگرتن، سه‌لامه‌تی جێگای کار، کرێ، قازانجی تایبه‌تی، ئیمتییازات، هه‌لومه‌رجی کاری ژنان ... هتد. بگره‌ تا ئامار و ژماره‌ی تایبه‌ت به‌ ئاستی به‌رهه‌مهێنان، به‌کارخستن و که‌ڵه‌که‌بوونی کرێکاران ... هتد. له‌ کارگه‌کان و ناوچه‌ جیاوازه‌کاندا ده‌بێت به‌ جیددی ببێته‌ جێگه‌ی سه‌رقاڵیی هه‌ڵسووڕاوانی ئێمه‌.

٤) مه‌سه‌له‌ عه‌مه‌لی و ئه‌منییه‌تییه‌کان له‌ ڕێکخستنی ئاژیتاتۆره‌کاندا

ڕێکخستنی هه‌ڵسووڕانی نهێنی و پاڕاستنی به‌رده‌وامکاریی ڕێکخراوی نهێنیی حیزب له‌نێو کرێکاراندا، له‌ هه‌لومه‌رجی داپڵۆسێنه‌رانه‌ی ئێستادا (که‌ بۆ کۆمۆنیسته‌کان به‌ هه‌لومه‌رجی "ئاسایی" هه‌ڵسووڕان داده‌نرێت)، بۆ خۆی مه‌سه‌له‌یه‌کی ئاڵوز و ورده‌. جا ئه‌گه‌ر بێتوو ئاژیتاتۆره‌کان و ئه‌رکێك که‌ له‌ ڕێگه‌ی ئه‌وانه‌وه‌ ئه‌نجام ده‌درێت بۆ ئه‌م ڕێکخراوه‌ زیاد بکه‌ین، شتێکی ڕوونه‌، که‌ سه‌ختی و دژواری کاره‌که‌ چه‌ندین پله‌ زیاتر ده‌بێت. لێره‌دا ئیتر له‌گه‌ڵ ڕێکخراوێك به‌ره‌و ڕووین، که‌ به‌شێك له‌ ئه‌ندامه‌کانی به‌ شێوه‌یه‌کی ئاشکرا چالاکی ده‌نوێنن، جێگه‌ کاری "ڕۆتینی" ئه‌وان کۆڕ و کۆمه‌ڵه‌ تا ڕاده‌یه‌ك فراوانه‌ کرێکارییه‌کان، کۆبوونه‌وه‌ گشتییه‌کان، ڕیزی پێشه‌وه‌ی مانگرتنه‌کان و ناڕه‌زایه‌تییه‌کانه‌. شتێکی به‌ڵگه‌ نه‌ویسته‌ که‌ هاوڕێیانێکی ئاوا ده‌که‌ونه‌ ژێر زه‌ڕه‌بینی پۆلیسی سیاسییه‌وه‌. هه‌ر جم و جووڵێکی ئه‌وان به‌ وریایییه‌وه‌ له‌ لایه‌ن هێزه‌ جاسووسی و سه‌رکوتگه‌ره‌کانی پۆلیسه‌وه‌ ده‌خرێته‌ ژێر چاودێرییه‌وه‌. له‌م هه‌لومه‌رجه‌دا لاوازی و مه‌سه‌له‌ی جۆراوجۆرمان دێته‌ ڕێ. ڕاکێشانی ئاژیتاتۆره‌کان و لێكهه‌ڵپێکانی هه‌ڵسووڕانی نهێنی شانه‌ حیزبییه‌کان له‌گه‌ڵ هه‌ڵسووڕانی ئاشکرای حیزبی، که‌ به‌گشتی له‌ده‌وری ته‌وه‌ره‌ی ئاژیتاتۆره‌کان پێك دێت، پێویستی به‌وپه‌ڕی ئاماده‌یی، هۆشیاریی هه‌میشه‌یی و پێش هه‌موو شتێکیش پێویستی به‌ یه‌ك شێوه‌کاری ئوسوڵی و جێگرتووی کاری کۆمۆنیستی هه‌یه‌. ئه‌مه‌ش له‌ حاڵه‌تێكدا که‌ ئێمه‌ هه‌لومه‌رجێکمان له‌پێش خۆ داناوه‌، که‌ تیایدا ئاژیتاتۆره‌کان توخمی حیزبی و ئه‌ندامی فه‌رمیی حیزبن، خاوه‌ن ئه‌زموونن، شێوه‌کانی خه‌بات له‌گه‌ڵ پۆلیسی سیاسی و پاڕاستنی ئه‌منییه‌تی و به‌رده‌وامکاری ڕێکخراو فێربوون. له‌ پرۆسه‌ی ڕاکێشانی ئاژیتاتۆره‌کاندا، له‌و جێگه‌یه‌دا که‌ ئاژیتاتۆره‌کان هێشتا سه‌رده‌می گوێزانه‌وه‌ی په‌یوه‌ستبوون به‌ حیزبه‌وه‌ ده‌به‌نه‌سه‌ر، کاره‌که‌ له‌مه‌ش دژوارتر ده‌بێت.

بۆ ئاسانکردنی باسه‌که‌ چاکتر وایه‌ له‌ سه‌ره‌تاوه‌ بچینه‌ سه‌ر گیروگرفت و ڕێگره‌کانی هه‌مان حاڵه‌تی یه‌که‌م، یانی حاڵه‌تێك که‌ قۆناغی ڕاکێشان ته‌واو بووه‌ و ئاژیتاتۆر بووه‌ته‌ به‌شێك له‌ خودی ڕێکخراوی حیزب و دواتر بچینه‌ سه‌ر تایبه‌تمه‌ندییه‌کان و گیروگرفته‌ تایبه‌تییه‌کانی سه‌رده‌می گواستنه‌وه‌. چۆنکه‌ به‌ تێگه‌یشتنی ڕاست له‌م مه‌سه‌له‌یه‌ له‌ شکڵی کۆتایی خۆیدا، تێگه‌یشتنی تایبه‌تمه‌ندییه‌کانی پرۆسه‌یه‌ك که‌ ده‌بێت بمان گه‌یه‌نێته‌ حاڵه‌تی کۆتایی، ساده‌تر ده‌بێته‌وه‌. گیروگرفته‌کان و ناله‌بارییه‌کانی کاره‌که‌مان کامانه‌ن؟

ئه‌لیف. په‌یوه‌ندیی ئاژیتاتۆر له‌گه‌ڵ ڕێکخراوی نهێنیی حیزبیدا
له ‌ڕاستیدا ئه‌مه‌ بنه‌مای هه‌موو مه‌سه‌له‌کانی تره‌ و هه‌ر کار و کاردانه‌وه‌یه‌ك له‌ مه‌سه‌له‌ی فێربوون، گواستنه‌وه‌ی تاقیکردنه‌وه‌، ڕێنماییکردن و کۆنتڕۆڵ، به‌شداری ئاژیتاتۆر (وه‌ك ئه‌ندامی حیزب) له‌ ژیانی ڕێکخراو ... هتد. پێویستی به‌ په‌یوه‌ندییه‌کی ڕێكوپێك و پته‌وی ئاژیتاتۆره‌کان له‌گه‌ڵ شانه‌ نهێنییه‌کاندا هه‌یه. چۆن ده‌توانرێت ئه‌م په‌یوه‌ندییه‌ به‌ دروستی دابمه‌زرێت؟ چۆن شانه‌ی حیزبی ده‌توانێت له‌گه‌ڵ هاوڕێی ئاژیتاتۆردا، که‌ یه‌ك ڕابه‌ری عه‌مه‌لیی کرێکارانه‌، که‌م تا زۆر وه‌ك که‌سێکی "ناڕازی"ی خه‌باتکار و ته‌نانه‌ت "چه‌پڕه‌و" له‌ لایه‌ن پۆلیسی سیاسییه‌وه‌ ناسراوه‌، به‌ شێوه‌یه‌کی ڕێكوپێك په‌یوه‌ندی هه‌بێت بێ ئه‌وه‌ی، که‌ ئه‌منییه‌تی ڕێکخراوه‌ی نهێنی و ئاژیتاتۆر هه‌ردووکیان بکه‌ونه‌ مه‌ترسییه‌وه‌.

ب. ڕێنمایی ئاژیتاتۆر و کونتڕۆڵ و چاودێریکردنی کاره‌کان
کاری ڕۆتینیی ئاژیتاتۆر، ته‌بلیغ و ئارایشدانی کرێکارانه‌ (جا ئیتر بۆ ئاکسیۆن، یان بۆ ڕێکخستنیان له‌ شکڵه‌ جۆراوجۆره‌کاندا بێت). ئه‌م کاره‌ ده‌بێت به‌ شێوه‌یه‌کی ئاسایی له‌ژێر ڕابه‌رایه‌تی ڕێکخراوی نهێنیی حیزبیدا ئه‌نجام بدرێت. به‌ڵام چۆن؟ چۆن ڕێکخراوی نهێنی، هه‌ڵسووڕانی که‌سی عه‌له‌نیکار له‌ کاتی ڕوودانی مانگرتن، ڕێکخستنی کۆبوونه‌وه‌ی گشتی، وه‌ یان له‌ کاتی هه‌ڵگیرسانی ناڕه‌زایه‌تیی دیاریکراوی کرێکاراندا ڕابه‌رایه‌تیی ده‌کات؟ یه‌کێك له‌ تایبه‌تمه‌ندییه‌ بنه‌ڕه‌تییه‌کانی کاری موبه‌لیغێکی جه‌ماوه‌ری و ڕابه‌ری عه‌مه‌لیی کرێکاران بریتییه‌ له‌وه‌ی، که‌ له‌ ماوه‌یه‌کی که‌مدا ناچاری بڕیاردانێکی زۆره‌ له‌ به‌رامبه‌ر مه‌سه‌له‌ گرنگه‌کاندا (بۆ نموونه‌، ئایا مانگرتن ده‌بێت به‌رده‌وام بێت، ئایا بڕیاری خاوه‌نکار ده‌بێت قبووڵ بکرێت، ئایا ده‌بێت شێوه‌ی ته‌بلیغی خۆی، که‌مێك بگۆڕێ، ئایا وره‌ی کرێکارانی به‌ چاکی ده‌ستنیشان کردووه‌ ...). ئاژیتاتۆر له‌ هه‌لومه‌رجێکی ئاوادا پێویستی به‌ پرس و ڕا و ڕێنمایی هه‌یه‌. ڕێکخراوی نهێنی چۆن ئه‌م پێویستییه‌ جێبه‌جێ ده‌کات؟ هه‌رچی مه‌ودای سه‌رکوت توندتر بێته‌وه‌، ئه‌م گیروگرفته‌ به‌ شێوه‌یه‌کی توندوتیژتر ده‌رده‌که‌وێت.

ج. فێرکردنی سیاسی ڕێكوپێكی ئاژیتاتۆر
ئاژیتاتۆر ده‌بێت به‌ ئاسانی ده‌ستی به‌ بڵاوکراوه‌کانی حیزب بگات. ده‌بێت بتوانێت کتێب و نامیلکه‌ی پێویست بخوێنێته‌وه‌. ده‌بێت بتوانێت له‌ دانیشتنه‌ فێرکاریییه‌کاندا به‌شداری بکات. له‌ هه‌مان کاتدا وه‌كوو که‌سێك که‌ دوژمن به‌رامبه‌ر به‌و هه‌ستیاره‌‌، ده‌بێت په‌روه‌نده‌که‌ی پاك بێت. به‌ڵگه‌نامه‌ و نووسین له‌گه‌ڵ خۆیدا هه‌ڵنه‌گرێت و له ‌ماڵه‌وه‌ی دانه‌نێت، په‌یوه‌ندییه‌ ڕێکخراوه‌یییه‌کانی قابیلی شوێنهه‌لگرتن نه‌بن ... هتد. ئه‌م پێداویستییه‌ی ئاژیتاتۆر چۆن دێته‌ دی؟

د. به‌شداری ئاژیتاتۆر له‌ هه‌ڵسووڕانی ناوخۆی حیزبیدا
ئاژیتاتۆر وه‌ك ئه‌ندامی حیزب ده‌بێت ڕاپۆرت بنێرێت، له‌ باسه‌کانی ناوخۆی حیزبدا به‌شداری بکات، له‌ هه‌ڵبژاردنه‌ حیزبییه‌کاندا ڕای خۆی بدات، بیروڕای خۆی له‌سه‌ر بڕیاره‌ به‌کۆمه‌ڵه‌‌کان بدات و ده‌یان کاری "نێوحیزبی" له‌م چه‌شنه‌. چۆن ده‌توانرێت ڕابه‌رێکی عه‌مه‌لی و ناسراو له‌ په‌یوه‌ندییه‌کی ئاوادا ڕابگرین بێ ئه‌وه‌ی که‌ یه‌که‌م، ئه‌منییه‌تی ڕێکخراوی نهێنی به‌ شێوه‌یه‌کی ڕاسته‌وخۆ بخرێته‌ به‌ر مه‌ترسی و دووه‌م، ئاگاداری ئه‌و له‌ شوێنه‌کان و که‌سه‌حیزبییه‌کان له‌ ڕاده‌یه‌کی پێویست واوه‌تر نه‌چێت و سێیه‌م، مه‌وقیعه‌تی خودی ئه‌و له‌ کاتی زه‌ربه‌خواردنی که‌سی تری ناو شانه،‌ یان که‌سانی ئاستێکی تری ڕێکخراو لاواز نه‌بێت و کاره‌که‌شی نه‌وه‌ستێت؟

ئه‌مانه‌ کۆمه‌ڵه‌ پێویستییه‌کی بنه‌ڕه‌تین، که‌ ده‌بێت به‌ جدی بهێنرێنه‌دی. ده‌توانین چه‌ند هۆکاری تر بخه‌ینه‌ سه‌ر ئه‌مانه‌. ئاژیتاتۆر ته‌نانه‌ت کاتێك په‌یوه‌ندییه‌ حیزبییه‌که‌ی به‌ ته‌واوه‌تی شاراوه‌ بمێنێته‌وه،‌ هه‌میشه‌ به‌ هۆی هه‌ڵسووڕانی خۆیه‌وه‌ وه‌ك پێشڕه‌وی کرێکاران له‌ مه‌ترسی سزادان، ده‌رکردن و گرتندایه‌. مه‌سه‌له‌کانی ئه‌و وه‌ك نانپه‌یداکه‌ری خیزانێکی کرێکاری ئیتر مه‌سه‌له‌ی تایبه‌تی ئه‌و نییه‌، به‌ڵکوو یه‌ك مه‌سه‌له‌ی حیزبییه‌. هه‌روه‌ها له ‌کاتی ده‌رکه‌وتنی مه‌ترسیی ئه‌منییه‌تیدا، ئاژیتاتۆر ده‌بێت بشاردرێته‌وه‌. فه‌راهه‌مکردنی ئیمکاناتی پێویست له‌م مه‌یدانه‌شدا یه‌ك ئه‌رکی ڕێکخراوی حیزبییه‌. وه‌ مه‌سه‌له‌ی تری له‌م چه‌شنه‌.

به‌ڵام وه‌ڵام چییه‌؟ ئاشکرایه‌ که‌ تاکه‌ وه‌ڵامێك سه‌ربه‌خۆ له‌ کات و شوێن و هه‌لومه‌رجی تایبه‌تیی سیاسی و ئه‌منییه‌تی هه‌ر سه‌رده‌مه‌ له‌ ئارادا نییه‌. ده‌توانرێت سه‌رده‌میکی وا بهێنرێته‌ به‌رچاو، که‌ چڵه‌پۆپه‌ی هه‌ڵچوونی شۆڕشگێڕانه‌یه،‌ ئاژیتاتۆر وه‌ك ئه‌ندامی حیزب، ڕابه‌ری شوورای کارگه‌، نوێنه‌ری کرێکاران ... هتد. بێت و وه‌ك هه‌ر ئه‌ندامێکی تری حیزبیش هاتوچۆی جێگا حیزبییه‌کان بکات، خۆی یه‌کسه‌ر له‌ دانیشتنه‌کانی شانه‌ی ڕێکخراوی خۆیدا به‌شداری بکات، یان لایه‌نگریی خۆی بۆ حیزبی کۆمۆنیست به‌ فه‌رمی له‌سه‌ر ئاستی کۆمه‌ڵگه‌ و بۆ جه‌ماوه‌ری فراوانی کرێکاران ڕابگه‌یه‌نێت و له‌ کۆبوونه‌وه‌ حیزبییه‌کاندا قسه‌که‌ری فه‌رمی بێت. به‌ڵام به‌ ڕاستی ئێمه‌ له‌ قۆناغێکی تر داین، له‌نێو سه‌رکوتی توند و که‌موێنه‌ له‌ مێژووی خه‌باتی کرێکاری و کۆمۆنیستی له‌ سه‌راسه‌ری جیهاندا. لێره‌دا ده‌بێت شێوه‌کار و میکانیزمی تایبه‌تی به‌ده‌ست بهێنین. باسه‌که‌ی ئێمه‌ش ئه‌گه‌ر بیه‌وێت ببێته‌ ڕێنمایییه‌ك بۆ شانه‌کانمان له‌ هه‌لومه‌رجی ئێستادا، ده‌بێت هه‌لومه‌رجی ئه‌مڕۆ بکاته‌ بنه‌ما.

‌پێش ئه‌وه‌ی بچینه‌ سه‌ر شێوازی تایبه‌تیی ڕێکخستنی ئاژیتاتۆر و په‌یوه‌ندی و کار و کاردانه‌وه‌ی به‌رامبه‌ریه‌کی ڕێکخراوی نهێنی له‌گه‌ڵ هاوڕێی عه‌له‌نیکاری حیزب، ده‌بێت په‌نجه‌ بۆ چه‌ند هۆکاری بنه‌ڕه‌تی و گرنگ ڕابکێشین، که‌ هه‌ر جۆره‌ ڕێکخستنێك ده‌بێت به‌ پشتبه‌ستن پێیانه‌وه‌ بێته‌ دی.

یه‌که‌م، ده‌بێت په‌نجه‌ بۆ گرنگیی "په‌یوه‌ندییه‌ سروشتییه‌کان" له‌نێو کرێکاراندا ڕابکێشین. ئه‌مه‌ شتێکه‌ که‌ ورده‌بۆرژوازی به‌ "که‌ژاوه‌سازی" ناوی ده‌بات. بۆ ئێمه‌ په‌یوه‌ندیی سروشتی، دۆستایه‌تی و ناسیاوی و هاتوچۆی سروشتی نێوان کرێکاران، شتێکی زۆر زیاتره‌ له‌مه‌. ئه‌مانه‌ میکانیزمه‌ واقیعییه‌کانی کار و کاردانه‌وه‌ی نێوخۆی چینه‌که‌ بن، وه‌ به‌م مانایه‌ به‌شێکیشن له‌ میکانیزمه‌ عه‌مه‌لییه‌کانی هه‌ڵسووڕانی ئێمه‌ کۆمۆنیسته‌کان وه‌ك به‌شێك له‌ چینه‌که‌. ده‌بێت گرنگی ته‌واو به‌م په‌یوه‌ندییانه‌ بده‌ین. کۆڕ و کۆمه‌ڵه‌ خانه‌واده‌یییه‌کان، دۆستایه‌تییه‌کان، په‌یوه‌ندیی کارکردن، ناسیاوه‌کانی گه‌ڕه‌ك ... هتد. یه‌کێك له‌ بار و دۆخه‌ واقیعییه‌کانی هه‌ڵسووڕانی خودی خۆمانه‌، به ‌ڕاده‌یه‌ك که‌ هه‌ڵسوڕاوانی حیزب ئه‌م په‌یوه‌ندییانه‌ی خۆیان په‌ره‌پێ دابێت. له‌م په‌یوه‌ندییانه‌دا جێگرتوو بن و خۆیان بوون به‌ کرێکارانێکی "کۆمه‌ڵایه‌تی"، که‌ په‌یوه‌ندیی فراوانیان له‌گه‌ڵ هاوچینه‌کانی خۆیان هه‌یه‌، کاری ڕێکخستنی هه‌ڵسووڕانی نهێنی و ئاشکرا هه‌ردوو، به‌ شێوه‌یه‌کی ئاسانتر ده‌چنه‌ پێشێ. ده‌توانرێت زۆر له‌ په‌یوه‌ندییه‌کان، ده‌رسه‌کان، هه‌واڵهێنانه‌کان و ڕێنمایییه‌کان له‌نێو دڵی هه‌مان "په‌یوه‌ندییه‌ سروشتییه‌کاندا" ببرێنه‌ پێشه‌وه‌.

دووه‌م، مه‌سه‌له‌ی گه‌شه‌ی ئاستی هۆشیاریی سیاسیی کرێکاران و زیادبوونی خۆشه‌ویستیی گشتیی حیزب له‌نێویاندایه‌. پێشتریش سه‌باره‌ت به‌ ده‌وره‌دانی شانه‌ حیزبییه‌کان به‌ توێژێکی فراوان له‌ کرێکارانی هه‌واداری حیزب قسه‌مان کردووه‌، به‌و ‌ڕاده‌یه‌ی که‌ خۆشه‌ویستی‌ بۆ‌ حیزبی کۆمۆنیست،‌ قسه‌کردن ده‌رباره‌ی، پشتگیریکردن لێی ته‌نانه‌ت به‌ قسه‌ش، گوێگرتن له‌ ڕادیۆکه‌ی، گه‌ڕان به‌دوای بڵاوکراوه‌کانیدا، له‌نێو کرێکاراندا زیادی کردبێت، به‌ هه‌مان ڕاده‌ش‌ ڕێکخستنی تۆڕی به‌ڕاستی حیزبی، چ نهێنی و چ ئاشکرا ئاسانتر ده‌بێته‌وه‌. به‌و ‌ڕاده‌یه‌ی که‌ کرێکارانی ناڕازی زیاد بکه‌ن، کرێکارانی ناڕازیی کۆمۆنیست ده‌بنه‌ خاوه‌نی مه‌وقیعه‌تێکی عه‌مه‌لیی پته‌وتر. به‌ ڕاده‌یه‌ك که‌ هه‌ر ناڕازییه‌ك قسه‌ به‌پێی درووشمه‌کان و شێوازه‌کانی ئێمه‌ بکات، ئاژیتاتۆری فه‌رمی و ڕێکخراوی حیزبی له‌ فراوانکردنی لایه‌نه‌کان و پته‌وکردنی ئه‌منییه‌تی هه‌ڵسووڕانی خۆیدا سه‌رکه‌وتووتر ده‌بێت. به‌م پێیه‌ پته‌وکردنی په‌یوه‌ندیی کاری نهێنی و ئاشکرا، په‌یوه‌ندیی شانه‌کان و ئاژیتاتۆره‌کان خۆی تا ڕاده‌یه‌کی زۆر پشتی به‌ هه‌ڵسووڕانی ڕۆتینی هاوڕێیانی ئێمه‌ له‌ بڵاوکردنه‌وه‌ی بڕواکان و سیاسه‌ته‌کانی حیزب و بردنه‌ سه‌ره‌وه‌ی ئاستی هۆشیاریی سیاسیی گشتیی کرێکاران به‌ستووه.

سێیه‌م، مه‌سه‌له‌ی ئاماده‌یی و لێهاتوویی سیاسیی ڕێکخراوه‌یی و عه‌مه‌لیی خودی شانه‌کانه‌ بۆ ڕاکێشانی ڕابه‌رێکی عه‌مه‌لیی کرێکاری و بۆ ڕێکخستنی وه‌ك یه‌ك ئاژیتاتۆری حیزبی، که‌ هه‌مان ئه‌رکی ڕابه‌ری به‌ شێوه‌ی کۆمۆنیستی و له‌ژێر ئامانج و پێودانگ و دیسپلینی حیزبیدا ئه‌نجام ده‌دات، ڕێکخراوی نهێنیی ئێمه‌ (لێره‌دا مه‌به‌ستمان شانه‌کانه‌) ده‌بێت توانستی سه‌ره‌تایی به‌ده‌ست هێنابێت. هه‌موو شانه‌یه‌ك توانای ئه‌م جۆره‌ ڕێکخستنه‌ی نییه‌. شانه‌ ده‌بێت له‌ڕووی سیاسییه‌وه‌ ئاستێکی به‌رزی هه‌بێت و توانای ته‌رویجی با‌شی له‌خۆدا چڕ کردبێته‌وه‌ و به‌ باشی ئاگای له‌ مه‌سه‌له‌ عه‌مه‌لییه‌کانی بزووتنه‌وه‌ی کرێکاری و داواکارییه‌کانی کرێکاران بێت. شانه‌ ده‌بێت تا ڕاده‌یه‌کی دیاریکراو له‌ مه‌سه‌له‌ی ڕێکخستنی ئه‌ڵقه‌ ته‌رویجییه‌کان، دابه‌شکردنی بڵاوکراوه‌کانی حیزب، فێرکردن و په‌روه‌رده‌ی کرێکاران و به‌ کورتی له‌ ڕێکخستن و ئه‌نجامدانی ئه‌و ئه‌رکه‌ ئاسایییانه‌ی که‌ له‌ نامیلکه‌ی "ئه‌رکه‌کانی شانه‌ حیزبییه‌کان"دا هاتووه‌ به‌ره‌و پێش چوو بێت، له‌ڕووی ئه‌منییه‌تییه‌وه‌ په‌یوه‌ندییه‌کانی خۆی به‌ ته‌واوی پته‌و کردبێت و له‌ڕووی چه‌ندایه‌تیی هێزه‌وه‌ به‌ ڕاده‌یه‌کی پێویست گه‌شه‌ی کردبێت. دابینکردنی پێداویستییه‌کان، پاراستنی په‌یوه‌ندی، ڕابه‌ری و ڕێکخستنی ئاژیتاتۆر خۆی پێویستی به‌ ته‌رخانکردنی وزه‌یه‌کی زۆره‌. شانه‌ ده‌بێت ئه‌و توانایییه‌ی هه‌بێت که‌ ئاژیتاتۆر له‌ خزمه‌تی حیزبدا هه‌ڵسووڕاو بکات، نه‌وه‌ك خۆی له‌ڕێگه‌ی کۆمه‌ڵه‌ مه‌سه‌له‌یه‌که‌وه‌، که‌ له‌ لایه‌ن ئاژیتاتۆره‌وه‌ بۆ ئه‌و دێته‌ پێش، قووت بدرێت و له‌ ئه‌نجامدانی ئه‌رکه‌ بنه‌ڕه‌تییه‌کانی خۆیشی بێته‌ دواوه‌ ... ڕۆشنه‌ که‌ ته‌نانه‌ت شانه‌ لاوازه‌کانیش ناتوانن و نابێت سه‌باره‌ت به‌ ڕابه‌رانی عه‌مه‌لیی کرێکاری، که‌ له‌ده‌وروبه‌ری هه‌ڵسووڕانی خۆیاندا له‌گه‌ڵ ئه‌وان له‌ په‌یوه‌ندیدان بێلایه‌ن بن و گوێیان نه‌ده‌نێ. به‌ڵام ده‌بێت ئه‌وه‌ بزانن که‌ په‌یوه‌ندی له‌گه‌ڵ ئه‌م ده‌سته‌یه‌ له‌ کرێکاران و ئه‌نجامدانی ئه‌رکی ڕۆتینیی حیزبی له‌ په‌یوه‌ند له‌گه‌ڵیاندا، تا ڕێکخستنی ئه‌وان وه‌ك یه‌ك موبه‌لیغی جه‌ماوه‌ریی حیزبی، ڕێگه‌یه‌کی دوور و درێژه‌. به‌ڵام هه‌ر چۆنێك بێت ئه‌مه‌ ڕێگه‌یه‌که‌، که‌ هه‌ر شانه‌یه‌کی حیزبی له‌ به‌رده‌وامیی هه‌وڵ و ته‌قه‌لای سه‌رکه‌وتووانه‌ی خۆی له‌ ڕێکخستنی سه‌ره‌تایی خۆیدا، دره‌نگ یان زوو هه‌نگاوی تیا هه‌ڵدێنێته‌وه‌.

  بـه‌شى یه‌که‌م     به‌شی دووه‌م     به‌شی سێیه‌م

شانه‌ حیزبییه‌کان و ئاکسیۆنه‌ کرێکارییه‌کان

ده‌رباره‌ی گرنگیی ئاژیتاتۆر و ئاژیتاسیۆنی ئاشکرا

به‌شی سێیه‌م

له‌ به‌شه‌کانی پێشوودا تا ڕاده‌یه‌ك به‌ درێژی له‌ ڕوونکردنه‌وه‌ی گرنگیی ئاژیتاتۆری کۆمۆنیست له‌ ڕوانگه‌ی پێکه‌وه‌گرێدانی کاری نهێنی و ئاشکرا له‌ هه‌ڵسووڕانی ڕۆتینی حیزب، ڕێکخستن و ڕێنمایی ئاکسیۆنه‌کان و کاریگه‌رییان له‌سه‌ر جه‌ماوه‌ری کرێکاران دواین. له‌ کۆتایی به‌شی دووه‌مدا ئاماژه‌مان به‌ به‌یه‌ك زنجیره‌ پرسیاری عه‌مه‌لیی گرنگ له‌ مه‌یدانی ڕێکخستنی ئاژیتاتۆر و په‌یوه‌ندیی عه‌مه‌لی ئه‌و له‌گه‌ڵ شانه‌ و ڕێکخراوی حیزبدا کرد. سه‌رخه‌تی گشتی پرسیاره‌کان ئه‌مانه‌بوون: په‌یوه‌ندیی ئاژیتاتۆر له‌گه‌ڵ شانه‌ی نهێنی چۆن ده‌بێ پێك بێت و بپارێزرێت؟ ڕێنمایی عه‌مه‌لی و کونتڕۆڵی هه‌ڵسووڕانی ئاژیتاتۆر چۆن ده‌بێ له‌ لایه‌ن ڕێکخراوی نهێنییه‌وه‌ ئه‌نجام بدرێت؟ فێرکردن و بارهێنانی ڕێك و پێکی ئاژیتاتۆری عه‌له‌نیکار له‌ لایه‌ن ڕێکخراوی نهێنییه‌وه‌ چۆن دابین ده‌کرێ؟ ئاژیتاتۆر چۆن له‌ ژیانی ناوخۆی یه‌ك حیزبی نهێنیدا ده‌خاڵه‌ت و به‌شداری ده‌کات و له‌ دواییدا مه‌سه‌له‌کانی گوزه‌ران و ئه‌منییه‌تی ئاژیتاتۆر چۆن چاره‌سه‌ر ده‌کرێ؟

لێره‌دا له‌ کۆتایی باسه‌که‌دا پێویسته‌ به‌ پێی توانا چه‌ند خاڵێك له‌ پێناو وه‌ڵامدانه‌وه‌ به‌م مه‌سه‌له‌ عه‌مه‌لییانه‌، به‌ له‌به‌رچاوگرتنی بار و دۆخی سه‌رکوتگه‌رانه‌ی ئێستاوه‌ بخه‌ینه‌ ڕوو. ئاشکرایه‌ ئه‌وه‌ی که‌ لێره‌دا وه‌کوو "ڕێگاچاره‌"، یان ئه‌و ڕێگاچاره‌ ڕێژه‌یییانه‌ی ناوی ده‌هێنێن دۆگمی نه‌گوڕاو نین. هه‌م گۆڕانی ڕۆژگار و هه‌م که‌ڵه‌که‌ی ئه‌زموون‌ و په‌ره‌گرتنی ئیمکانات، شێوه‌کانی عه‌مه‌لیی ڕێکخستن و هه‌ڵسووڕانی ئاژیتاتۆری عه‌له‌نی له‌ په‌یوه‌ست به‌ ڕێکخراوی نهێنییه‌وه‌ ده‌خاته‌ ژێر کاریگه‌ری خۆیه‌وه‌. به‌ڵام به‌ هه‌ر شێوه‌یه‌ك بێ ئه‌وه‌ی که‌ لێره‌دا ده‌ووترێ، ده‌توانرێ له‌ده‌وره‌ی ئێستادا ئه‌لگۆی سه‌ره‌تایی و که‌م تا زۆر قابیلی ته‌عمیم بۆ هه‌ڵسووڕانی ئێمه‌ له‌م زه‌مینه‌یه‌دا بێت. شایانی باسه‌ ئه‌وه‌ بڵێین که‌ به‌و هۆیه‌وه‌‌ی وتاره‌که‌ کراوه‌ به‌ سێ به‌شه‌وه‌، ‌له‌ هه‌ر به‌شێکدا هێندێك خاڵ هه‌ن به‌ ناچاری به‌ مه‌به‌ستی زیندووهێشتنه‌وه‌ی زه‌مینه‌ی گشتیی باسه‌که دووباره‌ ده‌بنه‌وه‌‌.

١) کار له‌گه‌ڵ ڕابه‌رانی مه‌وجود

له‌ پێشه‌وه‌ گوتمان کرێکارانێك که‌ ئێمه‌ ده‌مانه‌وێ بۆ په‌روه‌رده‌کردنی ئاژیتاتۆره‌ کۆمۆنیستییه‌کان کاریان له‌سه‌ر بکه‌ین، ده‌توانرێ به‌ گشتی و به‌ شێوه‌یه‌کی ڕێژه‌یی به‌ دوو ده‌سته‌ دابه‌ش بکرێن: یه‌که‌م، ڕابه‌رانی به‌کرده‌وه‌ مه‌وجود له‌ بزووتنه‌وه‌ ناڕه‌زایه‌تییه‌ کرێکارییه‌کاندا، واتا کرێکارانێکی خه‌باتگێڕ که‌ هه‌ر ئێستا خاوه‌ن نفوزی عه‌مه‌لیی جیددین له‌نێو جه‌ماوه‌ری کرێکاران له‌ یه‌که‌ کرێکارییه‌کاندا. دووه‌م، خاوه‌ن ئاماده‌یییه‌کان، که‌ له‌ حاڵه‌تی شکڵگرتندان و کرێکارانێکی ناڕه‌زا، جوامێر و هۆشیاری تازه‌ که‌ دێنه‌ مه‌یدانی ڕابه‌رییه‌وه‌.

کار له‌گه‌ڵ ڕابه‌رانی مه‌وجود خاوه‌نی تایبه‌تمه‌ندیی خۆیه‌تی. خۆ له ‌ڕێکخراو دزینه‌وه‌، ده‌رکی ناڕۆشنیان له‌ ئامانجه‌کان و ڕه‌وشته‌کانی حیزبی کۆمۆنیست، که‌ به‌رهه‌می ته‌حریفاتی ڕیڤیژینیستی له‌ کۆمۆنیزم و لاوازییه‌کانی دامێنی هه‌ڵسووڕانی تا ئێستای حیزبمان، محافه‌زه‌کاری ئه‌منییه‌تی له‌ په‌یوه‌ند به‌ ڕێکخستنی نهێنی و ته‌وه‌هوماتی ئیکۆنۆمیستی و سه‌ندیکالیستی، ئه‌مانه‌ لایه‌نه‌ سه‌ره‌کییه‌کانی ئه‌و ڕێگرییانه‌یه‌، که‌ په‌یوه‌ستبوونی ئه‌م کرێکارانه‌ به‌ ڕیزه‌کانی حیزبه‌وه‌ دژوار ده‌کات. له‌به‌رامبه‌ردا ئه‌زموونی زۆر، ناسینی میکانیزمه‌کانی کاری ئاشکرا له‌نێو کرێکاران و خۆپاڕاستن له‌به‌رامبه‌ر گوشاری سه‌رکوت و جم و جووڵی به‌کرێگیراوانی بۆرژوازی، ده‌رکی خێرای مه‌وقیعه‌ت و وره‌ی کرێکاران، چه‌ند خاڵێکی پۆزه‌تیڤن، که‌ ئه‌م کرێکارانه‌ لێی به‌هره‌مه‌ندن و له‌ حاڵه‌تی ڕووهێنانیان بۆ مارکسیزمی شۆڕشگێڕ و یه‌كگرتنیان له‌ حیزبی ئێمه‌دا، ئه‌وان ده‌کاته‌ ئۆرگانی به‌هێزی به‌ره‌و پێشبردنی سیاسه‌تی کۆمۆنیستی له‌نێو کرێکاراندا.

سه‌رده‌می ڕاکێشانی ئه‌م هاوڕێیانه‌ به‌ گشتی سه‌رده‌مێکه‌، که‌ ئه‌وانه‌ په‌ی به‌ گرنگی کارکردن له‌گه‌ڵ حیزبی کۆمۆنیستدا ده‌به‌ن و وه‌ڵام به‌ پێویستیی گیرسانه‌وه‌ی خۆیان له‌ ڕیزه‌کانی ڕێکخراوی حیزبدا ده‌ده‌نه‌وه‌. ته‌وه‌ره‌ی ئه‌م سه‌رده‌مه‌ی ڕاکێشان، ماناپێدانی کۆمۆنیزمه‌ له‌ دیدگای ئێمه‌وه‌ و ڕوونکردنه‌وه‌ و فێرکردنی شێوه‌کاره‌کان و ئامانجه‌ کۆمۆنیستییه‌کانه‌. ئه‌گه‌ر ڕه‌خنه‌ له‌ بیروباوه‌ڕه‌ نادروسته‌کان ڕۆڵی حه‌یاتیی هه‌یه‌، فێرکردنی شێوه‌کاره‌ تایبه‌تییه‌کانی ئێمه‌ش به‌ هه‌مان ڕاده‌ حه‌یاتییه‌. هه‌ر بۆیه‌ هاوڕێیانێك که‌ لێپرسراوێتی ڕاکێشانی ڕابه‌ری کرێکارییان به‌ره‌و حیزب له‌ ئه‌ستۆیه‌، ده‌بێ له‌ باشترین موره‌ویجه‌کانی ئێمه‌ بن. په‌یوه‌ندی ئه‌م هاوڕێیانه‌ به‌م کرێکاره‌ پێشڕه‌وانه‌وه‌ هه‌ر له ‌سه‌ره‌تاوه‌ ده‌بێ له‌ چوارچێوه‌یه‌کی ئه‌منییه‌تی باڵادا پێك بێت. قه‌رارگرتنی ئه‌م پرۆسه‌یه‌ له‌ دڵی په‌یوه‌ندییه‌کی سروشتیدا، سپاردنی به‌ره‌وپێشبردنی ئه‌م په‌یوه‌ندییه‌ به‌ یه‌ك که‌س و که‌مکردنه‌وه‌ی زانیاریی هاوڕێیانی تری کۆمیته‌، یان شانه‌ی نهێنی حیزب له‌ پێناس و مه‌یدانی کار و هه‌ڵسووڕانی ئه‌م هاوڕێ کرێکارانه‌ بۆ که‌مترین ڕاده‌ی مومکین، مه‌رجی پێویستی پاڕاستنی ئاسایشی هه‌ردوو لای شانه ‌و ئه‌و هاوڕێ کرێکارانه‌یه‌.

له‌ ڕاپۆرتنووسین بۆ ئۆرگانه‌کانی سه‌ره‌وه‌ی حیزب، سه‌باره‌ت به‌ شێوه‌ی پێشکه‌وتنی ئه‌م په‌یوه‌ندییه‌ کرێکارییه‌، ده‌بێ لانی زۆری دیقه‌ت له‌ کاردا هه‌بێ، که‌ له‌ ڕێگه‌ی به‌رته‌سكکردنه‌وه‌ی زانیاریی ئه‌منییه‌تی نێو ڕاپۆرته‌کان و به‌ که‌ڵكوه‌رگرتنی جیددی له‌ باشترین هێما بۆ هێنان و بردنی هه‌واڵه‌کان، ئه‌منییه‌تی کرێکارانێك که‌ له‌گه‌ڵ ئه‌واندا په‌یوه‌ندیمان هه‌یه‌، ته‌نانه‌ت له‌و حاڵه‌ته‌شدا، که‌ ڕاپۆرته‌کان بکه‌ونه‌ ده‌ستی به‌کرێگیراوانی دوژمن هه‌ر پارێزراو بێت. ده‌بێ کارێك بکرێ که‌ مه‌ترسی ئه‌منییه‌تی په‌یوه‌ستبوون به‌ حیزبی کۆمۆنیسته‌وه‌ بۆ کرێکارانی پێشڕه‌و، ئه‌وه‌نده‌ی ده‌کرێ که‌م بکرێته‌وه‌ و ئه‌م هه‌وڵه‌ی خۆمان بۆ کرێکارانێك که‌ مه‌به‌ستمانه‌ ڕوون بکرێته‌وه‌. فیداکاری له‌ بردنه‌پێشه‌وه‌ی ئه‌رکی کۆمۆنیزم و حیزبی کۆمۆنیست بۆ ئه‌ندامانی حیزب فه‌رزه‌، به‌ڵام چاوه‌ڕوانی فیداکاری بۆ په‌یوه‌ندیگرتن له‌گه‌ڵ حیزب له‌ کرێکارانێك، که‌ هێشتا ڕه‌وابوونی ڕێگای شۆڕشگێڕانه‌ی ئێمه‌یان به‌و ڕاده‌یه‌ی که‌ پێویسته‌ لا ڕۆشن نییه‌، شتێکی بێ جێیه‌.

ئه‌وه‌ ئێمه‌ین که‌ ده‌بێ به‌سه‌ر یه‌که‌مین به‌ربه‌سته‌کاندا سه‌ربکه‌وین و ئه‌گه‌ر یه‌کێ له‌م به‌ربه‌ستانه‌ موحافه‌زه‌کاری، خۆدزینه‌وه‌ له‌ ڕێکخراو، که‌ به‌ پله‌ی یه‌که‌م جه‌لادانی کۆماری ئیسلامی و به‌ پله‌ی‌ دووه‌م سه‌تحیکاریی پۆپۆلیسته‌کان له‌ ڕابردوودا خستوویانه‌ته‌ دڵی کرێکارانه‌وه‌، ئه‌و کاته‌ ئه‌وه‌ ئێمه‌ین، که‌ ده‌بێ وه‌کوو حیزبێکی سیاسی و په‌یمانده‌ری چینی کرێکار به‌ خستنه‌گه‌ری وزه‌ی زیاتر ئه‌م به‌ربه‌ستانه‌ پووچه‌ڵ بکه‌ینه‌وه‌. به‌ ڕاده‌یه‌ك که‌ کرێکاران باوه‌ڕ به‌ په‌یامی کۆمۆنیزم و حیزبی کۆمۆنیست دێنن، به‌ هه‌مان ڕاده‌ش له‌خۆبردوو ده‌بن. به‌ڵام ئه‌مه‌ هه‌لومه‌رجێکه‌،‌ ده‌بێ کاری بۆ بکه‌ین، نه‌ك وه‌ک گریمانه‌ وه‌ری بگرین.

هه‌ر چۆنێک بێت له‌م په‌یوه‌ندییانه‌دا ئێمه‌ توانای ئه‌وه‌مان ده‌بێ، به‌شێك له‌م ڕابه‌ره‌ عه‌مه‌لییانه‌ بگۆڕێن به‌ کۆمۆنیستی به‌ڵێنده‌ری حیزب و ڕێکخراو له‌ حیزبدا. لێره‌دا ئیتر کا‌رکردنی ئه‌م هاوڕێیانه‌ له‌ مه‌یدانی ئاژیتاسیۆن و ڕابه‌رایه‌تیی عه‌مه‌لیدا، ده‌بێته‌ مه‌سه‌له‌ی حیزب و مه‌سه‌له‌ ته‌کنیکی و عه‌مه‌لییه‌کانی ڕێکخستنی حیزبییانه‌ی ئاژیتاتۆریش ئیتر به‌ شێوه‌یه‌کی جیددی بۆ ئێمه‌ دێنه‌ ئاراوه‌.

په‌یوه‌ندی، فێرکردن، ڕێنماییکردن
یه‌که‌مین مه‌سه‌له‌یه‌ك، که ‌ده‌بێ چاره‌سه‌ر بکرێ، مه‌سه‌له‌ی په‌یوه‌ندی و لێکه‌وتی هه‌میشه‌یی ڕێکخراوی نهێنییه‌ له‌گه‌ڵ ئاژیتاتۆر. له ‌هه‌لومه‌رجی ئێستادا دڵنیاترین ڕێگای پاڕاستنی ئه‌م په‌یوه‌ندییه‌ ئه‌وه‌یه‌، که‌ ئاژیتاتۆر بخرێته‌ سه‌ر په‌یوه‌ندگرتن به‌ یه‌ك موره‌ویجی کارامه‌ی حیزبییه‌وه‌، که‌ ته‌نها ئه‌رکی (یان ئه‌رکی سه‌ره‌کی) ڕێکخراوه‌ییی ئه‌و پاڕاستنی په‌یوه‌ندی، فێرکردن، گۆشکردنی سیاسی و ڕاپۆرتدانه‌ له‌سه‌ر کاری ئاژیتاتۆر. ته‌رخانکردنی هاوڕێیه‌کی تایبه‌ت بۆ هه‌ر ئاژیتاتۆرێك لانی که‌می ئیمکاناتێکه‌، که‌ ده‌بێ له‌ خزمه‌ت هه‌ڵسووڕانی ئاژیتاتۆر دابنرێ. به‌ڵام هاوڕێی په‌یوه‌ندگر ته‌نها ئه‌رکی پاڕاستنی په‌یوه‌ندیی ئاژیتاتۆر و شانه‌ی نییه‌، به‌ پێچه‌وانه‌وه‌ ئه‌و له‌ واقیعدا نوێنه‌ری ته‌واوی ئۆتۆریته‌ی شانه‌ ده‌بێ له‌ په‌یوه‌ند به‌ ئاژیتاتۆره‌وه‌. له‌ڕووی سیاسی و شه‌خسییه‌تی خه‌باتکارانه‌وه‌، هاوڕێی موره‌ویج ده‌بێ هاوڕێیه‌ك بێ، که‌ بتوانێ وه‌ڵام به‌ مه‌سه‌له ‌تیۆری و عه‌مه‌لییه‌کانی ئاژیتاتۆر بداته‌وه‌، له‌ کاتی کارکردندا ئه‌و ڕێنمایی بکات و خاڵه‌ لاواز و به‌هێزه‌کانی کاری ئه‌و گه‌ڵاڵه‌ بکات. هاوڕێی موره‌ویج ده‌بێ بتوانێ ببێ به یه‌ك ئۆتۆریته‌ی مه‌عنه‌وی و سیاسی بۆ ئاژیتاتۆر. هه‌رچه‌نده‌ ئاژیتاتۆر به‌ پێشینه‌تر، به‌ئه‌زموونتر و چالاكتر بێ، تایبه‌تمه‌ندییه‌ك که‌ هاوڕێی موره‌ویجی په‌یوه‌ندگر ده‌بێ هه‌ی بێ، به‌ هه‌مان ڕاده‌ ده‌بێ له‌ ئاستێکی باڵاتردا بێ.

شێوازی کاری ڕۆژانه‌ی موره‌ویج له‌گه‌ڵ ئاژیتاتۆردا
هاوڕێی موره‌ویج بۆ ئه‌وه‌ی بتوانێ ڕێنمایی ئاژیتاتۆر بکات، ده‌بێ له‌ هه‌مان شوێنی هه‌ڵسووڕانی ئاژیتاتۆر (کارگه ‌و گه‌ڕه‌ك)دا ئاماده ‌بێ، وه ‌ئه‌گه‌ر بتوانرێ له‌ هه‌مان یه‌که‌ی به‌رهه‌مهێنان که‌ ئاژیتاتۆر تیایدا کار ده‌کات، ئیش بکات و چالاکی ده‌نوێنێ، په‌یوه‌ندی ئه‌م دوو هاوڕێیه‌ ده‌بێ په‌یوه‌ندی دوو دۆست و دوو هاوکاری نزیك بێت. به‌ڵام ئاستی ئاشکرای ئه‌م دۆستایه‌تییه‌ ده‌بێ به‌ شێوه‌یه‌ك بپارێزرێ، که‌ له‌ لایه‌که‌وه‌ ئاژیتاتۆر و هاوڕێی موره‌ویجی حیزبی به‌ شێوه‌یه‌کی خۆبه‌خۆ یه‌کتری ئاشکرا نه‌که‌ن. موره‌ویج ده‌بێ دۆستێکی نێو دۆسته‌کانی ئاژیتاتۆر بێت. له‌ لایه‌کی تره‌وه‌ ئه‌م هاوڕێیه‌تییه‌ ده‌بێ ئه‌وه‌نده‌ نزیك بێ، که‌ په‌یوه‌ندی یه‌ك له‌دوای یه‌کی ئاژیتاتۆر و موره‌ویج بۆ هه‌ر که‌سێکی دوور له‌ ئه‌مان کارێکی سروشتی بێته‌ به‌رچاو.

به‌ پێچه‌وانه‌ی ئاژیتاتۆره‌وه‌، که‌ به‌شداری ئاشکرا و نیمچه‌ ئاشکرا له‌ خه‌باتی کرێکاریدا ئه‌رکی ئه‌وه‌. هاوڕێی موره‌ویج ده‌بێ هه‌تا بتوانێ و بۆی بکرێ وه‌کوو یه‌ك کرێکاری ئاسایی به‌شداری ناڕه‌زایه‌تییه‌کان بکات. ئه‌گه‌ر موره‌ویج خۆی ڕاسته‌وخۆ ده‌خاڵه‌ت له‌ کاری ئاژیتاسیۆندا بکات، ئه‌و کاته‌ شانه‌ی حیزبی به‌کرده‌وه‌ دوو ئاژیتاتۆری بێ پشتیوان و بێ په‌یوه‌ندی هه‌یه‌. مه‌سه‌له‌که‌ ده‌توانرێت به‌م شێوه‌یه‌ له‌ به‌رچاو بگیرێت، که‌ هه‌ر یه‌که‌یه‌کی ئاژیتاسیۆنی ئێمه‌ لانی که‌م دوو که‌س ده‌گرێته‌ خۆی، یه‌کێکیان خودی ئاژیتاتۆره ‌و ئه‌وه‌ی تریان لێپرسراوی سیاسی و په‌یوه‌ندی ئه‌وه‌. پاراستنی کاردابه‌شکردن له‌ نێوان ئه‌م دووانه‌دا حه‌یاتییه‌. هاوڕێی موره‌ویج ده‌بێ کارێك بکات، که ‌له‌ ده‌روونی په‌یوه‌ندییه‌ سروشتییه‌کاندا ئاژیتاتۆر بتوانێ له ‌ڕێگه‌ی ئه‌وه‌وه‌ و به‌ یارمه‌تیی ئه‌و بڵاوکراوه‌ حیزبییه‌کان بخوێنێته‌وه‌، ده‌ستی بگات به‌ کتێب و نامیلکه‌ زه‌رورییه‌کان و به‌ لێکۆڵینه‌وه‌ ناوخۆییه‌‌کانی حیزب ئاشنا بێ. ئاژیتاتۆر له ‌ڕێگه‌ی هاوڕێی موره‌ویجه‌وه‌ بۆچوونه‌کان و ڕاپۆرتی خۆی ڕه‌وانه‌ی شانه‌ و ڕێکخراوه‌ی حیزبی ده‌کات. سه‌ره‌کیترین خاڵێك له‌ په‌یوه‌ندی نێوان موره‌ویج و ئاژیتاتۆردا، پشتبه‌ستنی سیاسیی ئاژیتاتۆره‌ به‌ موره‌ویج و ئۆتۆریته‌ی مه‌عنه‌وی هاوڕێی موره‌ویجه‌. به‌م شێوه‌یه‌ په‌یوه‌ستکردنی ڕابه‌رانی عه‌مه‌لی له‌گه‌ڵ شانه‌کان، له‌ بنچینه‌دا له‌ گره‌وی هه‌بوونی هاوڕێیانێکدایه‌ که‌ بتوانن ڕۆڵی په‌یوه‌ندگر_ موره‌ویج به‌ چاکی بگه‌یه‌نن. هه‌موو په‌یوه‌ندگرێك ناتوانێ ئه‌م ئه‌رکه‌ بگرێته‌ ئه‌ستۆ، چونکه‌ لاوازیی سیاسی، لاوازیی ئه‌زموونی موره‌ویج ده‌بێته‌ هۆی دواکه‌وتوویی ئاژیتاتۆر، دڵساردی ئه‌و له‌ کار و جیایی سیاسی ئه‌و له‌ حیزب. ئه‌گه‌ر ئه‌م ئۆتۆریته‌ مه‌عنه‌وییه‌ به‌ ده‌ست بێت، ئه‌وا هه‌ڵسووڕانی ڕۆژانه‌ی ئاژیتاتۆر به‌ چاپوکی و به‌که‌مترین ناڕۆشنیی عه‌مه‌لی و به‌ پله‌یه‌کی کافی له‌ پشتبه‌ستن به‌ خۆ ئه‌نجام ئه‌درێ. لێره‌دا مه‌سه‌له‌ی ئێمه‌ پێش ئه‌وه‌ی ڕێکخراوه‌یی و کارگێڕی بێت، یه‌ك مه‌سه‌له‌ی سیاسییه‌. ئێمه‌ ده‌بێ کادره‌ موره‌ویجه‌ خاراوه‌کانی خۆمان له‌ خزمه‌تی ڕاکێشان و ڕێکخستن و پاڕاستنی په‌یوه‌ندی به‌ باشترین ڕابه‌رانی عه‌مه‌لی له‌ بزووتنه‌وه‌ی کرێکاریدا دابنێین.

زه‌رووره‌تی سه‌ربه‌خۆیی عه‌مه‌لی ڕێژه‌یی ئاژیتاتۆر
ته‌نانه‌ت له‌ کاتی ئیمکانبوونی پێكهێنانی پته‌وترین په‌یوه‌ندی له‌گه‌ڵ شانه‌کان و ڕێکخراوی حیزب، واته‌ له‌ هه‌لومه‌رجێکی زۆر له‌بارتر له‌ ئه‌مڕۆ، یه‌ك موبه‌لیغی شه‌عبی حیزبی و یه‌ك ڕابه‌ری کۆمۆنیستی کرێکاران ده‌بێ له‌ ئازادییه‌کی عه‌مه‌لی ڕێژه‌یی به‌رز به‌هره‌مه‌ند بێ. داهێنان له‌ کاردا، بڕیاردانی خێرا، ده‌ستنیشانکردنی ده‌ستبه‌جێی مه‌وقیعه‌ت له‌ ساته‌ جیاوازه‌کانی خه‌باتدا، مه‌رجی پێویستی هه‌ڵسووڕانی یه‌ك ئاژیتاتۆری کۆمۆنیستییه‌ و ئه‌مه‌‌ له‌گه‌ڵ پله‌یه‌کی به‌رزی ‌سه‌ربه‌خۆیی له‌ چالاکی نواندنه‌کانی جاریدا هاوتایه. له‌ هه‌لومه‌رجی ئێستادا، ده‌بێ ئێمه‌ به‌ ڕاده‌یه‌کی زۆرتر، له مه‌سه‌له‌ی‌ ئازادیی کار بۆ ئاژیتاتۆره‌کان، "ڕازی" بین. ناله‌بارییه‌کانی ئه‌منییه‌تی و عه‌مه‌لیی په‌یوه‌ند و کونتڕۆڵ تا ڕاده‌یه‌کی زیاد له‌م قوناغه‌دا ده‌بێ له‌ڕێگه‌ی فێرکردنی ئاژیتاتۆر، هاودڵی ئایدیۆلۆژیك_ سیاسیی نێوان ئاژیتاتۆر و ڕێکخراوی نهێنی و نه‌ریته‌‌ جێگرتووه‌کانی هه‌ڵسووڕانه‌وه‌ قه‌ره‌بوو بکرێنه‌وه‌.

له‌ هه‌ر جێیه‌ك "کونترۆڵ" وه‌کوو یه‌ك مه‌سه‌له‌ی ڕێکخراوه‌یی و کارگێڕی لاواز بێت، ڕۆڵی هاوئاهه‌نگی سیاسیی تاکه‌کا‌ن و له‌سه‌رخه‌تبوونیان و زاڵبوونی ئه‌وان به‌سه‌ر نه‌ریته‌کانی کاری حیزبیدا زیاد ده‌کات. له‌م قوناغه‌ تایبه‌تییه‌ی هه‌ڵسووڕانی حیزب، ئێمه‌ ده‌بێ به‌ شێوه‌یه‌کی لێبڕاوانه،‌ به‌ ڕاده‌یه‌کی زۆر پشت به‌م هوکاره‌ سیاسی_ ئایدیۆلۆژیك و به‌م نه‌ریتانه‌ ببه‌ستین (که ‌ده‌بێ به‌ هه‌وڵ و کۆشش جێگیر بکرێن). ئه‌و نه‌ریتانه‌ی که‌ له‌ بنه‌ڕه‌ته‌وه‌ هه‌تا ئێستا نه‌بوون و گه‌ڵاڵه‌ و جێگیرکردنیان ئه‌رکی ئێمه‌یه‌. هه‌ر چه‌نده‌ ئاژیتاتۆر له‌ڕووی سیاسی و ئایدیۆلۆژییه‌وه‌ پته‌وتر بێت، پێداویستییه‌کانی حیزب به‌ دروستی بناسێت و له‌ کاری خۆیدا به‌ئه‌زموون ‌بێت، ڕێکخراوی نهێنی ده‌توانێ به‌ هه‌مان ڕاده‌ زیاتر پشت به ‌ڕاستیی بڕیاره‌ فه‌ردییه‌کانی ئه‌و ببه‌ستێت. ئه‌مه‌ ئه‌رکه‌کانی هاوڕێی په‌یوه‌ندگر و موره‌ویج به‌هێزتر ده‌کات و زه‌بر‌لێدانی ڕێکخراویش که‌م ده‌کاته‌وه.

ئه‌منییه‌تی شانه‌کان
چۆن ده‌توانرێت شانه‌ له‌و زه‌بر‌لێدانانه‌ بپارێزرێت، که‌ هه‌ڵسووڕانی عه‌له‌نیی ئاژیتاتۆر بۆی دێنێته‌ پێش. هاوڕێی موره‌ویج خۆی یه‌ك ئه‌ڵقه‌ی میانه‌یییه‌، که‌ ئاژیتاتۆر له‌ شانه‌ جیا ده‌کاته‌وه‌ ئیمکانی ئه‌وه‌ به‌ ئێمه‌ ده‌دات، که‌ شانه‌ له‌ ده‌ستپێڕاگه‌یشتنی پۆلیس دوور بخه‌ینه‌وه‌. هۆشیاری هاوڕێی موره‌ویج له‌ دیاریکردنی ئه‌گه‌ری زه‌بری پۆلیس له‌ ئاژیتاتۆر، ڕاگه‌یاندنی مه‌ترسی له‌سه‌ر ئاژیتاتۆر و شانه‌ له‌ لایه‌ن خودی موره‌ویجه‌وه‌ له‌ کاتی خۆیدا، توانستی ئه‌وه‌ به‌ ئێمه‌ ده‌دات که‌ خۆمان له‌ زه‌برلێدان دوور بخه‌ینه‌وه‌، یان ئه‌و زه‌بره‌ له‌ هه‌مان سنووردا ڕابگرین. له‌ هه‌لومه‌رجی ئێستادا ده‌بێ زانیاری ئاژیتاتۆر له‌سه‌ر شانه‌ زۆر که‌م و ته‌نها به‌ ڕاده‌یه‌ك بێ که‌ بۆ هه‌ڵسووڕانی ئه‌و حه‌یاتییه‌. ئه‌م زانیارییانه‌ ده‌بێ به ‌ڕاده‌یه‌ك بێ، که‌ ته‌نانه‌ت ده‌ستکه‌وتنی هه‌موو ئه‌مانه‌ له‌ لایه‌ن پۆلیسی سیاسییه‌وه‌ نه‌بێته‌ هۆی شوێنپێ هه‌ڵگرتنی شانه‌. زانیاریی هاوڕێی موره‌ویجیش له‌ شانه‌، ده‌بێ به‌پێی پرانسیپی "لانی که‌می زانیاری" به‌رته‌سك بێته‌وه‌، به‌ جۆرێك که‌ له‌ کاتی زه‌بر‌خواردنی هاوڕێی موره‌ویجدا، شانه‌ هه‌لی ته‌واوی بۆ پاکسازیی خۆی به‌ده‌سته‌وه‌ بێ. له‌ هه‌لومه‌رجی ئێستادا ده‌بێ چاوپۆشی له‌ به‌شداریکردنی هاوڕێی ئاژیتاتۆر له‌ دانیشتنی شانه‌کاندا بکرێت. له‌ هه‌لومه‌رجی باشتردا ده‌توانرێ ئاژیتاتۆر بانگ بکرێت بۆ دانیشتنی تری حیزبی، که‌ له‌وێدا ئیمکانی یه‌کترناسینی که‌سه‌ به‌شداربووه‌کان نه‌بێ. له‌ هه‌لومه‌رجێکدا و له‌ ئایینده‌شدا، ده‌بێ به‌شداربوونی ئاژیتاتۆر له‌ دانیشتنه‌ حیزبییه‌کاندا له‌ هه‌موو لایه‌نه‌کانی ئه‌منییه‌تییه‌وه‌ زۆر به‌ وردی، قووڵی و دڵنیایییه‌وه‌ بێت.

ئه‌منییه‌تی ئاژیتاتۆر
گرنگترین مه‌سه‌له‌ له ‌ئه‌منییه‌تی ئاژیتاتۆری کۆمۆنیستیدا په‌یوه‌ندییه‌که‌، که‌ وه‌ك ڕابه‌ر له‌گه‌ڵ جه‌ماوه‌ری کرێکاراندا پێکی ده‌هێنێ. به‌ده‌ستهێنانی پشتگیریی چالاکانه‌ی جه‌ماوه‌ری کرێکار له‌ خۆی و پشتبه‌ستن به‌ ئیراده ‌و بڕیاره‌کانی ده‌سته‌جه‌معی ئه‌وان، به‌شداریکردنی کرێکاران له‌ هه‌موو ئاسته‌کانی خه‌باتی ناڕه‌زایه‌تی و پشتبه‌ستن به‌ پشتیوانی توانای جه‌ماوه‌ر. ئه‌مه‌ حه‌یاتیترین سه‌رمایه‌ی ئاژیتاتۆره‌ له‌ مه‌یدانی پاراستنی ئه‌منییه‌تی خۆی له ‌ڕه‌وتی ڕابه‌ریی خه‌باتی ناڕه‌زایه‌تی و هه‌روه‌ها له‌ په‌یوه‌ندییه‌کانی ڕۆژانه‌یدا له‌گه‌ڵ کرێکاران. دوژمن هه‌ر چه‌نده‌ش، که‌ له‌سه‌ر ئاستی کۆمه‌ڵگه‌ سێبه‌ری داپڵۆسین و سه‌رکوت به‌رفراوان بکات، ناتوانێ به‌ ئاسانی ده‌ست بۆ ڕابه‌رانی کرێکاران درێژ بکات، بۆ ئه‌و که‌سانه‌ی که‌ له‌ناو دڵی جه‌ماوه‌ری کرێکاراندا جێگایان هه‌یه‌ و نوێنه‌ری شایسته‌ و ناسراوی ئه‌وانن.

ئه‌منییه‌تی ئاژیتاتۆر له‌ ڕه‌وتی هه‌ڵسووڕاندا وه‌کوو یه‌ك ئاژیتاتۆر، له‌ بنچینه‌دا ده‌بێ له‌م ڕێگه‌یه‌وه‌ دابین بکرێ. به‌ڵام مه‌رجی پێویست بۆ ئه‌م کاره‌ له‌م هه‌لومه‌رجه‌دا ئه‌وه‌یه‌، که‌ پۆلیسی سیاسی نه‌توانێ په‌ی به‌ لایه‌نگریی ڕێکخراوه‌یی و په‌یوه‌ندییه‌ عه‌مه‌لییه‌کانی ئاژیتاتۆر و ڕێکخراو به‌رێ. له ‌فیکر و په‌روه‌نده‌کانی پۆلیسدا هاوڕێی ئاژیتاتۆری ئێمه‌ ده‌بێ لانی زۆر وه‌کوو کرێکارێکی هه‌ڵسووڕاو و خه‌باتگێڕ ده‌ربکه‌وێت، که‌ له‌به‌رامبه‌ر زۆرداریی ده‌وڵه‌ت و خاوه‌نکاردا سه‌ر دانانه‌وێنێ و به‌رگری له‌ مافی کرێکاران ده‌کات. به‌ڵام په‌یوه‌ندیی ڕێکخراوه‌یی به‌ هیچ ڕه‌وتێکه‌وه‌ نییه‌. ئه‌مه‌ خاڵێکی به‌هێزی ئاژیتاتۆره‌ له‌ ڕووبه‌ڕووبوونه‌وه‌ له‌گه‌ڵ پۆلیسی سیاسیدا. ئه‌وه‌ ده‌بێ په‌یوه‌ندیی ڕێکخراوه‌یشی له‌ گۆشه‌یه‌ك دوور له‌ ده‌ستپێڕاگه‌یشتنی فیکری خۆی بپارێزێ و به‌ شێوه‌یه‌کی جیددی ده‌روونناسیی ڕابه‌رێکی جه‌ماوه‌ری، کرێکارێکی ناڕه‌زا، ناڕازییه‌کی جوامێر، واته‌ به‌شێك له‌وه‌ی که‌ به‌ واقیعی هه‌یه‌ بگرێته‌ خۆ. به‌ هه‌ر ئه‌ندازه‌ په‌یوه‌ندیی ڕێکخراوه‌یی پشتی به‌ په‌یوه‌ندیی سروشتیی جێکه‌وتووتر به‌ستبێت، ئاژیتاتۆر له‌ڕووی وره‌ و عه‌مه‌لییه‌وه‌ له‌به‌رامبه‌ر پۆلیسی سیاسیدا له‌ مه‌وقیعه‌تێکی به‌هێزتردا ده‌بێ.

له‌م ڕوانگه‌یه‌وه‌ ده‌بێ کۆمه‌ڵه‌ خاڵێکی تر به‌ شێوه‌یه‌کی جیددی له‌به‌رچاو بگرین. نابێ پۆلیس بتوانێ له‌ لای موبه‌لیغی حیزبی به‌ڵگه‌نامه ‌و بڵاوکراوه‌کانی ڕێکخراو یان ته‌نانه‌ت بڵاوکراوه‌ی عه‌له‌نیش په‌یدا بکات. په‌روه‌نده‌‌که‌ی ده‌بێ به‌ ته‌واوی له‌ به‌ڵگه‌نامه ‌و بڵاوکراوه "پاك" بێت‌. ئاژیتاتۆر جگه‌ له‌ ئه‌نجامدانی کاری ئاژیتاتۆر، نابێ هیچ کاری تری حیزبی هه‌بێ. نابێ له‌ چاپ و دابه‌شکردنی بڵاوکراوه‌کان، گواستنه‌وه‌، گوێزانه‌وه‌ی به‌ڵگه‌نامه‌، کۆکردنه‌وه‌ی کۆمه‌کی ماڵی به‌ ناوی حیزبه‌وه‌، له ‌ڕاکێشانی که‌سانی تازه‌ بۆ حیزب (به‌ شێوه‌ی ڕاسته‌وخۆ) هاوبه‌شی بکات، ئاژیتاتۆر ده‌بێ ئه‌رکی تایبه‌تی خۆی ئه‌نجام بدات.

ئه‌مه‌ ئه‌رکی شانه‌ی نهێنی و ئه‌ڵقه‌کان و تۆڕه‌‌کانی ده‌وروبه‌ری شانه‌ن، که‌ هه‌ڵسووڕانه‌ ڕۆتینییه‌کانی شانه‌ له‌سه‌ر زه‌مینه‌یه‌کی باشتر گه‌شه‌ پێ بده‌ن، که‌ له‌ ئه‌نجامی هه‌ڵسووڕانی هاوڕێی ئاژیتاتۆر دێته‌کایه‌وه‌. له‌ هه‌لومه‌رجی ئێستادا، پێناسی ئاژیتاتۆری حیزبی و لایه‌نگریی ئه‌و بۆ حیزب، که‌سێك جگه‌ له‌ هاوڕێی موره‌ویج نابێ بیزانێ (ده‌بێ حیساب و کیتابی تایبه‌تیی نێوان هاوڕێی ئاژیتاتۆر له‌گه‌ڵ ناوه‌ندی لیژنه‌ی ڕێکخراوه‌یی سه‌ر به‌ حیزب پێك بێت، تا له‌ کاتی پچڕانی په‌یوه‌ندی ئه‌و له‌گه‌ڵ هاوڕێی موره‌ویج، په‌یوه‌ندی ئاژیتاتۆر له‌گه‌ڵ شانه‌ به‌ شێوه‌ی پێویست سه‌رله‌نوێ له‌ لیژنه‌ی ڕێکخراوه‌یییه‌که‌وه‌ بگه‌یه‌نرێته‌وه‌). به‌ کورتی وزه‌یه‌کی زۆر ده‌بێ بخرێته‌ گه‌ڕ، تا ئاژیتاتۆر بتوانێ له‌ ئه‌منییه‌تییه‌کی ته‌واودا چالاکی بنوێنێ. ئه‌م خاڵه‌ش زیاد ده‌که‌م، که‌ پاڕاستنی هاوڕێی موره‌ویجیش زۆر حه‌یاتییه‌. هه‌م به‌های فه‌ردی ئه‌و وه‌کوو کادرێکی کۆمۆنیست و هه‌م ڕۆڵێکی هه‌ستیار که‌ له‌م نێوه‌دا له‌ ئه‌ستۆیدایه‌، وا پێویست ده‌کات که‌ ئه‌گه‌رچی به‌ قه‌ده‌ر ئاژیتاتۆر ڕاسته‌وخۆ گیرۆده‌ی زه‌ربه‌کانی کاتی ڕوودانی ئاکسیۆن نییه‌، به‌ڵام ده‌بێ لانی زۆری ئیمکانات بۆ پاڕاستنی ئه‌منییه‌تی ئه‌و ته‌رخان بکرێ. هه‌روه‌ها له‌ کاتی ڕوودانی هه‌ر مه‌ترسییه‌کی پۆلیسیی بۆ سه‌رشانه‌که‌، موره‌ویجیش له‌گه‌ڵیدا تێوه‌ بگلێ، ده‌بێ خێرا ئاگادار بکرێته‌وه ‌و ئیمکاناتی پێویستیش بۆ پاڕاستنی ئه‌منییه‌تی فه‌ردی ئه‌و بێته‌ کایه‌وه‌. گه‌یاندنی بڵاوکراوه‌کان به‌ده‌ستی هاوڕێی موره‌ویج، وه‌رگرتنی ڕاپۆرته‌کانی ئه‌و دانیشتنانه‌ که‌ ئه‌و تیایاندا به‌شداری ده‌کات، ده‌بێ له ‌ڕاده‌یه‌کی ئه‌منییه‌تی زۆر باڵادا ڕێك بخرێت.

٢) کار له‌گه‌ڵ خاوه‌ن ئاماده‌یییه‌ نوێکاندا

ئه‌گه‌ر ڕابه‌رانی جێگرتووی کرێکاری له‌ یه‌ك پرۆسه‌ی فێربوون و بارهێنانی ڕه‌خنه‌گرانه‌دا له‌ حیزبی کۆمۆنیست نزیك ده‌بنه‌وه‌، خاوه‌ن ئاماده‌یییه‌ نوێکان و ڕابه‌ره‌ گه‌نجتره‌کان زۆرتر پێویستییان به‌ فێربوون و بارهاتنی ئیسپاتییانه‌ی مارکسیزم و شێوازه‌ عه‌مه‌لییه‌کانی ڕابه‌ری کرێکاری هه‌یه‌. کاری فێرکردن و بارهێنان و کێشکردنی ئه‌م ده‌سته‌یه‌ له‌ کرێکاران، ده‌بێ هه‌ر له‌ سه‌ره‌تاوه‌ له‌ لایه‌ن هاوڕێیانێکه‌وه‌ ئه‌نجام بدرێ، که‌ له‌ هه‌مان شوێنی کار و ژیاندا ئاماده‌یییان هه‌یه‌. ئه‌م هاوڕێیانه‌ن که‌ ده‌بێ لیهاتوویی و ئاماده‌یی کرێکارانێك، که‌ ده‌توانن ببنه‌ ڕابه‌ری عه‌مه‌لیی خه‌باتگێڕ، دیاری بکه‌ن و هه‌ر خۆیانن که‌ قوناغه‌ سه‌ره‌تایییه‌کانی ئه‌م پرۆسه‌یه‌ به‌ره‌و پێش ده‌به‌ن. هه‌ر هاوڕێیه‌کی حیزبی له‌ کارگه ‌و گه‌ڕه‌ك ده‌توانێ په‌یوه‌ندی له‌گه‌ڵ چه‌ند کرێکاری لیهاتوو خاوه‌ن ئاماده‌یی هه‌بێ و به‌ شێوه‌یه‌کی هه‌میشه‌یی مه‌سه‌له‌ی هۆشیارکردنه‌وه‌ و فێرکردن له‌ نێویاندا به‌ره‌و پێش به‌رێت. به‌شێکی گرنگی ئه‌م فێرکردنه‌، فێرکردنێکی عه‌مه‌لی و ئه‌زموونگه‌رییه‌‌. په‌روه‌رده‌کردنی ئاژیتاتۆر یه‌ك پرۆسه‌ی تا ڕاده‌یه‌ك دوور و درێژه‌. هاوڕێی کرێکار ده‌بێ هه‌موو هونه‌ری ئاژیتاسیۆن فیر بێ، وه ‌به‌مپێیه‌ وه‌کوو هه‌ر به‌شێکی زانستی و هونه‌ری دیکه‌ ده‌بێ قوناغی جۆراوجۆر ببڕێت. فێری کار بێت، له‌ کاری ساده‌وه‌ بۆ کاری ئاڵۆز بچێ.

ئاژیتاسیۆن ته‌نها ئازایه‌تیی ناڕه‌زایه‌تیکردن و بانگه‌وازکردنی که‌سانی تر بۆ ناڕه‌زایه‌تی نییه‌، به‌ڵکه‌ شێوه‌ ڕێکخستن و ڕابه‌ریکردنی جه‌ماوه‌ری کرێکارانیشه‌ به‌ شێوه‌ی ئاشکرا و نیمچه ‌ئاشکرا. ئه‌وه‌ی، که‌ ئاژیتاتۆری تازه‌کار ده‌بێ له‌ڕووی تیۆرییه‌وه‌ فێری ببێ، جیاوازییه‌کی زۆری له‌گه‌ڵ ئه‌ودا نییه‌، که‌ هه‌ر ئێستا له‌ ئه‌ڵقه‌ ته‌رویجییه‌کاندا جێگه‌ی باس و لێکۆڵینه‌وه‌یه‌. به‌ڵام له‌ڕووی عه‌مه‌لییه‌وه‌ ئه‌م مه‌سه‌له‌یه‌ تایبه‌تمه‌ندیی خۆی هه‌یه‌. هیچ که‌سێك ناتوانێ له‌ ڕۆژی یه‌که‌مه‌وه‌ له ‌ڕیزی پێشه‌وه‌ی مانگرتنێكدا ڕابوه‌ستێ و هه‌موو لایه‌نه‌کانی به‌ ته‌واوه‌تی ڕابه‌ریی بکات. تاکه‌که‌س ده‌بێ له‌پێشدا فێری کارکردن له‌گه‌ڵ جه‌ماوه‌ری کرێکاران له‌ ئاستی جۆراوجۆردا بووبێت و پێداویستییه‌کانی ڕابه‌رایه‌تی هه‌نگاونانی ناڕه‌زایه‌تیکردن‌ بناسێت، ده‌وره‌ی کار و فێربوون به‌ مانای واقیعی وشه‌که‌ ده‌وره‌ی فێربوونه‌. ده‌وره‌یه‌که‌ به‌ "پرۆژه‌کان" و ڕاهێنانه‌کان و ده‌رسه‌کانییه‌وه‌. هاوڕێی موره‌ویجی ئێمه‌ ده‌بێ به‌ شێوه‌یه‌کی هۆشیارانه‌ ئاژیتاتۆری تازه‌کار بخاته‌ ئه‌م تاقیکردنه‌وانه‌وه‌ (ئه‌ڵقه‌ "خوبه‌خۆیی"یه‌کانی کرێکارانی پێشڕه‌و هه‌ر ئێستا ئه‌م ڕه‌وشته‌ له‌ فێرکردنی کرێکاره‌ خاوه‌ن ئاماده‌یییه‌ نوێیه‌کاندا به‌کار ده‌هێنن).

بۆ نموونه‌ کێشه‌ و هه‌را شه‌خسییه‌کان، په‌یوه‌ندیی نێوان به‌شێک له‌ کرێکارانی سارد و ناهاوڕێیانه‌ لێکردووه‌، ئایا تازه‌کاری ئێمه‌ ده‌توانێ به‌ قسه‌کردن و به‌ڵگه‌هێنانه‌وه‌ و ڕوونکردنه‌وه‌ی به‌رژه‌وه‌ندییه‌ چینایه‌تییه‌کانی کرێکاران ئه‌م جیاوازییانه‌ له‌نێو به‌رێ و بار و دۆخێکی هاوڕێیانه‌ پێك بهێنێ؟ کرێکارێك له‌ کاتی کارکردندا زیانبار ده‌بێ و له‌ کار ده‌که‌وێ، ئایا تازه‌کاری ئێمه‌ ده‌توانێ کاریك بکات، که‌ کرێکاران به‌ شێوه‌ی کۆڕ و کۆمه‌ڵ و به ‌ده‌ست له‌ کار کێشانه‌وه‌ بچنه ‌لای و سه‌ر له‌ خێزانه‌که‌ی بده‌ن و بۆ وه‌رگرتنی ته‌عویز گوشار بۆ خاوه‌نکار بێنن؟ ئایا تازه‌کاری ئێمه‌ ده‌توانێ سندوقێکی یارمه‌تی بۆ خێزانی ئه‌و هاوڕێ کرێکاره‌ی که‌ له‌کار که‌وتووه‌ ڕێك بخات؟ بۆ پشتگیریکردن له‌ کرێکارێکی خه‌باتگێڕی زیندانی چی ده‌کات؟ ئایا تازه‌کاری ئێمه‌ ده‌توانێ کارێ بکات، که‌ کرێکارانی ئه‌م یان ئه‌و به‌شه‌، فڵانه‌ ئه‌ندامی ئه‌نجومه‌نی ئیسلامی که‌ ده‌ستی به‌ تۆقاندنی کرێکاران کردووه‌ به‌پێی یه‌ك به‌رنامه‌ی حیسابکراو پاشه‌کشه‌ پێ بکه‌ن؟

ئه‌م ته‌جروبانه‌ زۆرن و له‌ ژیانی هه‌موو ڕۆژه‌ی کرێکاراندا چه‌ند جار دێته‌ به‌رده‌م هه‌موو کرێکارێکی هۆشیار و خه‌باتگێڕ. له‌م پرۆسه‌یه‌دا ئاژیتاتۆر به‌ قووڵی له‌گه‌ڵ مه‌سه‌له‌کانی کرێکاران، توانای ئه‌وان، شێوه‌ جیاوازه‌کانی ڕێکخستنیان، ئه‌و هۆکارانه‌ی که‌ ئازایه‌تییان پێ ده‌به‌خشێ یان نیگه‌رانیان ده‌کات، ده‌روونناسیی جه‌ماوه‌ری کرێکاران ... هتد. ئاشنا ده‌بێ، ئه‌مانه‌ هه‌موویان پێداویستییه‌کانی بوون به‌ ڕابه‌ری عه‌مه‌لیی کرێکارانن.

له‌ڕووی عه‌مه‌لییه‌وه‌ سه‌رده‌می ئاماده‌کردن و کێشکردن ده‌بێ له‌ژێر چاودێری هاوڕێیه‌کی موره‌ویجی حیزبیدا ببرێته‌ پێش. به‌و ڕاده‌یه‌ی که‌ هۆشیاری و ئه‌زموونی ئاژیتاتۆری داهاتووی ئێمه‌ زیاد بکات، به‌ هه‌مان ڕاده‌ش له‌ڕووی عه‌مه‌لییه‌وه‌ له‌ حیزب نزیك ده‌بێته‌وه‌. ئه‌م هۆشیاری و ئاماده‌یییه‌ ده‌بێ به‌ ڕاده‌یه‌کی وا بچێته‌ سه‌ر، که‌ ئاژیتاتۆر خۆی خوازیاری کاری جیددی و ڕاسته‌وخۆ له‌گه‌ڵ حیزبی کۆمۆنیست و ئه‌ندامه‌تی له‌ حیزبدا بێت.

کاتێك، که‌ ئاژیتاتۆر جێگه‌ی خۆی وه‌كوو کۆمۆنیستێك له‌ حیزبدا و وه‌ك ڕابه‌رێك له‌ پێشه‌وه‌ی کرێکارانه‌وه‌ به‌ده‌ست بینێ، مه‌سه‌له‌ عه‌مه‌لییه‌کانی ڕێکخستنی ئه‌و جۆرێك ده‌بێ، که‌ پێشووتر باسمان کرد. هه‌روه‌ها په‌روه‌رده‌کردنی ئاژیتاتۆر هه‌ر له‌ قۆناغه‌کانی سه‌ره‌تاوه‌ به‌ مانای ئه‌وه‌ ده‌بێ، که‌ به‌ره‌به‌ره‌ په‌یوه‌ندیی سروشتیی پته‌و له‌ نێوان ئه‌و و موره‌ویج، وه ‌یان موره‌ویجه‌کانی حیزبدا پێك هاتووه‌، هاوڕێیه‌تی کۆن و پشت پێ به‌ستراو دروست بووه‌ و موره‌ویج و ئاژیتاتۆر به‌ قووڵی ئیمکانات و که‌سایه‌تیی فه‌ردی یه‌کتر ده‌ناسن. ئه‌مه‌ که‌ خۆی یه‌کێکه‌ له‌ پێکهێنه‌ره‌کان و نیشانه‌کانی جه‌ماوه‌ریبوونی شانه‌ بنه‌ڕه‌تییه‌کان له‌نێو کرێکاراندا، ده‌ستی ئێمه‌ تا ڕاده‌یه‌کی زۆر له‌ ڕێکخستنی گونجاوی په‌یوه‌ندیی ڕێکخراوه‌یی نهێنی له‌گه‌ڵ ئاژیتاتۆری عه‌له‌نیکاردا ئاوه‌ڵا ده‌کات.

٣) تونای ئاژیتاتۆر له‌ ڕێکخراوکردندایه

توانای چینی کرێکار له‌ ڕێکخراوبوونیدایه‌. ئه‌مه‌ حوکمێکی سه‌ره‌تایی خه‌باتی چینایه‌تیی کرێکارانه‌. به‌ڵام سه‌باره‌ت به‌ هه‌ر کرێکارێکی خه‌باتگێڕی تاکیش ئه‌م حوکمه‌ ڕاسته‌. ڕێکخراوبوون ئه‌گه‌ر ڕێکخراوێکی پرۆلیتاری بێ، هێز به‌ کرێکاری خه‌باتکار ده‌به‌خشێت، پشتبه‌خۆبه‌ستوویی ئه‌و زیاد ده‌کات، وره‌ و چاونه‌ترسی و دڵنیایی ئه‌و له ‌سه‌ره‌نجامی کاره‌که‌ی ده‌کاته‌ ده‌یان جار. ڕابه‌رانێکیش که‌ په‌یوه‌ندی به ‌ڕیزه‌کانی ئێمه‌وه‌ ده‌که‌ن، ده‌بێ ئه‌و هه‌سته‌یان‌ لا په‌یدا بێت. ڕێکخراوبوون له‌ حیزبدا ده‌بێت به‌و مانایه‌ بێت که‌ ئه‌وان مه‌سه‌له‌ی ڕابه‌ریکردن باشتر ئه‌نجام ئه‌ده‌ن، هه‌ست به‌ ئه‌منییه‌تی باشتر ده‌که‌ن، دڵنیایی زیاتریان له‌ به‌رده‌وامکاری خه‌باتیان ده‌بێت، کارتێکردنی زۆرتر به‌جێ ده‌هێڵن، له‌به‌رامبه‌ر دوژمندا خۆیان به‌هێزتر ده‌بینن و دڵنیایی زۆرتر ده‌بینن. سه‌باره‌ت به‌ کاریگه‌ری و سه‌ره‌نجامی چالاکییه‌کانیان بۆ سه‌ر خێزان و ژن و مناڵه‌کانی خۆیان چ له‌ڕووی مادی و چ له‌ڕووی مه‌عنه‌وییه‌وه‌. سه‌تحیگه‌رێتی سیاسی و ڕێکخراوه‌یی گروپه‌ پۆپۆلیسته‌کان و بایه‌خنه‌دانیان به‌ پێداویستییه‌کانی کرێکارانێکی خه‌باتکار، که‌ ڕوو له‌ کاری ڕێکخراوه‌یی ده‌که‌ن، به‌کرده‌وه‌ له‌ زۆر جێگادا ڕێکخراوی سیاسی ده‌کرده‌ قورسایییه‌ك به‌سه‌ر پێی کرێکارانی خه‌باتکار و بارێك به‌سه‌ر شانیانه‌وه‌. شێوه‌کاری حیزبی کۆمۆنیست، شێوه‌کارێکی تره‌. ئه‌مه‌ ده‌بێ به‌ عه‌مه‌لی بسه‌لمێنرێ.

٤) له‌ کۆتاییدا جارێکی تر ده‌رباره‌ی گرنگیی ئاژیتاتۆری کۆمۆنیست

ڕاکێشان و په‌روه‌رده‌کردنی ئاژیتاتۆره‌ کۆمۆنیسته‌کان پرۆسه‌یه‌کی دژوار و درێژخایه‌نه‌. به‌ڵام له‌ سه‌ره‌تاشه‌وه‌ بڕیار نه‌بووه‌ شۆڕشی کۆمۆنیستی کارێکی ساده ‌بێت و زوو به‌ ئه‌نجام بگات. ئاژیتاتۆری کۆمۆنیست یه‌ك پایه‌ی ئه‌م شۆڕشه‌ کۆمۆنیستییه‌یه‌. تا ئه‌و کاته‌ی کۆمۆنیسته‌کان له‌ مه‌یدانی کاری سیاسیدا خۆیان ته‌نها به‌ کاری نهێنییه‌وه‌ ببه‌ستنه‌وه‌ (به‌ له‌به‌رچاوگرتنی ئه‌وه‌شی، که‌ له‌م مه‌یدانه‌شدا کاری خۆیان به‌ باشیش به‌رن به‌ڕێوه‌) و مه‌یدانی کاری عه‌له‌نی و ڕابه‌رایه‌تی جه‌ماوه‌ری به‌و به‌شانه‌ بسپێرن، که‌ لانی زۆر توانای خه‌باتیان بۆ ڕێفۆرم هه‌یه‌ و ڕێفۆرم و توانای شۆڕشگێڕی چینی کرێکار له‌ چوارچێوه‌ی یاسا و بڕیاره‌کانی کۆمه‌ڵگای بۆرژوازیدا ده‌هێڵێته‌وه‌، شۆڕشی کۆمۆنیستی ئیمکانی نییه‌. کۆمۆنیسته‌کان حه‌کیمێکی خێرخوا نین که‌ چینی کرێکار "به‌ شێوه‌ی گشتی" هۆشیار بکه‌نه‌وه‌، به‌ڵام به‌ شێوه‌ی موشه‌خه‌س و له‌ خه‌باتی عه‌مه‌لیدا بیده‌نه‌ ده‌ست سه‌ندیکالیزم و ڕێفۆرمیزم.

ئاژیتاتۆری کۆمۆنیست بۆ ڕابه‌ریکردنی جه‌ماوه‌ری کرێکاران نه‌ك ته‌نها به‌شێکی جیانه‌کراوه‌ی هه‌ر تێکۆشانێکه‌، به‌ڵکه‌ له‌ڕووی هۆشیاریشه‌وه،‌ به‌ ڕاده‌یه‌ک که‌ ئه‌م هۆشیارییه‌ ده‌بێ له‌ دڵی خه‌باتی ئێستا و عه‌مه‌لیدا فیر بێت، ڕۆڵی حه‌یاتی هه‌یه‌. حیزب به‌بێ ئاژیتاتۆری حیزبی ناته‌واوه ‌و به ‌ناچاری سه‌رکه‌وتوو نییه. به‌ڵام ئاژیتاتۆری کۆمۆنیست له‌سه‌ر دره‌خت سه‌وز نابێ، به‌رهه‌می کاری په‌یگیر و درێژخایه‌نی کۆمۆنیسته‌کانه‌ له‌ ده‌روونی چینی کرێکاردا.

ده‌بێ کارێك بکه‌ین که‌ ده‌ورانی بێ ڕابه‌رایه‌تی کرێکاران کۆتایی بێت و باشترین توخمه‌کانی چینی کرێکار، کرێکارانی کۆمۆنیست، ڕابه‌ران و ڕێکخه‌رانی کاری جه‌ماوه‌ری به ‌هیمه‌تی حیزبی کۆمۆنیست و چینی کرێکار له‌ کارخانه‌کان و گه‌ڕه‌که‌کان، له‌ مانگرتنه‌کان، خۆپیشاندانه‌کان، سه‌نگه‌ر و ڕاپه‌ڕیندا، به‌ده‌ست بێنین ... ده‌بێ کارێك بکه‌ین، که‌ له‌ سبه‌ینێیه‌کی نزیكدا، له‌ هه‌موو جێیه‌ك بۆرژوازی له‌گه‌ڵ کرێکارانی ناڕازی و ڕاپه‌ڕیو ڕووبه‌ڕوو بێته‌وه‌، له‌سه‌روو وه‌ له‌ پێشه‌وه‌ی ڕیزه‌کانی ئه‌واندا کرێکارانی کۆمۆنیستی په‌یگیر ببینن، که‌ له‌ یه‌ك حیزبی سیاسی نهێنی به‌ دیسپلینی پوڵایین به‌ یه‌کترییه‌وه‌ گرێ دراون. کرێکارانێکی کۆمۆنیست که‌ ئه‌ڵقه‌ی په‌یوه‌ستکه‌ری جه‌ماوه‌ری مه‌زنی کرێکارانن له‌ ڕێکخراوی پیشه‌یی ئه‌م چینه‌وه‌‌، واته‌ حیزبی کۆمۆنیستی ئێران. ئه‌گه‌ر ده‌مانه‌وێ ئه‌و ڕۆژه‌ زووتر بگات، ئه‌مڕۆ ده‌بێ به‌ شێوه‌یه‌کی جیددی مه‌سه‌له‌ی پێكهێنان و به‌رفراوانکردنی ڕێکخراوی نهێنیی کۆمۆنیستی له‌نێوان کرێکاراندا له‌گه‌ڵ مه‌سه‌له‌ی په‌روه‌رده ‌و ڕاکێشانی کۆمۆنیسته‌کان پێکه‌وه‌ گرێ بده‌ین. ده‌رککردن به‌ گرنگی و جێگای ئاژیتاتۆری کۆمۆنیست، هه‌نگاوی یه‌که‌مه‌ له‌م ڕێگه‌یه‌دا.



تێبینی: ئه‌م باسه‌ له‌ لایه‌ن ڕێکخراوی "ڕه‌وتى کۆمۆنیست"ه‌وه‌ له‌ به‌رواری حوزه‌یرانی ١٩٩٠دا چاپ و بڵاو کراوه‌ته‌وه‌.
سه‌رچاوه‌: حوزه هاى حزبى و آکسيون هاى کارگرى  -  "کمونیست"، شماره‌هاى ١٧، ١٨، ١٩ و ٢٠  -  اسفند ٦٣ تا خرداد ٦٤
وه‌رگێڕانی: ئاوات سه‌عید، ڕزگار مه‌حه‌مه‌د    تایپکردنه‌وه‌ی: ئامانج ئه‌مین

Kurdish translation: Avat Saeed, Rezgar Mohammad
hekmat.public-archive.net #0360ku.html